Rabîa Onver

 

COLEMÊRG - Sîbel Çapraz ya ke xoverdayîşê îdareyo xoser yê Geverî de birîndar bî û 18 aşman bi hawayo birîndar tepişte mend û di serran cezaya zîndanî ci rê ameye birnayîş nika ÎHDyê Colemêrgî de têkoşîn dana. Sîbele vat: “Ez qet têkoşînê cinîyan, aştî û azadî, pawitişê cinîye fek vera nêdana.”

 

Cinîya bi nameyê Sîbel Çapraze qezaya Colemêrgî ya Geverî de wextê xoverdayîşê îdareyê xoserî de 28ê teşrîna peyêne ya 2015î de mil û pîzeyê xo ra birîndar bibî. Sîbele seba dermankerdişî sewqê nêweşxaneyê Cigêrayîş û Perwerdeyî yê Wanî ame kerdiş. 20 rojan ameye dermankerdiş û çend amelîyatan ra derbaz bî. Seba dermankerdişî sewqê Nêweşxaneyê Balta Lîmani yê Stenbolî ameye kerdiş. 96 rojan de 15 amelîyatan bîye û hema birînê ame weş nêbîbî bi îdîayê ‘endamîya rêxistine’ ameye tepiştene û erşawîyaye zîndanê Bakirkoyî. Sîbele 18 aşman tepişte mend û dima ra 2 serrî cezaya hepse keyeyê aye rê ame birnayîşe. 

 

Sîbele têkoşîno ke 2015î da ajansê ma rê ercnaye.

 

Birîndarî nîm saete erd de ameye vindarnayîş

 

Sîbele vat ke xoverdayîşê îdareyê xoser de hemverê şerî de çalakîya vengvetişî pê ameye û aye zî tewrê çalakîyan bîya. Sîbele vat ke aye wext panzêran ra gule ameyî reşênayîş û domnaye: “Her ke hema reyêk de rema. La gule ginabî mi ro. Mi ferq nêkerd. Mi serê xo de çeqê adirî dî la mi nêzanayêne ke ez birîndar bîya. Ez kewta erdî, mi hewl da ke ez wirza. Mi aye wext ferq kerd. Ez hema erdî de bîya gule ameyêne rijinayîş. Kesê dormeyê mi remayî hetêk. Demêko derg ez erd de menda. Vengê çekan vera kesêk nizdî nêbîyêne. 20 deqe vîyart bî, hema ez bi birîndarî erdî de dergkerde bîya. Wexto ke şar mi erdî de dî, çalakîya xo bi vengêko berz gird kerd.”

 

‘Tê dima amelîyat’

 

Sîbele da zanayîş ke çime xo nêweşxaneyî de akerda û wina deg kerd: “TEM bi taybetî mi ser de vindert. La keyeyê mi hewl da ke mi tena vera nêdo. Ê zî bi israr keyeyê mi vetêne teber. Ez 5 saet amelîyatî de menda. Pîze û milê xo ra birîndar bîya. Loqereyê mi zirar dîyî. Parçeyê şarapnelî heta qesebaya mi şîbî. Milê mi temamî parçe bîbî. Ez berda nêweşxaneyê Wanî. Polîs û panzeri zî ma reyde bîyî. Ez tê dima xeylê ameyîtana bîya.”

 

Walîtîye sey terorîst îlan kerde

 

Sîbele dîyar kerd ke walîyê Colemêrgî aye sey terorîst îlan kerdo û coka ra polîsî temamê demê dermankerdişî de bi vatişan aye tacîz kerdî û vat: “Loqereyê mi teber de bî. Ez nêeşkayêne rayîr şêra. Kesêk nêeşkayêne dekewo zerre. La polîsî hewl dayêne ke dekewê zerre. Nê tacîzî hertim dewam kerdêne. Timî mi dayêne cipersayîş. 27 roja ra dima Nêweşxaneyê Cigêrayîşî yê Perwerdeyî yê Wanî de menda. Uca ra ez ez sewqê Nêweşxaneyê Balta Lîmanî yê Stenbolî ameya kerdiş. Dejê mi zêde bî. Ez şîya nêweşxane, doktoran senî mi dîyî şaş mendî. Vatî ‘çi bi to ame’. Her cayê mi birîn bî. 3 aşman ez Balta Lîmanî de menda. O proses zaf zehmetin bî. Mi amelîyatê giranan derbaz kerd. Gamê dermanerkerdişî de tabî tacîzê polîsan reyde xeylê reyan ameya rî bi rî.”

 

‘Tena tepiştişê mi mendbî’

 

Sîbele vat ke dermankerdişî ra dima ke ameya taburcîkerdiş ameya destbendkerdiş û wina dewam kerd: “Birînanê xo vera ez fikirîyayêne. Waştêne aye şew bi nezaretxane de biverdê. Mi vat ez newe amelîyatî ra vejîyaya, nêeşkena tîya de bimana. Mi nêweşxaneyan de sey meyman tepiştî. Her çî wina plankerde bî ke tena tepiştişê mi mendbî. Qerar verê cû ameybî dayîş. La qerarê tepiştişê mi mendbî. Wexto ke mi berdêne Zîndanê Bakirkoyî wesayît de adir vejîya. Polîsî hema lez wesayîtî ra vejîyayî, la mi 15 deqeyan ra dima vetî. Şewa verên mi berdî qawişêk. Cayêko leşin bî. Rîskê enfeksîyonî estbî. Nîmeyê şewe dejê mi giran bî. Yew şewe ez zêde xirab bîya. Ez nêzanayêne do senî siba bibo. Serê sibayî mi berdî qawişêk normal. Gardîyanî dermanê mi nêdayî. Mi senî embazanê xo dî ez kêfan ra bermaya. Ê bi raybazanê xo mi baş kerdî. Ez nika baş a û bi wesîleya îna baş a. Têkoşîn her raşteyî de weş o. Tena wa merdim têkoşîn bikero.”

 

‘Têkoşînê xo ÎHDyî de domnena’

 

Sîbele tewr peynî arz ziwan ke 18 aşman tepişte menda û dima ra hepsê keyeyî dîyayo aye û qiseykerdişê xo wina qedênaye: “Hepsê keyeyî 2 serran dewam kerd. 2 serrî de her ke ez şîyêne nêweşxane mi dozgerîye ra destur waştêne. Dermankerdişê mi 4 serran deam kerd. Ez nika Komeleya Heqê Merdiman (ÎHD) de ca gêna û seba tepişteyanê nêweşan têkoşîn dana. Ez têkoşînê xo ÎHDyî de domnena.”