ÎZMÎR - Proseso ke serekkomar tay xebatkaranê çapemenîye dawetê qesrî kerdbî de xebatkarê çapemenîya azade ameyî destbendkerdiş. Cinîyan da zanayîş ke rojnamegerî sûc nîya û do sere bi çapemenîye nêdî çewtkerdiş. 

 

Çarçeweya tehqîqato ke serdozgerîya Komarî ya Anqara dabî destpêkerdiş de 11 rojnamegerî ke tede rojnamegerê ajansê ma û Ajansê Mezopotamya (MA) estbî, netîceyê sereştişê keyeyî de ameyî destbendkediş. 9 bajaran de sereştişî virazîyabî. Sereştişê keyeyan de Mudira Karanê Nuştuşî ya Ajansê Mezopotamya (MA) Dîren Yurtveser û muxabîrê MA Deniz Nazlim, Selman Guzelyuz, Zemo Aggoz, Bêrîvan Altan, Hakan Yalçin, Emrullah Acar û Ceylan Şahinli û muxabîrê JinNewsî Habibe Eren û Oznur Deger, rojnameger Mehmet Gunhan pê îşkenceyê polîsan ameyî destbendkerdiş. Ame zanayîş ke rojnameger Derya Rene çarçewaya cipersayîşêko cîya ra bi îdîayê cezaya aye ameya tesdîqkerdiş, ameye destbendkerdiş.

 

Cinîyan reaksiyon nîşanê rewşe da û vatî ke rojnamegerî sûc nîya.

 

Sereka Cemîyetê Rojnamegeran ya Îzmîrî Dîlek Gappî da zanayîş ke ganî rêxistinê meslekî bipersê ka rojnameger rojnamegerê yan nê û vat: “Gelo goreyê çi nizdî benê? No nizdîbîyayîş ne goreyê Tirkîya yo, ne zî goreyê prosesî yo. Ganî bi nê raybazan kesêk nêro tepiştiş, destbendkerdiş. Wexto ke heq û demokrasî bêrî binpaykerdiş peynîya nê çîyan nênê. Ez qanûnê dezenformasyonî zî rexne kena. Qanûn qanûnê çapemenîye de bedilnayîşan keno û fikre dezgehanê rêxistinkerdeyan nêno perskerdiş. No sîstem her çî ra ver otosansurî keno. Mi gore derheqê weçînayîşî de yo. Ma nê nizdîbîyayîşan raşt nêvînenê.”

 

‘Rojnamegerîye sûc nîya’

 

Rojnamegera serbest Ozlem Karane zî destbendkerdişê embazanê xo şermizar kerd û vat: “Çîyo yewine ke ê kenê rojnamegerî yo. Îqtîdar rojnamegeran hedef gêno. Wazenê ma bêveng bikerê. La ma do bêveng nêmanê. Ma do nuşte û xeberanê xo dewam bikerê. Ganî embazê ma lezûbez bêrî veradayiş.”

 

ÎHGD veng da

 

Heyetê Rayîrberîya Komelya Rojeva Heqê Merdiman (ÎHGD) zî dîyar kerd ke komele hemverê astengîyanê vernîya rojnamegeranê muxalîfan û weşanê muxalîfan de têkoşîn dana. Destbendkerdiş û tehqîqatê hemverê rojnamegeran nêno qebulkerdiş.”

 

Paştîdayîşê Morî yê Îzmîrî Dîdar Gule zî qiseykerdişê xo de ard ziwan ke îqtîdarê AKP-MHPyî bi taybetî hemverê cinîyan, sosyalîstan, welatperestan de polîtîkaya pelçiqnayîşî yena rayraberdiş û vat: “Demêko kilm verê cû de hemverê avukatanê cinîyan de hêrişê faşîstî ame kerdiş. 11 rojnamegerî ameyî destbendkerdiş û sereye înan ame çewtkerdiş. Bi no hawa mesaj dîyeno şarî. Hemverê nê caardişan de do cinî, rojnameger, şorişger û welatperestî têkoşînê xo dewam bikerê.”

 

Partîya Demokratîke ya Şaran (HDP) yê Îzmîrî ra Mehtap Alîşan vat ke çapemenî prosesêko zehmetin ra derbaz bena û bi qanûnê sansûrî reyde hewl dîyeno ke vernîya raştîyan bêro girewtiş ke raştî nêreso şarî. Mehtape bale ant weçînayî ser û da zanayîş ke weçînayîşî ra ver viraştişê nê operasyonan tesaduf nêyo.

 

Ma sere çewt nêkenê

 

Mehtape tewr peynî wina vat: “Hewl danê ke sereyê rojnamegeran çewt bikerê. Beno ke siba ma rê zî wina bikerê. La wa bizanê ke ma do qet hemverê sîstem û îqtîdarî de sere çewt nêkerê.”