WAN - Dîlşah Alkane qiseykerdişê xo de bale ant polîtîkaya tecrîdî ser û da zanayene ke wa tecrîdê serê tepişteyan bêro peynîkerdiş. Dilşahe vat ke tecrîd tesîrê xo ziwan û kulturî ser de zî keno.

 

Cinîya bi nameyê Dîlşah Alkan da zanayîş ke rewşa weşîya mêrdeyê aye Îbrahîm Alkan û lajê aye Serdar Alkan ke Zîndanê Tîa Fyî yê Wanî de tepişte yê, xirab a. Dîlşahe dîyar kerd ke hem lajê aye û hem zî mêrdeyê aye hetê weşîye ra problemanê cîdîyan cuyenê. Dîlşahe vat ke nêweşîya şekerî vera çimê mêrdeyê aye nêvînenî û rewşa lajê mi mêrdeyê mi ra hîna xirabêr bîya û lajê mi kor bîyo.

 

‘Ganî tecrîd bêro wedarnayîş’

 

Dîlşahe wina dest bi qiseykerdişê xo kerd: “Mêrdeyê mi Îbrahîm Alkan 4 serr û nîme yo ke tepişte yo. Xeylê nêweşîyê ci est ê. Mêrdeyê mi de nêweşîyê tansîyon, şeker û zerrî est ê. Nêno dermankerdiş. Tepişteyan ser de tecrîdêko giran est o. Ganî tecrîd bêro wedarnayîş. Lajê mi Serdar zî 4 aşmî yo tepişte yo. Lajê mi zî sey mêrdeyê mi nêweş o. Nêweşê şeker, tansîyon û  dîyalîzî yo.”

 

‘Edelet pê nîno’

 

Dîlşahe dewamê qiseykerdişê xo de nê çîyan ard ziwan: “Wa zîndanan ra cenazayê tepişteyan nêrê vetiş. Ganî tepişteyê nêweşî bêrê veradayîş û dermankerdiş. Ganî tepişteyê nêweşî keyeyanê xo de bê. Edalet nêmendo. Herkes vano edalet la edalaet nêmendo û edalet pê nîno.”

 

‘Destê xo biancêne’

 

Dîlşahe bale ant Aysel Tugluka ke rewşa aye ya weşîye xira bî û dima ra serbest ameye veradayîş ser û vat: “Aysel Tugluk çend serrî yo ke tepişte ya. Nêweşîya aye giran bî. Çîyêk nîno vîrê aye. Bê sûc tepişte ya. Tepişteyê nêweşî şertê ke tede yî vera rewşa înan giran bena. Wa deste xo tepişteyanê nêweşan ra biancê.”

 

‘Ganî aştî û edalet pê bêro’

 

Dîlşahe tewr peynî wina vat: “Çîyo ke ma tewr vernî wazenê aştî û azadîye yo. Ganî tecrîdê serê tepişteyan wedarîyo û edalet pê bêro. Tecrîdo ke est o ziwan û nasnameyê ma ser de zî tesîr virazeno. Ma no zilmî qebul nêkenê. Ma heqê xo wazenê. Wa her kes azad bibo. Waştişê ma no yo.”