Şehrîban Aslan

 

AMED - Avûkat Resul Temur derheqê 26 rojnamegerê ke ameyî tepiştiş de qisey kerd û vat ke îdianameyê înan hema zî nêameyî hadrekerdiş û domna: “5 aşmanê peyênan de vanê ‘derheqê metaryalan de ma cigêrayîş nêqedênayo’ û no zî yeno no mana ke hewl danê derheqê dosyayî de delîlanê surprîzan virazê.”

 

8ê hezîrane de çarçeweya operasyonê qirkerdiş sîyasîyî de 20ê înan rojnamegerî 22 kesî ameyî destbendkerdiş. Kesê ke ameyî destbendkerdiş derheqê dosyayanê înan de qerarê tengkerdişî ame girewtiş û ê hucreyanê yewkesan de ameyî cakerdiş.”

 

Rojnamegeran ra Mudira JINNEWSî Safîye Alagaş, Hemserekê Komeleya Rojnamegeran ya Dîcle Firatî (DFG) Serdar Altan, Mudirê Karanê Nuştişî yê Rojnameyê Xwebûnî Mehmet Alî Ertaş, edîtorê Xwebûnî Zeynel Abîdîn Bulut, edîtorê MAyî Azîz Oruç û Omer Çelîk, Suat Doguhan, Ramazan Geciken, Esmer Tunç, Neşe Toprak, Mazlum Dogan Guler, Mehmet Şahîn, Elîf Ungur, Îbrahîm Koyuncu, Remzîye Temel, Mehmet Yalçin, Abdurrahman Oncu, Lezgîn Akdenîz û Kadir Bayram bi îdiaya “Endamtiya rêxistine” ameyî destbendkerdiş. Sewbîna rojnameger Gulşen Koçuk, Esmer Tunç, Mehmet Yalçin, Kadîr Bayram, Feynaz Koçuk û Îhsan Ergulen zî bi şertê kontrolê edlî ameyî veradayîş. 

 

Sewbîna Çarçewa tehqîqatêkê Serdozgerîya Komare ya Anqara de 25ê teşrîna verêne de Mudira Karanê Nuşteyî yê Ajansê Mezopotamya (MA) Dîrene Yurtsever, muxabîrê MA Denîz Nazlim, Selman Guzelyuz, Zemo Aggoz, Berîvan Altan, Hakan Yalçin, Emrûllah Acar, Ceylan Şahînlî, muxabîrê JINNEWSî Habîbe Eren û Oznur Gunhan û stajyerê MA Mehmet Gunhan bi îşkenceyî ameybî destbendkerdene. Zemo Aggoz îfade ra dima vera dîyabi. Xeber û karê înan ê rojnamegerîye, vilakerdişê înan ê medyaya dîjîtale sey unsurê sûcdarîye pêşkêşê rojnamegeran ameyî kerdene. Îfadeyan ra dima Dîren Yûrtsever, Bêrîvan Altan, Denîz Nazlim, Selman Guzelyuz, Hakan Yalçin, Ceylan Şahînlî, Emrullah Acar, Habîbe Eren û Oznûr Deger bi îdîaya 'endamîya rêxistine' ameyî tepiştene. Stajyer Mehmet Gunhan bi şertê kontrolê edlîyî vera dîya.

 

Avûkat Resul Temur derheqê 26 rojnamegerê ke ameyî tepiştiş de qisey kerd û îdianameyê ke rojnamegeran ke hema zî nêameyî hadrekerdiş de ercnayîşan kerd.

 

‘Mîyanê hewldayîşê dîyîşê delîlan de yê’

 

Resulî da zanayîş 5 aşmîyo derheqê rojnamegeran de îdianame hema nêameyo hadrekerdiş û derheqê dosyayî de tu malumat çinî yo: “Tena rojnamerê tepişte nê, avûkat û rayapêroyî zî nêzanê ke qey rojnamegerî ameyî tepiştiş. Bi çina yenê sucdarkerdiş nîno zanayîş. Wexto ke operayonê destbendkerdişê rojnamegeran ame kerdiş esasê xo de operasyonî ra ver tay falîyetî ameybî kerdiş û dima ra ameyî destbendkerdiş. Vera 5 aşmê ke vîyartî de îdianame nêameyî hadrekerdiş û no zî mojneno ke hedefê înan tersnayîşê çapemenya kurdî yo. Peynîya 5 aşman de vanê ke ‘derheqê metaryalan de ma cigêrayîş nêqedênayo’ û no zî yeno no mana ke hewl danî derheqê dosyayî de delîlanê surprîzan virazê.”

 

‘Do çîyo ke bibo sûc nêvînê’

 

Resulî ard ziwan ke çîyo ke yeno muhakemekerdiş û cigêrayîşkerdişê falîyetê rojnamegerîye yê rojnamegerê kurdî ke rayra benê yo û dewam kerd: “Vîşêrê înan falîyetêk teberê qanûnî û delîlêk bêqanûnî nêameyo dîyîş. Cigêrayîş de kompîtur, makînayê fotografî, kamera, hard dîskî kerdî sey delîlê sûcî hesibnayî. Vîşêrê malzemeyanê rojnamegerîye do tu çîyêk sey sûcî nêvînê. Hema îdianameyê rojnamegeran nêameyo hadrekerdiş de Anqara de operasyon pê ardî. 12 rojnamegerî ameyî destbendkerdiş. di heb bi kontrole şertê edlî ameyî veradayîş û 10 hebî zî ameyî tepiştiş.”

 

‘Îşkenceyo ke ameyo plankerdiş esto’

 

Resulî dîyar kerd ke Mudirîya Asayîşî ya Anqara seba ke keyepelê xo yê Twîtterî de pare bikera îşkence û caardişê xirabî bi rojnamegeran kerda û wina vat: “Vejîya raşte ke bi plankerde ameyo kerdiş. Qet şik çino ke nê caardişî tena planêk nêbî. No seba tersnayîşê rojnamegeran ame kerdiş. No dîmenê çimtersnayîşî bî. Îşkence de tena wextê destbendkerdişî de nêame kerdiş. Asayîş de zî eynî teda û îşkence bi rojnamegeran ame kerdiş. Edlîye de zî bi kelemçekerde ameyî vindarnayîş. Bi kelemce vindarnayîşê înan binpaykerdiş o.”

 

Resulî tewr peynî vat ke bado ke rojnamegerî xeylê ameyî vindarnayîş îfadeyê înan ame girewtiş û wina qedêna: “Persê îna zî wina bî; Şima JINNEWS û MAyî de xebetîyenî ya nê. Her çend ke JINNEWS û MA falîyetê xo bi hawayêko fermî bikerî zî dozger û asayîş sey ‘qaşo ajans’ ercnayî. Sewbîna derheqê rojnamegerê ke Amed de ameyî destbendkerdiş de roja îne ya verên de cigêrayîşê tepiştişî ame kerdiş. Cigêrayîş ra dima derheqê dewamkerdişê tepiştişan de qerar ame dayîş. Îtîrazê derheqê qerarî hema netîce nêgirewt. Ma avûkatê rojnamegerê ke Anqara de ameyî tepiştiş, muracatî kerdî la hema zî netîceyêk nêame girewtiş. Îhtîmal esto ke do no hewteyo vernîya ma netîce bêro dayîş.”