Sema Çaglak

 

ŞIRNEX - Komeleya Ziwan û Kulturî ya Birca Belek seba muracatanê neweyan yê perwerdeyîya ziwanê Kurdî dest bi qeydan kerd. Rayîrberîya Komeleye ra Fatma Gîzleyîcîye dîyar kerd ke pawitişê ziwanê Kurdî berpirsyarîya ma heme kurdan o.

 

Komeleya Ziwan û Kulturî ya Birca Beleke serra 2018î de seba perwerdeyîya ziwanê Kurdî û averberdişê kultur û hunerê kurdî qezaya Cizîrî ya Şirnexî de ame awankerdiş. Komele aye roje ra nata xebatanê xo yê seba kultur û ziwanê dewam kena. Komele seba muracatanê neweyan yê perwerdeyîye dest bi qeydan kerde. Perwerdeyî do bi zarawayê Kurdî Kurmancî de seba her kesî bêro dayîş. Derheqê babete de rayîrber û mamosteya ziwanê Kurdî Fatma Gîzleyîcîye qisey kerd.

 

‘Ma do hewl bidî vernîya asîmîlasyonî bigîrê’

 

Fatmaye dîyar kerd ke ê hewl danî Botan de vernîya polîtîkaya asîmîlasyonî bigêrî û wina vat: “Ma aşmêk verê cû kongreya xo ya asayî pê ard. Ma do na çarçewe de tewir bi tewir xebatanê xo yê seba ziwan û kulturî rê dewam bikerê. Bi serran o ziwanê ma wedexe yo û seba ke ma bi ziwanê xo qisey nêkenê polîtîkayê cîya cîyayî yenê rayraberdiş. Amacê komeleya ma pawitişê ziwanî yo. Ma do kesê ke bêrî komeleye û qeydê xo virazî, biwazî kultur û ziwanê xo bimusî rê bibî hetkar. Hewldayîşê şarî, komel payan ser de verdeno.”

 

‘Ganî şarê ma ziwan û kulturê xo bişinasno’

 

Fatmaye da zanayîş ke perwerdeyîya bi ziwanê dayîke seba înan mertalê pawitişî yo û qiseykerdişê xo wina domnaye: “Ganî ma ziwanê xo ser de bivinderî û ziwanê xo biresnî her raşteyê komelî. Serranê peyênan de bi taybetî ciwanî ziwanê kurdî ra dûrî kewtî. Ciwanan ser de polîtîkaya asîmîlasyonî her ke şina zêde bena. Verê cû her kuçe û raşteyî de tutan û ciwanî bi ziwanê xo qisey kedêne, la demê peyênan de na rewşe wels bî. No qelsbîyayîş seba ma tehluke yo. Coka ra dayîşê perwerdeyîya bi ziwanê kurdî xeylê muhteşem o. Ganî şarê ma ziwan û kulturê xo bişinasno. Eke ma ziwan û kulturê xo ra dûrî bikewî ma do bîyayîş û nasnameyê xo ra zî dûrî bibî. Ganî keye zî bibî sey mekteban û keyeyî hem kulturê xo û hem zî ziwanê xo bimusnê domananê xo.”

 

Seba qeydê perwerdeyîye vengdayîş

 

Fatmaye qiseykerdişê xo yê peyênan de seba qeydê perwerdeyîya ziwanê kurdî veng da û vat: “Ma wazenê ke şarê Botanî û taybetî zî cinîyê Cizîrî bêrê seba perwerdeyîya ziwanî qeydê xo virazî û babeta pawitişê ziwanî de wezîfeyê xo bîyarê ca. Ma do sere de perwerdeyî bidê tutan, ciwan û kesê ke biwazê ziwan û kulturê kurdî bimusê. Ma sey komele çîyo ke keweno milê ma serî rê hadre yê. Perwerdeyîya ma sewîyeya destpêkerdişî yê yewine, diyîne, hirîne û tewr peynî asta mamostatîye de qedîyena. Her sinif 20 kesan rap ê yeno. Wexto ke 20 muracatî debenê, ma cade sinif akenê. Ma paweyê şima yê.”