Derya Ren

 

AMED - Mudira xeberan ya ajansê JINNEWSî Safîye Alagaşe zîndanê Cinîyan yê Amedî ra nuşteyêk nuşte û da zanayîş ke cinîyê ke qelema înan wirznayî, sere nêronenî û vat: “Yê ke peynîya raştîye de bê nêeşkenê bêrê bêvengkerdiş. JINNEWS cinîyan rê bena umud û cinîyê ke têkoşînê xo ra tavîz nêdanê zî do ma rê bibê umud.”

 

Seba ke seserra 21ine biba seserra cinîyan, her çar parçeyê dinya de xoverdayîş yeno dayîş û bi nê rihî 25ê Teşrîna Peyêne Roja Têkoşînê Vera Şîdetê Serê Cinîyan yeno pêşwazîkerdiş. Felsefeya "Jin jiyan azadî" ya têgêrayîşê cinîyanê kurdan ke resayo heme dinya, ma zî bi dosyayanê xo no xoverdayîşî resnenê. Ma nê beşê dosyayê xo de ercnayîşê mudira ajansê ma Safîye Alagaşe girewt dest. 

 

Sebebê tepiştişî: Rojnamegerî

 

Safîyeya ke bi serran o Çapemenîya Azade ya Kurdî de kede dana 8ê hezîrana 2022î de çarçeweya tehqîqato ke Serdozgerîya Komarî ya Amedî rayra berdêne ra tewrê 22 embazanê xo ameybî tepiştiş. 22 kesî 8 rojan nezaret de ameyî destbendkerdiş û Safîyeye 16ê hezîrane de tewrê 15 embazanê xo bi bahaneyê bername û xeberan virazenê ameye tepiştiş. Her çend ke 5 aşmî derbaz bibo zî îdîanameyê derheqê înan hema zî nêameyo hadrekerdiş. Safîyeye ma rê qala hedef mojnayîşê JINNEWSî kerd. 

 

'Sloganê ma sloganêko wina rêze ra nîyo’

 

Safîyeye destpêkê qiseykerdişê xo de va ke JINNEWS israrê xo yê adetê Çapemenîya Azade domnana û wina dewam kerd: “Sloganê ‘Bi qelama cinî rêça heqîqetî de’ sloganêko rêze ra nîyo. Wexto ke JINNEWS bi nê sloganî vejîya rayîr mi zanayêne wina sana do nêbo. Cinîyê ke JINNEWSe reyde kewtî rayîr zanayêne rayîrê înan asan nîyo. Ma kaleme Gurbetellî Ersoz, Ayfer Serçe, Denîz Firat, Nujîyan Erhane wedarit. JINNEWS bi qelema cinîyê ke rayîrê heqîqetî de dinyaya xo bedelnayî, dest bi weşanî kerd. Bi qelema xo bî wengê cinîyan. Bî vengê heme cinîyê ke şîdet vînenê. Tena nêbî veng, eynî wext de têkoşîn rayra berd û hema zî rayra bena. Tabî no îqtîdarî aciz keno. Veng û hêzê cinîyan îqtîdarî tersneno. Coka ra JINNEWS her tim binê zextan de ya. La JINNEWS zî sey cinîyê ke qelema înan wedaritî, sere nêronena. Adetê çapemenîya azade de israr kena. JINNEWS adetê çapemenîya azade de israr kena û wayîrê ameyox û têkoşînê ewro yê cinîyan vejena.

 

‘Ewro bêveng nêmanenê do siba zî nêmanê’

 

Safîyeya ke sey mudira xeberan ya JINNEWSî ameye tepiştiş dewamê qiseykerdişê xo de bale ant bêtehemulîya îqtîdarî yê hemverê Çapemenîya Azade û vat: “Bi tepiştişan nêeşkenê çapemenîya azade bêveng bikerê. 6 aşmanê peyênan de 26 embazê ma ameyî tepiştiş. Tepiştiş, destbendkerdiş û qetilkerdiş. Bi hawayêko sistematîk xebatê çapemenîye ser de polîtîka ame rayraberdiş. Kedkarê Çapemenîya Azade qet bêveng nêmendî. Her tim raştî nuştî. Çanê xoverdayîşî awan kerdî. Raştîyan ra tavîz nêdayî. Rayîrê heqîqetî de şîyî. No xoverdayîşo ke heta ewro ameyo, her tim ma xurt kerdo. Kesê peynîya raştîyan de rayra şinê nêeşenê bêvengkerdiş. Çimkî rayîrê raşt û hewdarî de yê. Rojnamegerê çapemenîya azade heta ewro bedêlanê giranan dayî. La raştîyan ra tawîz nêdayî, bi canê xo bedel dayî, kewtî zîndanan û ameyî surgunkerdiş. La qet bêveng nêmendî. Senî ke ewro bêveng nêmanenê do siba zî bêveng nêmanê.”

 

'Ge-ge raştê gefan ameyî’

 

Safîyeye bale ant îşkenceyê serê rojnamegerê cinîyan ser û na babete de zî nê çîyan ard ziwan: “JINNEWS her tim hemverê îşkenceyê serê cinîyan de têkoşîn daya. Cinî raştê îşkenceyê fîzîkî, ekonomî, hîssî yenê. JINNEWS sey vengê cinîyan her tim hemverê îşkenceyî de têkoşînêk cîdî rayra bena. Ge-ge îşkenceyê pî, ge-ge yê heskerdoxî, ge-ge zî yê bira teşhîr kerd. Tewr zêde zî îşkenceyê polîsan teşhîr kerd. Bî vengê cinîyê ke raşteyan de îşkence vînenê. Tabî xebatkar JINNEWSe wexto ke têkoşîn rayraberdêne bi îşkenceyan reyde rî bi rî mendî. Ge-ge raştê gefan ameyî. Ge-ge nêverdayî ke ma kare xo bikerê, ma dîmenan biancê û îşkenceyê fîzîkî bi ma kerdî.

 

'Hemverê cinîye de şerêke îdeolojîk yeno rayraberdiş’

 

Zîhnîyeto serdest yê camêrdî bi hawayêko hovane hêrişê cinîyan keno û tabî JINNEWSe zî wina nêverdena. Zîhnîyeto camêrd hemverê cinîye de şerêke îdeolojîk rayra beno. Seba înan hedefo yewine ajansê xeberan yê vengê cinîyan o. La ma çend îşkence bivînî zî, ma çend bêrî qetilkerdiş zî îqtîdar nêwazeno vengê ma bivejîyo. Ma sey JINNEWSe hem pawitişê xo yê cewherî pê anî hem zî seba averşîyayîşê pawitişê cewherî yê cinîyan serkêşî kenê. Her çî ra ver ma pawitişê zîhnî û rihî kenê. Lazimî bi pakîya rihî û zîhnî esta. No esasî ser de ganî pawitişê cewherî bêro averberdiş. Ganî pawitişê cewherî yê fîzîkî bêro averberdiş. JINNEWSe no esasî ser de rolêk mihîm kay kena. Coka ra JINNEWS û xebatkarê aye hedef yenê mojnayîş. Hemverê cinîyan de hêriş esto. JINNEWS vera heme hêrişan rayîrê xo domnena.”

 

'Ma ra hêz gênê’

Safîyeye vat ke JINNEWS seba cinîyan umud a û cinîyê ke şîdet dîyî înan ra hêz gênî û domna: “Cinî ma ra hêz gênî. Polîs û leşkeran teşhîr kena. Vera heme gefan gamêk tepîya nêerzena. JINNEWS seba cinîyan bî umud. Derheqê JINNEWSe de xeylê dewayî ameyî akerdiş. Rojnamegerê aye ameyî muhakemekerdiş û tepiştiş. La reyna zî gamêk tepîya nêeşte. Şexsê JINNEWSe de xeberê ke ma viraştî yenê muhakemekerdiş. Têkoşînê heqîqetî yeno muhakemekerdiş.”

 

'Bawerîya mi bi girdbîyayîşê xoverdayîşî tam a’

 

Safîyeye derheqê 25ê Teşrîna Peyêne de mesajêk pare kerd û win qedêna: “Sîstemo serdest yê camêrdî vizêr û ewro zî hemverê cinîye de îşkence meşru vîneno. La têkoşînê cinîyan ewro hîna xurt cewab dano. Têkoşînê cinîyan ke çend şino gird beno, esto. Her veng û her têkoşîn tesîr bi heme cinyan keno. Vengê cinîye ewro dinya de veng dano. Sey şorişê Rojava û Îranî. Ez her çend ke zindan de biba zî 25ê Teşrîna Peyêne zerrîya mi bi heme cinîyan reyde ya. Bawerîya mi bi girdbîyayîşê xoverdayîşî tam a. Seba heme cinîyan silam û hurmet. Bi Jin Jiyan Azadiy reyde bi umudê awakerdişê sibarojê azadan….”