STENBOL - Rayberê PKKyî Abdullah Ocalan ke Îmraliyî de tepişte yo, 19 aşmî yo xebere ci ra nêna girewtiş û qedexeyê pêvînayîşî yê 6 aşman neweyî dayî Ocalanî.

 

Rayberê PKKyî Abdullah Ocalan ke zîndanê Asayîşê Berzî yê Tîpê F yê Îmraliyî de binê tecrîdî de yeno tepiştiş, 19 aşmî yo xebere ci ra nêna girewtiş û vejîya werte ke hetê Dadgeriya Înfazê Bursayî qedexeyêkê pêvînayîşî yê newe yê 6 aşman ê avûkatan dayî Ocalanî.

 

Demê qedexe çinbi pêvînayîş nêame kerdiş

 

13ê nîsane de 6 aşmî qedexeyê pêvînayîşê bi avûkatan dir dayî Ocalanî û 18ê teşrîna verêne de peynî bi. Dimayê avûkatanê Buroyê Huqûqî yê Asrinî waştî bi muvekîlê xo reyde pêvînayîş bikerê û vatî çira pêvînayîş nêno kerdiş, ganî bêro neqlkerdiş. Nê ser de dadgerîye cewab da avûkatan û vat, qedexeyê pêvînayîşî çin o.

 

Qedexeyo newe

 

Avûkatan 26ê teşrîna verêne de reyna muracatê dadgerîye kerdî û persê, ‘Demo ke qedexeyê pêvînayîşî çinbi, çira ma bi muvekîlê xo dir pêvînayîş nêkerd’ pers kerdî. Dadgerîye cewab da avûkatan û vat cezayêke newe yê 6 aşman ê 21ê teşrîna verêne de Abdullah Ocalanî rê ameya birnayîş esta. Qerar zî 27ê teşrîna verêne de avûkatan rê ame teblîgkerdiş.

 

Do îtîrazê qerarî bikerê

 

Avûkatê Buroyê Huqûqî yê Asrinî semedê teblîgkerdişê na ceza înan rê ameya kerdiş, do rojê bêrê de Dadgerîya Înfazê Bursayî rê îtîraz bikerê.

 

Avûkatan tewr peyîn 2019ine de pêvînayîş kerd

 

Rayberê PKKyî tewr peyîn 7ê Tebaxa 2019ine de bi avûkatanê xo dir pêvînayîş kerd. Bi birayê xo Mehmet Ocalanî dir zî 25ê Adara 2021ine de pêvînayîşêkê telefonî yê kilm kerdibi.

 

Pêvînayîşê bi keyeyî dir zî qedexe yê

 

Heto bîn ra hetê Serekîya Heyetê Dîsîplînî yê Îmraliyî ra semedê rayberê PKKyî 3yê êlule de 3 aşmî cezaya dîsîplînî ci rê ameya birnayîş, bi nê îdiayî qedexeyê pêvînayîşê keyeyî dabî. Na ceza 28ê êlule de qetî bî la 5ê teşrîna verêne de semedê keyeyî ame teblîgkerdiş. Na ceza rastê demê  ke CPT 20-29ê êlule de Tirkîya ziyaret kerdibi bi ca ame.