Marta Somek

 

STENBOL - Verfeka TOPî ya Stenbolî Nîlay Kuşe vat ke Tîfaqê Azadî û Kede hemverê polîtîkaya şer û îqtîdarîya AKP-MHPyî de ca gêno û dîyar kerd ke hemverê şerê ke îqtîdar dayo destpêkerdiş de rayîro yewine Tîfaqê Ked û Azadîye yo.

 

Partîya Demokratîke ya Şaran (HDP) 6 partîyê çep-sosyalîstan reyde 24ê êlule de bi nexşerayîro newe ‘Tîfaqê Ked û Azadîye’ îlan kerd û na babete de tîfaq seba şaran bî hêvî û raybazo ‘Rayîro hirêne’ şarî reyde ame deklerekerdiş.

 

‘Polîtîkayêka asayîşî ya îqtîdarî çin o’

 

Nîlaye destpêkê qiseykerdişê xo de vat ke hewl dîyeno ke Tirkîya ser de tabloyêka sîya bêra awankerdiş û wina domna: “Xora polîtîkayêka asayîşî ya îqtîdarî ke pêşnîyazê kedkaran bikero, çin o. Qirkerdişê Bartinî nimûne yo. Îqtîdar seke welat de tu problemêk çin o, vatişanê sey ‘Krîzê ekonomi çinî yo, gure esto la merdim nêwazenê bixebetî’ dano tê dima. Vatişê winasî ke raştî ra zaf dûrî yê, ano ziwan ser û wazeno şarî bawerîya xo pê bîyaro. La şar bawer nêkeno. Çimkî şar êdî cuya xo de raştîyan vîneno. Merdim cuya xo ya rojane ra zano ke vatişê îqtîdarî veng ê” 

 

Butçeya seba şerî 

 

Nîlaye da zanayîş ke îqtîdar hêz û meşrubîyayîşê xo vînî kerdo û wina vat: “Serê probleman gêno û hewl dano ke hêzê xo arê bido. Eksê heme vatişan û polîtîkayanê îqtîdarî raştîya krîzê ekonomî Tirkîya de esta. Ekonomîya Tirkîya nika deste çend kesan de ya û nê kesî serwetê xo zêde kenê. Ma zî her ke şinê feqîr benê. Îqtîdar zano ke o nêeşkeno na vengîye dekero. Feqîran, şar û kedkaran rê butçe çin o. La şerî rê esto.”

 

‘Wazenî herkesî bêveng bikerê’ 

 

Nîlaye reaksîyon mojnaye tepiştişê Sereka Konseya Merkezî ya Yewîya Tabîbanê Tirkan (TTB) Şebneme Korur Fîncanciye ke seba ke waştbi hêrişanê kîmyewîyan ser o cigêrayîş bêro kerdene amebî tepiştene û wina domnaye: “Îqtîdar wazeno vengê ke îtîraz kenê, krîmînalîze bikero û komel bêveng bibo. Kesê ke Stenbol de seba Şebneme çalakî viraştî raştê hêrişê polîsan ameyî. Verfeka Demî Perîhan Koca û cinîyê bînan rê gefê mergî wendî. La ma hemverê nê caardişan de qet sere çewt nêkenê û têkoşînê xo ra fek vera nêdanê.” 

 

Çapemenîya azad nuştişê xo domnena… 

 

Nîlaye bale ant tepiştişê rojnamegeran ser û da zanayene ke tepiştişê rojnamegeran girêdayeyê Qanûnê Sansurî yo û vat: “Rojnamegerê çapemenîya azade vera heme zextan raştîyan nusena. Qet şik çino ke weşa îqtîdarî nêşino. Çapemenîya azade vernîya înan de asteng a. Coka ra hemverê muxalîf û çapemenîya azade de Qanûnê Sansurî vet. Do ser nêkewê. Do nêeşkî çapemenîya azade bêveng bikerê.” 

 

‘Şar eşkeno rayîrê xo bivîno’

 

Nîlaye qiseykerdişê xo wina dewam kerd: “Wazenê deste şarî ra pêro îmkanî bêrî girewtiş. Tîfaqê Cumhur û Mîlletî sey yewbînan ê. Tu garantî û asayîşî nêdanê şarî. Wirdî zî sermaye xurt kenê. Polîtîkaya înan na hete de ya. Verfekîya sermayeyî kenê. Tu hêvî nêdanê şar û kedkaran. Ma vanê ke şima eşkenê rayîrê xo awan bikerê. Rayîro yewine zî Tîfaq Azadî û Kede yo. Ma hedef kenê ke şarî reyde polîtîka awan bikerê. Tîfaq do demê verênan de bi waştişê pêro hetan programêk xêz bikero û bido vernîya xo.”

 

Tîfaqek, têkoşînî pîya berzkerdiş o

 

Nîlaye tewr peynî wina vat: “Tepiştişê mamosta Şebneme çimtersnayîşê Yewîya Tabîbanê Tirkan o. Eynî wext de çimtersnayîş û gecilnayîşê rêxistinê meslekî û kede yo. Her ke ma bibê yew ê do na mesaje bidê. Tîfaqê Ked û Azadîye tam zî na babete de ekse înan o. Tîfaq, têkoşînêko pîya berz keno. Ma veng danê heme hetan ke ma kiştayewbînan de bibê. Ez vengê berzkerdişê têkoşînê yewbîyaye kena. Tîfaqê Azadî û Kede hemverê polîtîkaya şer û îqtîdarîya AKP-MHPyî de ca gêno û hemverê şerê ke îqtîdar dayo destpêkerdiş de rayîro yewine Tîfaqê Ked û Azadîye yo.”