Qeder Kar

 

MEXMÛR - Rojnamegerê Wargehê Mexmûrî reaksîyon vera xebatkarê Çapemenîya Azade ya Kurdan mojnayî û vatî ke ê do serê rêça heqîqetî de rayîr ra şêrê.

 

Çarçewaya cipersayîşê ke Anqara de ame destpêkerdiş de netîceyê sereştişê keyeyan ke degirtin 9 bajaran de ame kerdiş de 11 rojnamegerî ameyî tepiştiş. 11 rojnamegeran ra muxabîra JINNEWSî Habîbe Eren, Ozgur Deger, Midûra Karê Nuşteyî yê Ajansê Mezopotamyayî (MA) Dîren Yurtsever û muxabîrî Berîvan Altan, Denîz Nazlîm, Selman Guzelyuz, Ceylan Şahînli, Emrullah Acar û Hakan Yûz zî mîyan de 11 rojnamegerî ameyî tepiştiş. Reaksîyonê hemverê rojnamegeran sere de hetê rojnamegeran û sazgehanê çapemenîyan û hetê xeylêk hetan ra dewam keno. Wargeha Şehîd Rûstem Cûdî (Mexmûrê) de zî rojnamegeran reaksîyon vera tepiştişê meslegdaranê xo mojnayî.

 

‘Kesê ke rayberî kenê benê hedef’

 

Rojnamegere Jiyan Pîran destpêkê qiseykerdişê xo de bale ant serê polîtîkayê qirkerdişî yê hemverê Şarê Kurdî û vat: "Eke ma şerê hemverê kurdan biercnê, tena vakurê Kurdistanî de nê bi pêroyî hemverê temamê Kurdistanî de siyasetêkê qirkerdiş û çinkerdişî yeno kerdiş. Bi xususî akademîsyen, roşnvîr û rojamegeran rê kesê ke rayberîyê komelî rê kenê ke wazenê vengê Şarê Kurdî biresnê teberê Kurdistanî hedef yenê girewtiş. Semedo ke Şarê Kurdî bêveng verdê, semedo ke têkoşînê Kurdistanî de yeno kerdiş, asteng bikerê bi xususî rojnamegerê vakurê Kurdistanî esîr girewtî. Xeberan de hedef ameyî mojnayîş û ameyî sansûrkerdiş. Bi bêvengkerdişê rojnamegeran, sîyasetmedaran û roşnvîrê kurdî de qirkerdiş û çinkerdiş dewam keno.”

 

‘Têkoşînê ma do heta peynî dewam bikero’

 

Jîyane, da zanayîş ke do paştdayîşê seba xoverdayîşê rojnamegeran dewam bikero û wina vat: “Ez zî seke rojnamegerêke kürde seba xo resnayîşê rastîyê bîyaye û neqlkerdişê heqîqetê Kurdistanî têkoşîn bikerî. Ma do neqlkerdişê rastî yê şerî ke hemverê qirkerdiş û çinkerdişê Kurdistanî yenê kerdiş û eynî wextî de xoverdayîşê ke cinî kenê, dewam bikerê. Serê fikrê azadîya cinî, têkoşînê cinî, pawitişê xoza û pawitişê heqê merdiman ma do heta peynî xo biresnê rastî bîyaye û vilayê temamê dinya bikerê.”

 

‘Bêvengî tesdîqkerdişê sucdarkerdişî yê bîyaye yo’

 

Jîyane, dîyar kerd ke Kurdistanî şerêk yeno kerdiş û wina vat: “Seke yeno zanayîş hêrişêkê hîra serê Kurdistanî de yeno kerdiş. Tena serê rojnamegeran de ney, serê pêro şarê kurd û gerilayê azadiya Kurdistanî de yeno kerdiş. Bêvengîya Şarê Kurdî yê hemverê nê hêrişan do heta key dewam bikero. Lazim o hemverê her tewir hêrişan û qirkerdişê Şarê Kurdî xoverdayîşêkê  topyekun bêro kerdiş û ganî şar bikewo wareyan. Êdî dem demê têkoşinê hemverê zulmî yo.”

 

‘Xoverdayîş zorê dişminî beno’

 

Rojnamegere Bêrîvan Tunçe zî destpêkê qiseykerdişê xo de bale ant serê babetê ke rojeve de yê û wina vat: “Seke yeno zanayîş, ma serdemê ke bîyo serdemê şorişê cinîyî de ciwîyenê. Sewbîna şerê ke temamê Kurdistanî de yeno kerdiş, merdim her sanîye ê şerî ciwîyeno. Bi xususî tecrîdo ke Îmraliyî de yeno dewamkerdiş, tecrîdê serê Rayberê Şarê Kurdî Abdullah Ocalanî û binpaykerdişê heqê tepişteyan, ewro sewîyeya tewr xidar de dewam keno. Wazenê vengê Rayberî bibirnê. Semedo ke şerê înan yê hemverê Rayberî nêresa netîce, na rey zî hêrişê şarî û Herêmê Pawitişê Medya kenê. Aşma nîsane ra heta nika her tewir hêrişê gerilayê azadîye kenê û bi çekanê kîmyewîyan hêriş kenê. Xoverdayîşê bêhempa yê gerilayê azadîye bi sebebê vînîkerdişê hêrişkaran.”

 

‘Seba ke vengê komelî qut bikerî hêrişê çapemenîye kenê’

 

Bêrîvane dewamê qiseykerdişê xo de qala şerê ke Kurdistan de yenê rayraberdene kerd û wina vat: “Wexto ke ma ewnîyenê hêrişê ke hemverê Kurdistanî de yenê kerdiş, ma vînenê ke hedef bêvengkerdişê Şarê Kurd û cinîya kurdî yo. Nêrazîbîyayîşê hemverê tecrîdê serê Rayberê Şarê Kurdî dewam keno, seba astengkerdişî na rewşe zî hêrişê çapemenîya azade kenê. Wexto ke ma ewnîyenê çapemenîya cîhane, bi taybetî çapemenîya Tirkîya û çapemenîya hetgir, ma vînenê ke dewlete babetanê sey sîyasî, ekonomî û goreyê menfîetê îqtîdarî benê xeber. Seba ke şarê xo çîyê ke qewimîyenî ra bêxebere vera bido, babetanê cîyayan yê ke rojeve ra dûrî yî û merdiman meşgul kenî, keno xebere.”

 

 ‘Şorîşê cinîyan heme cîhanî de bî vila’

 

Heto bîn de Bêrîvane da zanayene ke Şarê Kurd her daîm mîyanê xoverdayîşî de yo: “Şarê Kurd her cayo ke tede cuyeno de werişto payan ser û her tewir çalakîyan domneno. Hemverê çalakî û vengê şarî de hêrişê rojnamegeran kenê. Bi taybetî Rojhelatê Kurdistanî û Îranî de şorişo ke bi serkêşîya cinîyanê kurdan vejîya û bi slogan û felsefeya ‘Jin, Jîyan, Azadî’ vilayê pêroyê dinya bî seba ke bêro astengkerdiş hêrişê cinîyan kenê. Îqtîdar nêwazeno cinîyê ke Rojhelatê Kurdistanî û Îranî de cuyenî sere wedarnê û bibî îlhamê serewedarnayîşî yê cîhane. Coka ra zî her tewir hêrişan benê cinîyan ser. Hemverê serewedarnayîşê Rojhelatê Kurdistanî û Îranî de embazê ma rojnameger û aktîvîsta Jineolojiyê Nagîhan Akarsele ameye qetilkerdiş."

 

‘Ma do şopê heqîqetî ra şêrê’

 

Bêrîvane qiseykerdişê xo wina qedênaye: “Ma sey rojnamegeran karê ke bikewenê serê milê ma do bikerê. Ma hemverê her tewir hêrişan de bi viraştişê xeber, dosya û xebatanê xo do cewab bidê. Ma do heta peynî raştîyan biresnê şarî û serê şopê heqîqetî ra şêrê.