Nuray Atmaca

 

MERKEZÊ XEBERAN - Akademîsyen Ceren Sozerîye derheqê rojnamegerê ke çarçeweya tehqîqato ke merkeze ci Anqara bî de ameyî tepiştene de qisey kerd û da zanayene ke ganî torê paştîdayîşî pîya bêro awankerdiş.

 

Reaksîyonê hemverê tepiştişê 9 rojnamegeran dewam keno. Akademîsyen Ceren Sozerîye derheqê babete de qisey kerd û vat ke rojnamegerî sûc nîyo û wina vat: “Tedaya hemverê rojnamegeran sere de serê Ajansê Mezopotamya û JINNEWSî de destpêkerd. Dima ra dore do bêro rojnamegeranê bînan.”

 

Çarçewa tehqîqatêkê Serdozgerîya Komare ya Anqara de 25ê teşrîna verêne de Mudira Karanê Nuşteyî yê Ajansê Mezopotamya (MA) Dîren Yurtsever, muxabîrê MA Denîz Nazlim, Selman Guzelyuz, Zemo Aggoz, Berîvan Altan, Hakan Yalçin, Emrullah Acar, Ceylan Şahînlî, muxabîrê Jinnewsî Habîbe Eren û Oznur Gunhan û stajyerê MA Mehmet Gunhan bi îşkenceyî ameybî destbendkerdene. Zemo Aggoz îfade ra dima vera dîyabi. 10 rojnamegerî 4 rojan ra dima seba îfadeyê sewqê Edlîyeya Anqara bîyî. Xeber û karê înan ê rojnamegerîye, vilakerdişê înan ê medyaya dîjîtale sey unsurê sûcdarîye pêşkêşê rojnamegeran ameyî kerdene. Îfadeyan ra dima Dîren Yurtsever, Bêrîvan Altan, Denîz Nazlim, Selman Guzelyuz, Hakan Yalçin, Ceylan Şahînlî, Emrullah Acar, Habîbe Eren û Oznur Deger bi îdîaya ‘endamîya rêxistine’ ameyî tepiştene. Stajyer Mehmet Gunhan bi şertê kontrolê edlîyî vera dîya. 

 

Goreyê raporê aşma Teşrîna Verêne ya Komeleya Rojnamegerê Dîcle Firatî (DFG) hûmara   rojnamegeranê ke heta nika ameyî tepiştene bîya 87.

Akademîsyen Ceren Sozerîye derheqê hedefgirewtişê rojnamegeran de qisey kerd.

 

‘Rojnamegerî sûc nîya’

 

Cerene ard ziwan ke rojnamegerîye sûc nîya û wina domnaye: “16ê Hezîrane de 16 rojnamegerî ameyî tepiştiş û 25ê Teşrîna Verêne de zî 9 rojnamegerî ameyî tepiştiş. Eke derheqê rojnamegeran de tehqîqat bibayenê, ganî seba îfadedayîşî bivendayêne rojnamegeran. La saetanê serê sibayî de eştî keyeyan ser, rojnamegeran erzenê erdî ser û peynî ra kelemçekerde serê înan çewt kenê. Polîsî rojnamegeran seke sûcdarî zere ra vejenî û dekenê wesayîtan. La ma nêzanê ke rojnamegerî çi sebebi ra yenê sûcdarkerdiş. No dîmen raştî zî hetê rojnamegerîye ra yeno şermizarkerdiş. Her cayê dinya de yeno zanayene ke faalîyetê rojnamegerîye sûc nîyê.”

 

‘Do zext sere nêdî çewtkerdiş’

 

Cerene peynîya qiseykerdişê xo de da zanayen ke do zext sere nêdî çewtkerdiş û wina vat: “Rêxistinê rojnamegeran heta ke deste înan ra ame hewl dayî ke paştî bidê. Seba paştîdayîşê rojnamegeran eşkerayîyan dayî la polîsî reyna teda kerd û waştî ke asteng bikerê. Ma mojna ke tedayê hemverê rojnamegeran nêeşkenê sereyê rojnamegeran bidê çewtkerdiş. Ganî herkes hemverê zextan û tedaya hemverê rojnamegeran de vengê xo berz bikero. Tedaya hemverê rojnamegeran sere de serê Ajansê Mezopotamya û JINNEWSî de destpêkerd. Dima ra dore do bêro rojnamegeranê bînan.”