WAN - Rêxistinanê komelê sivîlî û partîyanê sîyasîyan ê Wanî venga her kesî da ke vera hêrişanê kîmyewîyan tewrê rayîr ra şîyayîşê Silopî yê 6ê teşrîna peyêne bibê.

 

Vera hêrişanê kîmyewîyan ê dewleta tirke qezaya Silopî ya Şirnexî de 6ê teşrîna peyêne de bi şîarê 'Rayî ra şîyayîşê merdimîye yê vera çekanê kîmyewîyan' rayîr ra şîyayîşêk do bêro kerdene. Çalakîye do serkêşîya Komeleya Kultur, Yewî, Paştdayîş û Hetkarîya bi Keyeyanê ke Merdimê Xo Dergûşê Şaristanîye de Vînî Kerdî (MEBYA-DER) de bêra kerdene.

 

Rêxistinanê komelê sivîlî û partîyanê sîyasîyan Wan de derheqê çalakîye de eşkerayîyêke daye. Hemserekê DBPyî yê Wanî Harun Okayî eşkerayîye wende. Harunî îfade kerd ke hukmatî herinda ke kesanê ke hêrişê kîmyewîyî ardî ziwan bitepişo heyetê xoserî bişawo herême.

 

‘Ma do bêveng nêmanê’

 

Harunî venga OPCW, NY, WHO û Yewîya Ewropa (YE) da ke wa vera hêrişan têbigêrê û vat: ''Roje roja bêvengmendişî nîya, roja vervejîyayîşî ya, roja pawitişê merdiman a. Ma venga pêro rêxistinan, dezgeh û rêxistinan danê ke wa vera nê hêrişan têbigêrê. Ma venga şarê xo û hêzanê demokrasî danê ke 6ê teşrîna peyêne de tewrê Rayraşîyayîşê Silopî bibê. Bi bêvengbîyayîşî mebê hemkarê nê sûcî.”