Marta Somek

 

STENBOL - Avûkata Rayberê PKKyî Abdullah Ocalanî ke 10 serrî yo nêeşkena ci reyde pêvînayîş bikera Asya Ulkere vengê muracatê pêvînayîşî da pêro huqûqnasan û vat: “Ma sey avûkatan wazenê ke heqê xo yê qanûnî pê bîyarî û no wezîfeyê ma yo.”

 

Rayberê PKKyî Abdullah Ocalano ke zîndanê Asayîşo Berz yê Tîpa Fyî yê Îmraliyî de 24 saetan binê tecrîdî de yeno tepiştiş û tepişteyê ke verê ci de yî ra 19 aşmîyo xebere nîna girewtiş û bi cezayanê dîsîplînî pêvînayîşê keye û avûkatan ke 6 aşman de ereyêk reno dayîş, pêvînayîş yenî astengkerdiş. 

 

775 huqûqnasî waştî bi Abdulah Ocalan reyde pêvînayîş pê bîyarî

 

Seba ke Abdullah Ocalan û tepişteyanê bînan ra xebere nîna girewtiş rêxistinê huqûqî kewtî têgêrayîş mîyan. Mîyanê înan de Komeleya Huqûqnasanê Azadan (OHD) zî esta û rêxistinê huqûqî seba ke Abdullah Ocalanî reyde pêvînayîş pê bîyarî kampanyaya îmzeye dayî destpêkerdiş. 775 huqûqnasê 29 baroyan seba pêvînayşê bi Ocalanî reyde îmze dayî û 10-17ê Hezîrane de muracatê Wezîrîya Edaletî kerdî. La wezîrî hema zî cewabêk nêdaya.

 

Derheqê babete de Avûkate Asya Ulkera ke mabenê serranê 2001 û 2011 de avûkatîya Abdullah Ocalanî kerda û 11 serrî yo nêeşkena pêvînayîş bikera qisey kerd.

 

‘Seba berdişê girawe binê tecrîdî de yo’

 

Asyaye da zanayen ke roja ke Ocalanî berdî girawe ra nata Ocalan binê tecrîdî de yo û wina vat: “Tecrîd şîyayîşê ci ra nata esto. La hende giran û derg nêbî. 2001î de mi Birêz Ocalanî reyde pêvînayîş pê ard. 2002î ra dima bi bahaneyanê muxalefetê hewayî, xirabîyayîşê kosteran pêvînayîş ame astengkerdiş. Aye wext qedexeyê pêvînayîşî yê tewr derg aşmêk bî. Dima ra reyna pêvînayîş ameyêne kerdiş. Heta 2011î de bi bahaneyanê muxalefetê hewayî û xirabîyayîşê kosteran pêvînayîş ameyî astengkeridş. La reyna zî pêvînayîş teqez pê ameyêne.”

 

Astengîyî kêfî û sîyasî yê

 

Asyaye dîyar kerd ke serranê ewilan de saetê pêvînayîşî zêde bî û vat: “Nimune 2-3 rojê hewteyî ma şîyêne û heta 2 saetan pêvînayîş dewam kerdêne. Dima ra ameyî sînorkerdiş, pêvînayîşê avûkatan fînayî rojêk û saetêkî. 2005î de bi bedelnayîşê qanûnî pêvînayîşê avûkatan de wezîfedarêk hadke kerdî. Verê cû çîyêko wina çinî bî. Goreyê qanûnê huqûqî pêvînayîşê avûkatan ê bi muvekîlanê xo reyde ganî nimite bibo û kesêk verê înan de çinî bo. Tecrîd her ke şino giran beno. La no di serrî yo rewşe xeylê giran bîye. No bi huqûqê mîyanên û mîyanneteweyî nîno vatiş. Tu hetê ci yê huqûqî çinî yo. Na rewşe temamî kêfî û sîyasî ya. Xora ewja de yew kes maneno, 3 embazê ci hucreye yew kesîye de manenî. Xora avûkat û keyeyan reyde pêvînayîş nêkenî. Acaba nê kesî do çiyê hemverê dîsîplînî yê senî bikerî. Bi cezayanê îdarî nêeşkenê azadîya merdimi asteng bikerî. Tu hetê ci yê huqûqî çinî yo.”

 

Seba CPT vengdayîş

 

Asyaye veng daye CPTyî û qiseykerdişê xo wina dewam kerd: “Ganî seba Ocalan û embazanê ci yê hetê ci de yî, goreyê heqê merdiman bêro têgêrayîş. Ganî CPT na babete de rolê xo kay bikero. Ganî goreyê desturê dewletan tênêgêro. Çîyo ke CPTyî ra yeno pawitiş no yo. Na babete de wezîfeyê CPTyî oyo ke cigêrayîşê xo bikero û na babete de malumatan bido. Ez veng dana CPTyî ke wa wezîfeyê xo bîyaro ca. Ganî dezgehê huqûqî yê mîyanneteweyî bikewî têgêrayîş mîyan. Ganî raybazê huqûqî yê gerdunî pê bêrî. Na babete de wezîfe kewena mile dezgehan ser.”

 

‘Ma pêvînayîş wazenê’

 

Asyaye bale ant muracatê 775 avûkatan ser û wina domnaye: “Ganî derheqê qedexeyê pêvînayîşî de avûkatan rê xebere bêra dayîş.  Ganî seba kesan heqê pawitişî û seba avûkatan heqê îtîrazî bêro dayîş. Avûkatê Buroyê Huqûqî yê Asrî bi serkêşîya 775 avûkatan muracatê pêvînayîşî pê ardî. No xeylê muhîm o. Mi zî îmze eşt. Ez zî nê avûkatan ra yew a. Hemverê teberhuqûqîyan ganî her kes hîssin bibo û muracatan bikero. Sere de seba Ocalanî huqûq pê nîno. Ma rewşêka teberhuqûqî reyde rî bi rî yî.”

 

Seba huqûqnasan vengdayîş

 

Asyaye tewr wina vat: “Dezgehê sey CPT û DMMEye binê tesîrê sîyasî de manenê. Bi hawayêko huqûqî tênêgêrenî. Vişêrê înan eşkîyeno buroyê huqûqî yê sivîl û dezgehan reyde kampanya bêra viraştiş. Ganî tewrbîyayîşê kesan û hetan yê seba kampanya pê bêro. Coka ra teberêhuqûqî zêde yo, her kesî hewêneno. Ez veng dana heme huqûqnasan ke hemverê tecrîdî de bêveng nêmanî.”