ÎZMÎR - Cinîyan derheqê hêrişanê kîmyewîyan ke bi hemkarîya PDK û AKPyî herêmanê Zap, Avaşîn û Metînaye de ameyî şixulnayîş de ercnayîşan kerd û vat ke ganî PDK nêbo hemkarê nê sûcî û selahîyetdarî herême de cigêrayîş bikerê.

 

Tirkîya bi hemkarîya Partîya Demokratîke ya Kurdistanî (PDK) Başûrê Kurdistanî, herêmanê Zap, Metîna û Avaşînî de 17ê Nîsane de hêriş dabî destpêkerdiş û mîyanê nê 6 aşmanê peyênan de xeylê reyan ame rojeve ke nê herêman de çekê kîmyewîyî yenê şixulnayîş. Goreyê xebera Ajansê Xeberan ya Firatî (ANF), Merkezê Pawitişî yê Şarî (NPG) da zanayîş ke Tirkîya mabenê 14 Nîsane û 14ê Teşrîna Verêne de 2 hezar û 46 reyan çekanê kîmyewîyan şixulnaya.

Medîne Kaymaze da zanayîş ke bi şixulnayîşê çekanê kîmyewîyan zilm bi şarî kenî û îqtîdar bin ê zilman ser nêkewo û domnaye: “No zilm o. Kurdistan de çi kare ci esto? Do no zilm heta ça dewam bikero? Dewleta tirke do bi nê zilmî ser nêkewo. Kurd Kurdê verê cû nîyê. Ma hemverê nê zilmî de nêeşkenê bêveng bimanê. Ma dayîk ê. Ma peynîya edaletî de yê.”

 

‘Ganî dinya hemverê şixulnayîşê çekanê kîmyewîyan de bêveng nêmana’

 

Medîneye da zanayîş ke ganî dinya hemverê şixulnayîşê çekanê kîmyewîyan de bêveng nemana û qiseykerdişê xo wina qedênaye: “No sûcêko gird o. Ganî şarê kurd werizo payan ser û vatişê xo bivajo. Ganî heme dinya weriza payan ser, vaja no sûc o. Kîmyasalan erzenê şarî ser. Tîya kerdî çol. Ne ganî, ne zî merdim verdayî. Dinya vêşnayî. Acaba edaletê şima hende yo? Şima merdimi senî yê? Ma aştîye wazenê. Ma Dayîkê Aştîye yê. Wa gonî nêrija. Ma veng danî Barzanî. Wa no îxanetî ra agêro. Wa paştî nêdo dewleta tirke. No îxanetî rê êdî bes o.”

 

‘Zirarê xoza û merdimîye’

 

Hemverfeka Herêma Egeye ya Partîya Herêmê Demokratîkî (DBP) Neslîhan Arvîşe zî qiseykerdişê xo de vat: “Exlaqêko şerî esto. Kurdistan de şer yeno ramitiş. Raybaz û exlaqê şerî esto. Çekê kîwyewî sûcê merdimîye yo. Dewleta tirke bi şixulnayîşê çekanê kîmyewîyan sûc kena. Nizdîbîyayîşê ma yê hemverê şerî zelal o. No zirarêko gird dano merdimîye û xozayî. Muxatabê çareserîye Îmrali yo. Ganî nêbî hemkarê nê sûcî.”

 

‘Ganî heyetêk xoser cigêrayîş bikero’

 

Endama Heyetê Rayîrberî ya Merkezê Partîya Demokratîke ya Şaran (HDP) Îdîl Ugurluye zî derheqê babete de wina vat: “Derheqê şixulnayîşê çekanê kîmyewîyan de dîmenî ameyî weşanayîş. Ganî rayaumûmî awan biba û Tirkîya ceab bida. Ganî heyetêk xoser şêro herême û cigêrayîş bikero. No berpirsîyarîya dewletanê ke îmze eştî binê pêkerdişî ya. Dewletî bêveng ê. Ganî no bêvengî xira bibo. Cigêrayîşo ke bêro kerdene do komelê cîhane rê xizmet bikero. Ganî komel derheq cigêrayîşî de bibê wayîrê waştiş û waştişê xo bîyarî ca. Ganî herkes hîssin têbigêro.”