Melîke Aydin

 

ÎZMÎR - Cinîyan dîyar kerd ke rojnamegerê ke ameyî tepiştene vengê şarî yî û dewlete bi tepiştişê rojnamegeran mesajê do sûcê merdimîye dewam bikerê dana.

 

Çarçewa tehqîqatêkê Serdozgerîya Komare ya Anqara de 25ê teşrîna verêne de Mudira Karanê Nuşteyî yê Ajansê Mezopotamya (MA) Dîren Yurtsever, muxabîrê MA Denîz Nazlim, Selman Guzelyuz, Zemo Aggoz, Berîvan Altan, Hakan Yalçin, Emrullah Acar, Ceylan Şahînlî, muxabîrê Jinnewsî Habîbe Eren û Oznur Gunhan û stajyerê MA Mehmet Gunhan bi îşkenceyî ameybî destbendkerdiş. Zemo Aggoz îfade ra dima vera dîyabi. 10 rojnamegerî 4 rojan ra dima seba îfadeyê sewqê Edlîyeya Anqara bîyî. Xeber û karê înan ê rojnamegerîye, vilakerdişê înan ê medyaya dîjîtale sey unsurê sûcdarîye pêşkêşê rojnamegeran ameyî kerdiş. Îfadeyan ra dima Dîren Yurtsever, Bêrîvan Altan, Denîz Nazlim, Selman Guzelyuz, Hakan Yalçin, Ceylan Şahînlî, Emrullah Acar, Habîbe Eren û Oznur Deger bi îdîaya ‘endamîya rêxistine’ ameyî tepiştiş. Stajyer Mehmet Gunhan bi şertê kontrolê edlîyî vera dîya.

 

‘Ma do raşteyan de bê’

 

Rojnamegera Rojnameyê Yewîya Têkoşînî yê Îzmîrî Lutfîye Burcu Kara da zanayîş ke tepiştişê rojnamegeranê çapemenî azade qanûnê sansurî ra cîya nêeşkeno bêro ercnayîş û qanûnê sansurî zî qerarê tepiştişî zî seba astengkerdişê heqê girewtişê xeberan ame viraştiş. Burcuye dewamê qiseykerdişê xo de vat: “Wirdî dezgeyê çapemenîye de zî şopê Musa Anterî sero weşan kenê. Do embazê bînî zî bêrê tepiştiş. Beno ke no hêriş dewam bikero. La ma do qelema embazanê xo erdî de nêverdê. Ma do nameyê înan ser raşteyan de bibî. Ma timî kişta înan de yê. Wa rojnamegerî lezûbez bêrê veradayîş.”

 

‘No mesajê do sûcê înan dewam bikero yo’

 

Aktîvîsta Tevgerê Cinîyanê Azadan (TJA) ya Îzmîrî Newroz Çelîke dîyar kerd ke hêrişê hemverê rojnamegeran hemverê komelî de virazîyayo û aye zî wina vat: “Çapemenîya azade vengê cinîyan a. Çapemenîya azade seba ke cinî bêrê dîyîş û seba ke cinî yewbînan ra xebere bigêrê xebetîyena. Bi taybetî no prosesî de hêrişê çapemenîya azade kenê. Tirkîya wazena sûcê xo binimna. Çapemenîya azade sûcê merdimîye bi dinya da hesnayîş. Coka ra zî hewl danê bi tepiştişan bêveng bikerê. Ma vengê paştîdayîşê çapemenîya azade danê.”

 

‘Her kes hêrişan ra para xo girewt’

 

Endama Meclîsê Cinîyan ya Partîya Demokratîke ya Şaran (HDP) Ayşe Ozdamare bale ante zextê îqtîdarî, qanûnê sansurî ser û vat ke îqtîdar bekeya xo û ya dewlete seyyewbînan vîneno û wina domnaye: “HDPyî rê zî dewaya girewtişî akerdî. Wexto ke merdim ewnîyeno vîneno ke hemverê muxalefetê demokratîke de hêrişêko şîdetin est o. Yê ke nê hêrişan mojnenê rojnameger ê. Hêrişê hemverê rojnamegeranê çapemenîya azade zî nê semedî ra yo. JINNEWS û Ajansê Mezopotamya weşanê muhîmî yê çapemenîya kurdî ra yê. Eke hemverê nê hêrişan de muxalefet nêro awankerdiş do her kes nê hêrişan ra para xo bigêro. Dîktatorî bi têkoşînî eşkeno bêro rijnayîş. Ganî her kes hemverê tîfaqê AKP-MHPyî de bibo yew. Rayîrêko bîn yê têkoşînî ke hemverê îqtîdarî de bêro kerdiş, çinî yo.”