Hesna Mihemed

 

ŞEHBA - Cinîyê herêma Efrînî dîyar kerdî ke tecrîdê serê Rayberê PKKyî Abdullah Ocalanî tecrîdê serê komelî yo û wina vatî: “Xebat û têkoşînê ma tena seba azadîya fîzîkî ya Rayber Apoyî yo.” 

 

Rayberê PKKyî Abdullah Ocalanî zîndanê Asayîşê Berz yê Tîpa Fyî yê Îmraliyî de 24 saetan binê tecrîdî de yeno tepiştiş. Sewbîna derheqê Rayberê PKKyî Abdullah Ocalan û tepişteyê ke kişta ci de yê ra 19 aşmî yo xeberêke nîna girewtiş. Bi cezaya dîsîplînî ke 6 aşman de reyêk yena dayîş pêvînayîşê keye û avûkatan yeno astengkerdiş.

 

Derheqê tecrîdê girankerde de Îdareyê Meclîsê Keyeyanê Şehîdan yê Herêma Efrînî Xedîce Îbo, Îdareyê Dezgehê Cinîyê Şehîdan yê Herêma Efrînî Fatîmê Remadan û Nisrîn Cima ke mêrdeyê xo şer de vînî kerdî ajansê ma rê qisey kerdî.

 

‘Ma do xo serê xeta Rayber Apoyî de perwerde bikerê’

 

Xedîce Îbo qiseykerdişê xo de bale ant tecrîdî ser û wina vat: “Sere de ma tecrîdî şermizar kenê. Bîyayîşê ma bi bîyayîşê Rayber Apoyî reyde girêdayeyo. Ma tutanê xo serê fikir û felsefeya Rayber Apoyî de resnenê û coka ra tu reyan no şar teslîmîyet qebul nêkeno û gamêk tepîya nêerzeno. Pêro qanûnanê dinya de kesê bi emirderg ganî zîndanan ra bêrê vetiş, la heta bika Rayber Apoyî her çend ke emre ci pîl bibo zî zindan de xover dano. Demêko dergo ke avûkatî nêşîyî verê Rayber Apoyî. No çîyo şermizarkerdişî yo. Ma do xeta şehîdan û Rayber Apoyî taqîp bikerî û serê xeta înan de xo perwerde û rêxistin bikerê.” 

 

'Seba azadiya fîzîkî ma xover danê’

 

Fatîmê Remadane hêzê komplogerî yê ke tecrîdê serê Rayberê PKKyî Abdullah Ocalanî giran kenî şermizar kerd û vat: “Ma heme dewletê ke destê înan komployê mîyanneteweyîye de estê, şermizar kenê. Rayber Apo emirpîl bîyo û pêroyê dinya de kesê emirpîlî qedexeyo ke zindan de bimanê. Wexto ke qala Rayber Apoyî yeno kerdiş kesêk reaksîyon nêmojneno û wayîrê qanûnanê xo zî nêvejîyeno. Ma sey keyeyê şehîdanê azadîye hemverê tecrîdo girankerde de her tim payan ser de bibê û çalakîyanê xo bivirazê ke ma sîstemê Îmraliyî birijnî û Rayberê PKKyî Abdullah Ocalanî azad bikerê. Ma Şehba de xover danê, tena seba azadîya Rayber Apoyî yê fîzîkî.”

 

'Amac birnayîşê fikir û felsefeyî yo'

 

Nisrîn Cimo zî tecrîdê girankerde yê serê Abdullah Ocalanî şermizar kerd û nê çîyan ard ziwan ser: “Tecrîdo tewr giran yê cîhane şexsê Rayber Apoyî de hêzê komplogerî rayra benê. Ganî avûkat û keyeyî şêrî pêvînayîş û xebere bigêrî ke şarî reyde pare bikerê. Bi taybetî avûkatê mîyanneteweyî û yê ke bi nameyê merdiman veng danî, ganî bikewî têgêrayîş mîyan û wayîrê gureyê xo bivejîyî. Rayber Apo seba heqê heme kesan vejîya, tena seba şarê xo kurd nê. Demêko dergo ke ma Rayber Apoyî ra tu xeberêk nêgirewtî. Na rewşe de amac oyo ke ma fikir û felsefeyê ci ra bêrî birnayîş. La tesilî do amancê kamolgeran nêro ca. Ma fek azadîya Rayber Apoyî û fikre ci ra vera nêdanê. Ma bi umudî ke avûkatî şêrî pêvînayîşê Rayber Apoyî. Ma şarê netewê demokratîke do timî seba azadîya Rayber Apoyî mîyanê raşteyan û kuçeyan de vengê azadîye berz bikerê.”