MERKEZÊ XEBERAN - Partîya Çepgira Swêdî hemverê caardişê çekanê kîmyewîyan yê hetê dewleta Tirke ra kampanyayêke bi nameyê "Ti zî vengê xo berz bikere” da destpêkerdiş.

 

Hêrişê dewleta Tirke yê hemverê başûrê Kurdistanî dewam kenê. Seranserê Kurdistan û dinya de nêrazîbîyayîşê hemverê caardişê çekanê kîmyewîyan yê hetê dewleta Tirke ra dewam kenê. Bi nê minasebetî Partiya Çepgire ya Swêdî seba bale bianca serê sûcê şerî yê bi madeyê kîmyewî ke herême de yenê şuxilnayîş, kampanyayêke bi vîdeo da destpêkerdiş.

 

Vervatoxa Partîya Çepgire ya Upsalayî Ylva Larsdotter vat: “Ma wazenê bi nê vîdeoyî bala şima biancê. Raporî estê ke vanê Tirkîya bi madeyê kîmyewî sûcê şerî kurdan rê kena. Ti zî vîdeoyêke biance û serê medyaya dîjîtale de vengê xo bide eşnawitiş.”

 

Hetkarê Yewin ê Şaredarê Bajarê Girdî Tobîas Smedberg zî wina vat: “Dewleta Tirke 39 serrî yo operasyonê îşxalkerdişî yê leşkerî kena û nika zî  raporê şuxilnayîşê kîmyewî yenê verê destê ma. Na rewşêke xeylêk giran a û ganî bala dinya bianco.”

 

Parlamentera Îlona Szatsmari Waldau wina dîyar kerd: “Ganî serê raporan de bêro vindertiş. Şuxilnayîşê çekanê kîmyayîyan sûcêkê şerî, sûcêkê hemverê merdimayî yo û sûcêkê huqûqê mîyanneteweyî yo.”

 

Endama Heyetê Îdarekarî ya Partîye, Yekbûn Alp zî nê mesajî da: “Partiya Çepgire huqûqê mîyanneteweyî û heqê Şarê Kurdî pawena. Sûc tena bi bêvengîye yenê kerdiş û yenê xovîrrakerdiş. Coka şima zî vengê xo berz bikerê.”