WAN - Mamosteya kursê ziwanê kurdkî Nazîme Bor, qiseykerdişê xo de bale ant serê polîtîkayê asîmîlasyonî û vat: "Hemverê polîtîkayê asîmîlasyonî, ganî xebatêka hempar bêra kerdiş û sere de ma cinî û temamê komelî do pawitişê ziwanê xo bikerê."

 

Asîmîlasyonê hemverê ziwanê kurdkî de bi her tewir dewam keno. Hemverê na polîtîkaya qirkerdişê ziwanî, xebatê pawitişê ziwanî zî dewam kenê. Cinîyê ke pawitişê ziwanî kenê, venga xebatanê hempar kenê. Mamosteya kursê ziwanê kurdkî Nazîme Bor derheqê muhîmîyê ziwanê dayîke de ajansê ma rê qisey kerde.

 

Nazîmeye behsê mana û muhîmîyê ziwanê kurdkî kerd û wina vat: “Ganî muhîmî bidê perwerdeyê ziwanê kurdkî. Ez tîya de mamosteyî kena. Bi amancê ziwan bêro qiseykerdiş û bêro musnayîş nê karî kena. Semedo ke mamosteyê cinî çin ê. Ez wazena her kes ziwanê xo bimuso. Serê ziwanî de asîmîlasyon û polîtîkaya çinkerdişî esta. Ganî şarê kurdî ziwanê xo nêerzê planê peyînî. Bi ziwanê xo rê dir baş eleqedar nêbenê. Sebebê akerdişê TRT6 zî oyo ke kurdî xo rê kanalêko alternatîf anêkerê.”

 

'Amanc xovîrrakerdişê ziwanî yo’

 

Nazîmeye dîyar kerd, polîtîkayê asîmîlasyonî tesîrêko pîl serê ziwanî de keno û wina dewam kerd “Asîmîlasyon û çinhesibnayîş tesîrêkê pîl serê cuye de keno. Ma bi kesê keyeyî dir semedê açarnayîşî şinê nêweşxane. No tedayêkê zaf giran o. Verê mufetîş ame sinifa mi vat, tena tirkî tutan rê bimusne. Vat, ganî tirkî bimusê û kurdkî xo vîr ra bikerê. Amancê înan asîmîlasyonêkê giran o. Ma ra wazenê ke ma ziwan û kulturê xo, xo vîr ra bikerê.”

 

‘Ganî taxan de kursê ziwanê kurdkî bêrê akerdiş’

 

Nazîmeye dîyar kerde ke ganî hemverê asîmîlasyon û qirkerdişî her kes meydanan de bo û taxan de kursê ziwanê kurdkî bêrê akerdiş û wina vat: “Amancê înan dîyar o. Wazenê ziwanê kurdkî çin bibo. Wazenê bi qirkerdişê ziwanî, komelî qir bikerê. Semedo ke zanê ziwan, nasname û kultur o. Ziwan, bîyayîş o. Ziwan hem nasname û hem zî tarîx o.”

 

‘Cinî zanaye ya’

 

Nazîme wina qedêna: “Wareyê perwerdeyî de bîyayîşê cinîyan xeylêk muhûm o. Cayê cinî ziwanê dayîke de xeylêk muhîm o. Perwerdeyê bi ziwanê dayîke muhîm o. Ganî ma wayîrê ziwanê xo vejîyê. Ganî cinî, tutî, camêrdî û her kes wayîrê ziwanê xo vejîyo.”