AMED - ATKyî semede sîyasetmedara kurde Aysel Tugluke raporê “nêeşkena zîndan de bimana” da. Avûkata Aysele, Reyhan Yalçindage dîyar kerde ke ê paweyê Aysele demêko zaf kilm de bêra veradayîş û wina vat: “Çi heyf do dimayê nê qonaxî bêra tedawîkerdiş.”

 

Semedê sîyasetmedara kurde Aysel Tugluk ke Zîndanê Hûmara 1ê Tîpê Fyê Kocaeliyî de yena tepiştiş, di serrî verê teşhîsê nêweşîya demansî amebî kerdiş. Sazgehê Tipê Edlî (ATK) dimayê di serran derheqê Aysele de raporê “nêeşkena zîndan de bimana’ da. Qerar, vizêr dimayê saetê xebate ame neqlkerdiş û yeno pawitiş ke Aysele bêra veradayîş. Labelê semedo ke qerar hema nêresabi verê destê Dozgeriya Înfazî ya Zîndanê Kocaeliyî, Aysele nêame veradayîş. Avûkata Aysele Reyhane da zanayîş ke qerarê ATKyî resayo verê destê sazgehê têkildar û paweyê ke Aysele mîyanê 1-2 saetan de bêra veradayîş. Reyhane dîyar kerd ke tedawîya Aysele bi nêzdîyê 2 serrî yo ameya peyserî û vat: “Çi heyf, do dimayê nê dest bi prosesê tedawî bêro kerdiş.”

 

Reyhane da zanayîş ke vera xebere înan rê bêro dayîş, xebere çapemenîye de ameya parekerdiş û vat: “Xebera ma dimayê saetê xebate virazya. Raporê ATKyî ewro heta hela serê sibayî zî bi hawayêkê fermî nêresabî zîndan û qerarê taloqkerdişê cezaya Dozgerîya Înfazî ya Kocaeliyî zî nêresabî verê destî. Bi destpêkerdişê mesaiyî dir ma reyna muracat kerd. Ma dima ra musayî ke raporê ATKyî resayo verê destê înan. wan. Hema zî nimûneyê raporê ATKyî nêdayê ma. Semedo ke nimûneyê raporî bidê ma û miwekîla ma bêra veradayîş, ma muracatê dozgerî kerd. Bawer a do mîyanê çen saetî, di saetî bêra veradayîş.”