ÎZMÎR - Dayîka tepişteyo bi nameyê Îbrahîm Tîkanî, Leylî Tîkane dîyar kerd ke problemê zîndanan resayê merheleyêka gird, edalet tena seba tepişteyan nê seba her kesî ferz o û ganî paştî bidîyo Nobeta Edaletî.

 

AKP-MHP binpaykerdişê heqan û îşkenceyanê sîtematîkan ê zîndanan roj bi roje giran kenê. Tepişteyo bi nameyê Îbrahîm Tîkanî 12 serrî yo Zîndanê Kiriklarî yê Bucaye de tepişte yo. Dayîka Îbrahîm Tîkanî, Leylî Tîkane derheqê babete de qisey kerd.

 

Hemverê tedayan de tewrê PKKyî bi

 

Leylîye dîyar kerd ke keyeyê aye qezaya Kaxizmanî ya Qersî ra koçê Îzmîrî kerd û dima ra tedayan reyde ri bî ri mendê. Leylîye wina vat: “Lajê mi Îbrahîm wexto ke wendêne her roje eştêne keyeyê ma ser û lajê mi ameyêne destbendkerdiş. Wexto ke Unîversîteya Egeye wend hemverê tedayan de tewrê PKKyî bi. Dima ra ame destbendkerdiş. Lajê mi 12 serrî yo tepişte yo. Demêk mudirê zîndanî xeylê çîyan ard sereye tepişteyan. Tepişteyî hemverê tedayan de dest bi grevê vêşanîye kerdî û tepişteyan kerdî hucreyan.”

 

‘Tutanê ma kişenê, vanê xokiştiş o’

 

Leylî da zanayen ke pêro tepişteyî binê tedaye de yî û wina dewam kerd: “Ê seba ziwanê xo tepişte yê. Nika vanê ke vajêne ‘Ma poşman ê’. Ma seba ziwanê xo ameyî tepiştiş, qey ma poşman bibî. Hende zilm û îşkence dîyî. Seba ke poşman nêbenê zindan de yê. Tay tepişteyî nêweş ê. Ma wazenê ke ê serbest bêrî veradayiş. Wa qesebaya dayîkan nêvêşa. Ma dayîk edalet û aştî wazenê. Nîmeyê şarî zindan de yo. Ma yewîye wazenê. Ma zilm nêwazenê. Tutê ma kişenê, vanê xokiştiş o.” 

 

Qedexeyê pêvînayîşî

 

Leylîye ard ziwan ke grevê vêşanîye ra dima şertê zîndanan tay baş bîyî la reyna zî teda dewam kena û vat: “Eştêne odayanê înan ser. Dest nayêne heme çîyanê tepişteyan ser. Qedexeyê pêvînayîşî vera ma 3 aşman nêeşkayî şêrî pêvînayîş. Rewşa di embazê lajê mi xirab a. Nêweş bîyî. Kewtîbî grevê vêşanîye. Îbrahîm zî înan reyde grev de bî. Coka ra qedexeyê pêvînayîşî dayî.”

 

‘Dewlete Kurdan çinî hesibnena’

 

Leylîye dewamê qiseykerdişê xo de vat ke dewlete Kurdan çinî hesibnena û domnaye: “Dewlele roja verine ra nata kurdan ser de teda kena. Kam ci kurd sere wedarna kute. Kitaban arê daye. Rojnameyan girewte. Ziwanê kurdan qedexe kerde. Vana wa kurd çinî bibê. Dewlete kurdan ra hes nêkena. Zilm vera tay kurdî şîyî koyan ser, tay kewtî zîndanan û tay zî zilm vînenê. Rewşa kurdan wina ya. Ganî kurdî heverê înan de bibê yew.”

 

‘Eke Kurd bibayêne yew…’

 

Leylîye bale ant rewşa tepişteyo bi nameyê Yakup Brukanliyî ke Zîndanê Ereglîyî yê Konya de hucre de hemverê tecrîdî de adir verda bedenê xo ser û vat: “Xeylê çalakîyê winasî virazîyayî. Qey ciwan xo vêşnenî? Zilm vera. Dewlete hêrişê her hetin kena. Eke kurdî bibayêne yew do nê çîyî nêbayêne. Ganî heme kesê bi wayîrê wijdan tewrê Nobeta Edeletî bibê. Edalet tena seba tepişteyan nê, seba her kesî ferz o. Ganî ma pêro tewrê Nobeta Edaletî bibê. Ez pêro dayîkanê nobete silam kena.”