Derya Ceylan 

 

MERKEZÊ XEBERAN - Goreyê çeteleyê şîdetî yê ajansê ma pare kerdo, aşma teşrîna verêne de tewr tay 36 cinî hetê camêrdan ra ameyê qetilkerdiş, 5 cinî bi hewldayîşê qetilkerdişî dir ameyê rî bi rî. 21 cinî û 7 tutî bi şikdarî dinyaya xo bedelnayê.

 

Netîceyê polîtîkayê îqtîdarî de şîdetê dewleta camêrdî de roj bi roje zêde beno û nê dir sûcê hemverê cinî û tutan zêde benê. Hukm goreyê sîstemê serdest ê camêrdan de qerar gêno zî cezayê sey xelate dano şikdaran û no zî raste rast şîdet, tacîz, desteştiş, qetilkerdişê cinî û tutan tewr giran keno. Heto bîn ra 10 aşmê ewilî yê serre de 299 cinî ameyî qetilkerdiş.

 

Heto bîn ra qezaya Bismilî ya Amedî de di serrî verê keyeyê Yasemîn Demîra 34 serrî, îlanê vînîbîyayîşî dabî. Cenazeya Yasemîn Demîr 20ê êlule de ameye vînayîş. Qerarê nimitişî ardî serê dosyaye û vejîya  werte ke Yasemîne ameya qetilkerdiş.

 

Serebûtêk bîn zî 18 serrî verê Fatîhê Stenbolî de ame ciwîyayîş. Vejîya werte şikdarî, mamosteya Muzîkî Arzu Nîhal Çelîk, camêrdo bi nameyê Erkan Cyî, şikdarî îda kerd ke seba teşwîqkerdişê mêrdeyê Arzu, Şerafettîn Ç. qetilkerdiş kerdo.

 

Xoverdayîşê cinîyan dewam keno

 

Tehranê Îranî de 14ê êlule de cinîya bi nameyê Jîna Emînî hetê polîsanê ahlaqî ra bi îşkenceyê giran ameye birîndarkerdiş û 16ê êlule de dinyaya xo bedelnaye. Hemverê nê de sere de Rojhelat, Îran, Rojhelatê Mîyanên û seranserê dinya cinî kewtî mîyanê xoverdayîşî. Bi di aşmî yo xoverdayîşê cinîyan dewam keno.

 

Tewr tay 36 cinîyî ameyî qetilkerdiş

 

Aşma teşrîna verêne de 36 cinî ameyî qetilkerdiş û 6 cinî zî bi hewldayîşê qetilkerdişî dir rî bi rî ameyî. Aşma de 21 cinîyî, 7 tutî bi şikdar dinyaya xo bedelnayî. 21 cinî hetê camêrdê ke înan dir zewicnaye bî, 4 cinî hetê camêrdê ke nas nêkenê, 5 cinî hetê camêrdê ke merdimê înan ê, 5 cinî hetê camêrdê ke nas kerdêne ra ameyê qetilkerdiş. 20 cinî bi çeke, 6 bi hacetê birnayîşî, 8 zî bi îşkence û metodê ameyî qetilkerdiş. Cinîyêk zî hem bi çeke hem zî bi hacetê birnayîşî ameye qetilkerdiş.

 

Goreyê bajaran

 

Stenbol de 7, Anqara de 8, Xarpêt de 3, Aydin de yew, Denîzli de yew, Mugla de yew, Adana de yew, Îzmîr de yew, Erzirom de yew, Isparta de yew, Mêrdîn de yew, Kocaeli de yew, Sêwas de yew, Kirklarelî de yew, Antalya de yew, Kayserî de yew, Yozgat de yew, Riha de yew, Çanakkale de zî cinîyêke ameye qetilkerdiş.

 

Qerarê dûrvistişî

 

Cinîyê ke ameyê qetilkerdiş 4 ci ra derheqê camêrdê ke înan dir zewicnaye bî de qerarê dûrvistişî girewtibî. Qezaya Bornova yê Îzmîrî de Hulya Şellavci Yegîn derheqê Kaffar Yegîn ke aşmêk bi hewl dayîne dest ci ra vera bido, çar rey serdayîşê sûcî kerdibî û qerarê dûrvistilî girewtibi.