ANQARA - Anqara de 9 rojnamegerî semedê xeberanê ke viraştê, ameyî tepiştiş.

 

Çarçewaya cipersayîşê Serdozgeriya Komare ya Anqarayî dabî destpêkerdiş de di 25ê teşrîna verêne de Mudira Karê Nuşteyî ya Ajansê Mezopotamyayî (MA) Dîren Yûrtsever, muxabîrê MAyî Denîz Nazlim, Selman Guzelyuz, Zemo Aggoz, Berîvan Altan, Hakan Yalçin, Emrûllah Acar, Ceylan Şahînlî, muxabîrê JINNEWSî Habîbe Eren û Oznûr Deger û sewbîna Mehmet Gunhano ke demêk MAyî de stajerî kerdibi, bi îşkence amebî destbendkerdiş. Rojnamegere Zemo Aggoz 26ê teşrîna verêne de dimayê karûbarê îfadeyê emniyetî amebî veradayîş.

 

10 rojnamegerî dimayê 4 rojan berdîyayî Edliyeyê Anqarayî û ewilî îfade dayî dozgerî. Xeberê ke rojnamegeran viraştê, parekerdişê înan yê medyaya dîjîtale û gêrayîşê înan kerdî sucdarî.

 

Dozgerî, dimayê 5 saetan qerar da û rojnamegere Dîren Yûrtsever, Bêrîvan Altan, Denîz Nazlim, Selman Guzelyuz, Hakan Yalçin, Ceylan Şahînlî, Emrullah Acar, Habîbe Eren û Oznûr Deger bi waştişê tepiştişî sewqê dadgerîye kerd. 

 

Dozgerî, Mehmet Gunhano ke demêkê MAyî de stajyerî kerdibi zî bi şertê kontrolê edlî sewqê dadgerîye kerd. 

  

Îfadegirewtişê rojnamegeran dadgerîye de zî bi saetan dewam kerd û heta nîmeyê şewe dewam kerd. Dadgerîye, derheqê Midûra Karê Nuşteyî ya Ajansê Mezopotamyayî (MA) Dîren Yûrtsever, muxabîrê MAyî Denîz Nazlim, Selman Guzelyuz, Zemo Aggoz, Berîvan Altan, Hakan Yalçin, Emrûllah Acar, Ceylan Şahînlî, muxabîrê JINNEWSî Habîbe Eren û Oznûr Deger de bi îdiayê “endamîya rêxistine” qerarê tepiştişî da. 

 

Mehmet Gunhan zî bi şertê kontrolê edlî û qedexeyê tebervejîyayîşê teberê welatî, ame veradayîş.

 

Keye û rojnamegerî verê edliyeyî de vindertibî zî bi sloganê, “Çapemenîya azade nêna bêvengkerdiş” û bi çepikan qerarê tepiştişê rojnamegeran şermezar kerdî.