AMED -  Çalakîya “Nobeta Edaletî” ya keyeyê tepişteyan ke verê Edlîyeya Amedî de pê ame de keyeyan veng da partîyê sîyasî û dinya ke bêvengîya bîyaye bişiknê û werizî payan ser.

 

Çalakîya “Nobeta Edaletî” ya keyeyê tepişteyanê nêweşan û tepişteyanê ke cezaya înan qedîyaya la nînê veradayene, verê Edlîyeya Amedî de dewam kena. Endam û rayîrberê Partîya Demokratîke ya Şaran (HDP), Partîya Herêmê Demokratîkî (DBP) yê merkez û qezayan zî tede, endamê Tevgerê Cinîyanê Azadan (TJA) Komeleya Yewîya Kultur û Paştîdayîşê bi Keyeyanê ke Merdimê Xo Derguşê Şaristanîye yê Mezopotamya de Vînî Kerdî (MEBYA-DER), Komeleya Cigêrayîşê Ziman û Kulturê Mezopotamyaye (MED-DER), Komeleya Paştî û Paştîdayîşê bi Keyeyanê Tepişteyan û Hukmweran reyde (TUAY-DER), Federasyonê Komeleya Paştîdayîşê Huqûqî yê bi Keyeyanê Tepişteyan û Hukmweran reyde ya Medî (MED TUHAD FED), Komeleya 78an, Komeleya Huqûqnasê Azadîye (OHD) zî seba paştîdayîşî tewrê çalakîye bîyî.

 

‘Wa tutanê ma tedawî bikerê’

 

Çalakîye de merdimê tepişteyê nêweşan ra Reşahat Ada qisey kerd. Reşahat Ada qiseykerdişê xo de dîyar kerd ke çalakîya înan ya verê edlîye de dewam kena û wina vat: “Wa cezaya muebbedî nêdîya domananê ma. Wa goreyê qanûnan têbigêrî. Cezaya muebbedî ewro dîyena tutanê ma rê. Tepişteyê ke 30 serrî yo zîndanan de zî û cezaya înan qedîyay zî nînê veradayene. Tutê ma hende wexto ke tepişte yî û înan rê vanî ke ‘şima dewaya xo ra poşmanî yan nê’. Tutê ma zî vanî ‘Hende wexto ke ma tepişte yî, ma senî poşman bibî’. Ma sereye xo zî bidî, ma poşman nîyê. Coka ra înfazê tutanê ma vêşnenê. Vengê ma Wezîrê edaletî û Serekkomarî ra est o ke wa înfazê înan nêvêşnê û cezaya dîsîplînî nîdîya tepişteyan. Wa tutanê ma tedawî bikerê.”

 

‘Tutê ma zere de ma zî teber de xo ver danê’

 

Reşahate, bale ant serê şîyayîşê xo yê Anqarî û wina vat: "Bi aşmêke û nîm o meclîs abîyo. Wîcdanê înan nêmendo. Ma goreyê heq, huqûq û edaletî şinê. Wa destê xo bidê serê wîcdanê xo û înfazê tutanê ma nêveşnê. Ma şîyê Anqara û uca de zî vat ke waştişê tutanê ma û tepişteyê nêweşan ê giran bi ca bîyarê. Tepişteyê 70 û 80 serrî nêeşkenê zîndan de bimanê. Tepişteyê ma zere de, ma zî teber de xo ver bidê. Vengdayîşê ma partîyê siyasî û heme dinya ra est o ke wa wurzê serê lingan. Ma wayîrê zîndanan vejîyê. Ma fek tutanê xo ra vera nêdanê. Bi hezaran tutê ma nika zîndanan de tepişte yê. Ez sereyê xo verê înan de tewênena. Xoverdayîş û hêzê înan roşnayîya temamê dinya yo. Serekkomar wa goreyê edaletê xo têbigêro. Wa tutanê ma tedawî bikerê, înfazê înan nêveşnê û hûcreyê yew kesî nêdê înan. Dinya de tu cayêk de 10 serrî cezaya hûcreyî dayê kesêk. La Tirkîya de no çi est o. Êdî bes o. Ma nê zulmî qebûl nêkenê. Tutê ma sereyê xo nêtewênenê.”

 

Çalakî bi sloganê, “ Biciwîyo xoverdayîşê zindanan” û “Heq, huqûq, edalet” peynî bi.