STENBOL - Hemsereka HDPyî ya Stenbolî Îlknur Bîrol venga tewrbîyayîşê rayîr ra şîyayîşê semedê şuxilnayîşê çekanê kîmyewîyan do bi sloganê, "Hemverê şuxilnayîşê çekanê kîmyewîyan rayîr ra şîyayîşê merdimayî” organîze bikerê, kerd û vat: "Caardişê çekanê kîmyewîyan sûcê merdimayî yo. Ma her kesî dawetê rayîr ra şîyayîşê merdimayî kenê.”

 

Hêrişê dewleta tirke yê bi hemkarîya Partîya Demokrate ya Kurdistanî (PDK) yê herêmê Zap, Metîna û Avaşînî 17ê Nîsane ra dewam kenê. Dîmenê ke di HPGyîjî ke tesîr çekê kîmyewî ra girewtibî zî amebî vilakerdiş. Dimayê nê dîmenan xeylêk derûdorî reaksîyon vera caardişê çekanê kîmyewîyan mojna. 

 

Bi rayberîya Partîya Demokratîke ya Şaran (HDP), Kongreyê Demokratîke ya Şaran (HDK) û Hêzê Têkoşînê Yewgirewte (BMG) do 6ê teşrîna peyêne de yanî siba saete 15.00ine de Taksîmê Stenbolî de bi sloganê, "Hemverê caardişê çekanê kîmyewîyan rayîr ra şîyayîşê merdimayî" rayîrraşîyayîşêk organîze bikerê.

 

Bîrole ajansê ma rê qisey kerd. Îlknûre qiseykerdişê xo de bale ant serê amancê rayîr ra şîyayîşî û vat: "Êdî merdimayî vînî kena. Qesawetê leşkerî, serdestî û zîhniyetê camêrdî serê komelî de rewşêka nêbaş aver beno. Ma vînenê ke rewşêka xeylêk muhîm werte de ya û semedê nê sebebî zî ma qerarê çalakîyêke wina girewt.”

 

Îlknûre, da zanayîş ke bi desan reyan bangewazîyê muzakereyêk aştîyane ameyo kerdiş û wina vat: "Tena rayîrê şerî û pêrodayîşê danê verê kurdan. Xeylêk reyan vengdayîşê diyalogî ame kerdiş. Labelê 'mezgê leşkerî' rayîr nêda. Hemverê îdiayê ke yenê kerdiş cigêrayîşêkê mîyanneteweyî eşkeno bêro kerdiş. Ganî heyetê xoser bikewê dewre û şêrê herême. Helwestê ma yê aştîyane, çareserîyê bi rayîrê demokratîke xeta ma ya û ma tu wext fek nê rayîrî ra vera nêdanê.”

 

Îlknûre, dîyar kerd ke helwestê faşîst û neteweperest feyde nêdano tu kesî û wina vat: "Semedê nê ma rayîr ra şîyayîşê 'Rayîr ra şîyayîşê merdimayî” organîze kenê. Prf. Şembenm Korur Fîncanci semedê ercnayîşê çekanê kîmyewîyan ameye tepiştiş. Merdimêka zanyare çîyê ke lazim keno ard ziwan, labelê tehemûlê cinîya ke dinya û Tirkîya de yeno naskerdiş, nêkerdî. No zîhnîyetê ke wina nêzdî beno, tu wext aştî, hizur û azadî nêano no welatî." 

 

Îlknure, qiseykerdişê xo de bale ante serê tepiştişê rojnamegeran: "Demê şuxilnayîşê çekanê kîmyewîyan rojeve de bi, cipersayîşêkê ame destpêkerdiş û rojnamegerî ameyî tepiştiş. Semedo ke sûcdar bî û waştî ke rojnamegeran zî bêveng bikerê. Gelo çira kewtê mîyanê endîşeyan? Ma reyke bîn veng danê ke semedê çareserîya demokratîke û aştîye ganê metodê muzakereyî aver berê. Hemverê polîtîkayê şerî û pêrodayîşî, hemverê sucê merdimayî, semedê muhakemekerdişêk adilane, ma rayîr ra şîyayîşê xo organîze kenê. Ma venga her kesî kenê ke siba tewrê rayîr ra şîyayîşî bibê û helwestê xo nîşan bidê. Ma her kesî dawetê rayîr ra şîyayîşê merdimayî kenê.”