MERKEZÊ XEBERAN - Îdareyê Xoserî yê Demokratîkî yê Şingalî bi wesîleya serrgêra xelisyayîşê Şingalî yê çeteyarê DAIŞî ra eşkerayîyêke da û vat: “Ma sozê Şingalo xoser û azade danî.”

 

Îdareyê Xoserî yê Demokratîkî yê Şingalî bi eşkerayîyêke vist vîrî ke 13ê teşrîna peyêna 2015î de Şingal pê qehremanîye û têkoşînê bîlî çeteyanê DAIŞî ra ame xelisnayene. Îdareyê Xoserî yê Demokratîkî yê Şingalî bi wesîleya 7. yê serrgêra xelisyayîşê Şingalî eşkerayîyêke da û wina vat: “Na hemle bi serkêşîya hêzê YBŞyî, gerîlayê azadîye û şevenanê YPG-YPJyî ameye averberdiş. Şingal raşte bi raşte, keye bi keye û gam bi gam ame xelisnayîş. Ma sere de kesê ke na hemleya xoverdayîşî de şehîd bîyî bi rêzdarî vîr anî û sozê awankerdişê Şingalo xoser û azade danê.”

 

Xîyanetê PDKyî 

 

Eşkerayîye de ame vatiş ke hemwelatijê Şingalî zincîrê koletîye şikitî û ame vîr vistiş ke hêzê girêdayeyê PDKyî wextê hêrişê çeteyanê DAIŞî yê hemverê Şingalî de remayî. Dewamê eşkerayîye de nê çîyî ameyî vatiş: “PDK xeta xo ya xîyanetî domneno. Hemleya azadkerdişê Şingalî de zî waşt ke na xeta xîyanetî dewam bikera.”

 

Hêrişî dewam kenê

 

Eşkerayîye de ame vîrvistiş ke PKD û Tirkîya serra 7. ya xelisnayîşê Şingalî de hêrişê xo dewam kenî û wina ame vatiş: “Dewleta tirke hem hêrişê Êzidîyan kena, hem zî hêrişê gerîlayananê azadîye kena. Sewbîna gerîlayê azadîye yê ke xelisnayîşê Şingalî de rolê xo karkerdî, ewro hetê dewleta tirke ra yenê hedefgirewtiş. Serrgêra xelisnayîşê Şingalî de ma soz danî şarê xo û şehîdanê xo ke bedele ci çina beno wa bibo ma do Şingalo azad û xoser awan bikerê.”