Melîke Aydin

 

ÎZMÎR - Avukata OHDyî Aryen Turane da zanayîş ke înan sey huqûqnasan wezîfeyê xo ca ardî û wina vat: “Hem ez û hem zî OHDyî do ma ardişê serê ziwanî yê bêhuqûqîye dewam bikerê.”

 

Endama OHDyî Avûkate Aryene Turan Heyetê Pêroyî yê Baroyê Îzmîrî de 22ê teşrîna verêne de nameyê OHDyî ser o qisey kerdbi û qiseykerdişê xo de waştbi ke hêrişê kîmyewîy wa bêrê cigêrayîş, tepişteyê nêweşî bêrê veradayîş. Aryene qiseykerdişê xo bi sloganê ‘jin, jiyan, azadî’ qedînabî. Serdozgerîya Komare ya Îzmîrî derheqê Aryene de 24ê teşrîna verêne de tehqîqatêk dabi destpêkerdiş. Avûkate Aryen Turan 3ê Teşrîna Peyêne de amebî destbendkerdiş û 4ê Teşrîna Peyêne de bi badê îfadedayîşî hetê mehkemaya ke vejîya ra bi şertê kontrolê edlî û qedexeyê tebervejîyayîşî yê teberê welatî serbest ameye veradayîş.

 

Aryene derheqê tehqîqato ke dîya destpêkerdiş û destbendkerdişê xo ser o qisey kerd.

 

‘Ma sey huqûqnasan wezîfeyê xo ard ca’

 

Aryene ard ziwan ke babeta çekanê kîmyewîyan ke kongre de aye arda ziwan sey ‘talîmatê rêxistine’ û ‘hetkarîya rêxistine’ ameya fehmkerdiş û wina vat: “Mi vat ez huqûqnas a û hemverê bêhuqûqîye de veng vejena. Sey delîl tena wiseykerdişê mi dosya de ca girewto. Dozger vat ke ardişê serê ziwanî yê çekanê kîmyewîyan caardişê talîmatê rêxistine yo.”

 

'Mi kerdî hedef'

 

Aryene dîyar kerd ke tehqîqat badê heyetê pêroyî 2 rojan dest pêkerdo û vat: “Xora ez hadrebîya ke îfade bida. La reyna zî ameyî mi destbend kerdî. Ez hetê medyaya hawuzî ra sey hedef ameya mojnayîş. Coka ra operasyonêk winasî hemverê mi de dîya destpêkerdiş. Heqaret bi mi ame kerdiş, mi rê gefê mergî û tecawuzî ame wendiş. Medyaya dîjîtalî ser de vatêne ke ‘qey na avûkate nêtepişenî’.”

 

'Donemêko winasî de herkes beno ke bibo hedef’

 

Aryene da zanayîş ke kesê ke aye kerdî hedef ra yew zî Serekê Pêroyî yê Partîya Zaferî Umit Ozdagî  û tay avûkatê Partîya Vatanî bî û wina dewam kerd: “Dima ra medyaya hetgire û trollî na rewşe serê medyaya dîjîtale de ardî ziwan ser. Nê merdimî herkesi rê wina kenî û donemêko winasî de herkes beno ke bibo hedef.”

 

'Wazenê muxalîfî bêveng bibê’

 

Aryene qiseykerdişê xo yê peyênan de înan vat: “Mîyanê dewleta huqûqî ameya vengkerdiş. No nizdîbîyayîşê îqtîdarî yê bêvengverdayîşê herkesi yo. Wzenê tersî awan bikerî. Coka ra ganî merdim her ca de huqûq û edaletî bipawo. No berpirsîyarî û wezîfeyê ma yê hemverê komelî yo. Hem ez û hem zî OHDyî do ma ardişê serê ziwanî yê bêhuqûqîye dewam bikerê.”