Nişmiye Guler

 

 

MERKEZÊ XEBERAN - 9 embazê ma yê ke bêrûmetîyê îqtîdarî ferz kerd sere çewt nêkerdî, ameyî tepiştiş. Semedê nê têkoşînê înan yê heqîqetî yê ma pêrûnan o. Peynîya nê rayîrî do ma pêrûne bero ver bi rûmetî.

 

Nê rojê ke polîtîkayê şerî yê ke şarê Tirkî û şarê Kurdî ano hemverê yewbînan kewto dewre, 9 embazê ma yê ke tercîhê xo rayîrê heqîqetî de kerdê, ameyî tepiştiş. Ez o nêvajî ‘Hema’. Semedo ke embaza ma  ya rojnamegere Nagîhan Akarsele 4ê teşrîna verêne de Silêmanî ame qetilkerdiş, nuşteyî xo de vatbi, ‘hema’ proses yeno normalkerdiş. Belê, bêguman no rexneyêk heqdar o. Tarîxê nêzdî de 16 embazê ma 16 hezîrane de ameyî tepiştiş. Senaryoya semedê embazê ma amebî amadekerdiş, semedê 9 embazê ma yê bînî zî amade kerdê.

 

Senaryo veng ame vetiş

 

Semedo ke na rey baş xo amade kerdibî. Qestê min ê başî zî no yo, verê ameyo plankerdiş û fikirnayîş. Sewbîna senaryo zî bi polîsê ke şawitê keye, baş dayê wendiş û înan ra waştê ke kaybazîya xelatkerdişî kay bikerê. Senîn kewtê zere, embazanê ma eştê erd û peyser kelemçe kerdê û bi xususî nengî û heqaretî embazanê ma yê cinîyan rê kerdê, bi saetan dokumanê ‘rêxistinî’ geyrayê û dima ra verê  kamerayan de şov kerdê. La embazê ma demo ke keye ra ameyê vetiş, bi serberzîya ke nîşan dayê, bi vindertişê heqdar nê senaryoyan veng vetê.

 

Vindertişê Berîvane înan rê bi derd

 

Bi xususî vindertişê embaza ma ya Berîvan Altane înan rê bîyo derd ke, trolê ‘AK’ yê bi pere kerdê dewre û wazenê bi nê ewnîyayîşî awan bikerê. La no hewldayîş zî veng bi. 11 embazê ma rê her tewir şîdetê psîkolojîk û fîzîkî ame kerdiş. Ver bi sibayî bêveng tepiştî la korîdorê edlîye de sloganê ‘çapemeniya azade nêeşkena bêra bêvengkerdiş’ ameyî berzkerdiş. No nîşaneyê vindertişê bi rumet û heqdar ê embazanê ma bi.

 

Çîyo ke ame tepiştiş çapemenîya azade ya Kurde bî

 

Embazê ma bi xeberanê xo heqê girewtişê xeberan ê rayaumûmî dir xizmet kerdî û pêwa îşkenceyî ameyî vînayîş seknê bi rumet pawitî. Ma bêrê rewşa teberî. Xêrcê kedkarê çapemenîya Azad û hîn dostan her kes hemverê nê senaryoyî û mîzansenî de bêveng mend. Rojname û televîzyonê ke qaşo xo rê vanê ma muxalîf ê, embazê ma hedef girewtî. Hîn rojnameyan  seke nê welatî rojnamegeran îşkence nêameyo kerdiş, têgêrayî. No rojname zî qaşo rojnameyê muxalîf ê. Embazê ma korîdorê edliyî de tena ameyî verdayîş. Seke qet dem û dewran nêagêro û do berê xo nêdê înan. Hîn rojnameyê ke êdî bêrumet ameyê verdayîş zî îcazetê dawetnameyê îqtîdarî kerdî, methiye rêz kerdî. Semedo ke yê ke amebî girewtişê çapemeniya azade ya Kurdî bî.

 

‘Çapemenîya azade nêeşkena bêra bêvengkerdiş’

 

Sloganê, ‘çapemenîya azade nêeşkena bêra bêvengkerdiş’ ya korîdorê edlîye de berz bî, esas de xeylêk çî ma ra vano. Înan bi xeberanê xo heqîqet resnayî şarî. Sûcê şerî yê îqtîdarî dayî werte. Hawirêkê muxalîfî yenê pelçiqnayîş û bêvengkerdiş de, embazê ma qet xo nêdayî het û bedel dayî verê çiman, xeberanê xo viraştî. Bêters hemverê îqtîdarî vindertê û nîşan dayî ke generalê qijî yê Musa Anter, rayberîya Gurbetellî Ersoz, embazê Nagîhan Akarsele yê. 

 

‘Na dewlete ma ra çi wazena?’

 

Mamosteyê ma Huseyîn Aykol demo ke embazê ma ameyî destbendkerdiş, rojnameyê Yenî Yaşam de nuşteyêkê bi nameyê ‘Na dewlete ma ra çi wazena?’ nuştibi. Ez zî nuşteyê mamosteyê ma çîyêkê zêde bikerî: “Mamosta, na dewlete wazena ma  bibê rojnamegerê bêrûmet. La semedo ke ma rumetê xo pawenê, ma hemverê înan serberz vindenê, Ma methîye rêz nêkenê, semedo ke ma kitaban wanenê, ma sûcê înan yê şerî vejenê werte, ma ra hes nêkenê. Ma se bikerê, ma nê yê. 30 serrî yo înan se kerd zî ma xo bêrûmet nêkerd. Nêeşkenê adetê çapemenîya azad bêrûmet bikerê…”

 

Hema xeylêk rayîrê ma esto… Pêwa 16 embazê ma têkoşînê heqîqetî yo 9 embazê xo zî gênê serê milê xo û rayîr ra şîyayîşê xo dewam kenê. Peynîya nê rayîrî do vejîyo azadî û rumetê komelî…