Rabîa Onver

 

COLEMÊRG - Cinîya bi nameyê Pîruze Dundare hemverê krîzê ekonomî û vayeyanê ke yenê kerdiş de hewl dana ke debara keyeyê xo bikera û dîyar kerd ke mîyanê aşme de tu çîyêk deste înan de nêmaneno.

 

Îqtîdarê AKP-MHPyî seba ke heme çimeyan şerî rê cîya keno krîzê ekonomî her ke şino hîna xorî beno û vayeyê ke yenê kerdiş hêzê herînayîşî yê şarî fîneno war. Qet şik çino ke tewr zêde krîzê ekonomî ra tewr zêde cinî tesîr benî. Cinîyê ke krîzî ra tesîr benî ra yew zî Pîruze Dundara ke qezaya Şemzînanî ya Colemêrgî de cuyena ya.

 

Pîruzeya ke 15 serrî yo Şemzînan de cuyena seba ke debara keyeyê xo bikera roje şina pakîya keyeyan û şandî zî sayê baxeyê xo arê dana û kena huşk. Pîruzeye sayê ke kena huşk roşena û pê înan debara keyeyê xo kena. Pîruzeye ard ziwan ke her gure mile aye ser de yo û reyna zî nêeşkena debara xo bikera.

 

‘Lajê mi mecbur mend mektebî ra fek vera bido’

 

Pîruzeye dîyar kerd ke verê cû dewa Şemzînanî de cuyayêne la bado ke keyeyê înan veşayo, dima ra kesêkî ra hetkarî nêdîyî û coka ra mecbur menda ke koçê bajarî bikera. Pîruzeye qiseykerdişê xo de wina vat: “Wexto ke ma ameyî bajar mêrdeyê mi xebetîyayêne. Tay bibo zî qîmê ma kerdêne. Dim ara kriz giran bî, her çî vaye bî. Lajê mi yo 16 serre krîzê ekonomi ra mecbur mend mektebî ra fek vera bido. Lajê mi mêrdeyê mi reyde lokanta de xebetîyeno. Ma 8 kesî. Ma 3 kesî xebetîyenî la ma nêeşkenê debaran xo bikerî. Hema mîyanê aşme de tu çîyêk deste ma de nêmaneno.”

 

‘Pereyo ke ma gênî mird nêkeno’

 

Pîruzeye dewamê qiseykerdişê xo de înan ard ziwan: “No 2 serrî yo ke ma zêde zehmetî ancenî. Coka ra ez şona kar. Ma çend bixebetî zî nêeşkenê debara xo bikerî. Ez şona pakîya keyeyan. Ez sayê baxçeyê cîranan arê dana, huşk kena û roşena. Pereyo ke ma gênî mird nêkeno. Mêrde û lajê mi 4 hezar TL gênî. Ez roje de 300-400 şona pakî. La ez qaseyê keda xo nêgêna. Ma serê sibayî ra heta şewe payan ser de yî. Ma nêeşkenê debara xo bikerî. Keda cinîyan zî sey camêrdan nîna dîyîş.” 

 

Pîruzeye tewr peynî vat: “Senî ke camêrd xebetîyenî cinî zî xebetîyenî. Cinî her donemî de ameyî pelçiqnayîş. Keda înan nîna dîyîş. Ma seba ke keda ma bêra dîyîş têkoşîn kenî. Wa cinî tu cayêk de nêrî erdfînayîş. Cinî kedêka gird adnî. Ez veng dana heme cinîyan ke wa qet têkoşînê xo ra fek vera nêdî.”