ÎZMÎR - Çîlem Kuçukkeleşe da zanayîş ke serekkomar zî maseya 6ine zî hemverê elewîyan de eynî polîtîka de yenê têhet û vat ke sebebê dişmenîya îqtîdarî yê hemverê elewîyan no yo ke elewî bi cinîyan reyde rayîr şinê.

 

Serekkomar Tayyîp Erdogan 7ê teşrîna verêne de Dergahê Şahkulu Sultanî de Merasîmê Akerdişê Komî û Eştişê Temelî yê Keyeyê Cemî de dîyar kerd ke do Serekatîya Keyeyê Cemî awan bikerê û mesrefê Keyeyê Cemî do ê bidê, kadro do bidê kesê ke binê awanîya serekatîya Keyeyê Cemî de bixebetî. Dezgehê elewîyî zî dîyar kerdî ke no sîstemê qeyûmtî yo.

 

Komîsyonê Bawerî û Şaran yê demê verêne yê Partîya Demokratîke ya Şaran (HDP) ra Çîlem Kuçukkeleşe derheqê babete de ercnayîşan kerd.

 

Çîleme da zanayîş, eke AKP 2 serrî yo ke mudaxaleyê dezgehanê elewîyan keno û bi vatişanê ‘Elewîtîya Bê Elî’ elewîyan newera tasvîr keno û wina vat: “Serekkomar vano ‘ez sey Elî şêra camîî tewr zêde ez bena elewî’. Ma vînenê ke ma û Êlîyê ma rê vatişan erzeno. Eke serekkomar bimano Elî o wext ma nêmanenê Elî. Ma Elî sey esasê girdî yê elewîtîye vînenê.

 

‘Dewlete goreyê xo elewîyan awan kena’

 

Çileme dîyar kerde ke AKP derheqê elewîyan de 7 komxebatan pê ardo û wina dewam kerd: “Netîceyê de wezîfeyê ke ê danê elewîyan vetî raşte. Vatî ke ‘Xo rêxistinanê çep û marjînalan ra bixelisnê, ma Îslamî de bêrî têkişt. Sere de bêrêne tîya ke ma şima reyde probleman çareser bikerê.’ Dewlete xo gore wazena dîzaynêk viraza. Serekkomar şî zîyaretê dezgehanê girêdayeyê Mudirîya Pêroyî ya Weqfan yê sey Keyeyê Cemî yê Erîklî Baba Huseyîn Gazî ke bi qanûnê tekke û zaviyeyan deste elewîyan ra ameyî girewtiş. Serekkomar nê cayan sey cayê xo vîneno û goreyê xo dîzayn keno.”

 

‘Heme partîyî nizdîbîyayîşê dewlete nîşanê elewîyan danê’

 

Çîleme dewamê qiseykerdişê xo de bale ant nizdîbîyayîşê parîtyanê sîyasîyan û vat: “Partîyê sîyasî yê meclîsî sey polîtîkaya dewlete eynî nizdîbîyayîşî nîşan danê. Wextê Osmanîyan ra heta nika kehenperestîya partîyan de partî bedelîyayî la nizdîbîyayîş nêbedelîyayê. 1938î ra heta nika çîyê ke Dêrsim, Koçgirî û Gazî de ameyî cuyayîş reyde eleqeya înan esto. Tay komelî bi temamî ameyî çinîîkerdiş. Tay zî koçkerdişî vila bîyî. AKP binê serektîya Wezîrîya Kulturî de elewîyan keno daîre û vano ke ez do înan îdare bikera. Na polîtîka demêko dergo ke ver elewîyan de yena rayîrberdiş. Bi no hawa hewl danê ke îtîqat çinî bikerê. Elewî na rewşe sey ‘qeyûmbîyayîşî’ bi name kenê. Ma paştî danê. Maseya 6ine zî eynî nizdîbîyayîşî nişan dana. Vîşêrê HDPyî heme partîyî wayîrî eynî zîhnîyetî yê. Seba ke HDP xeta înan serûbin kerdo, hemverê HDPyî de hêrsin ê.”

 

‘Elewîyî CHPyî ra çîyêk nêpawenê’

 

Çîleme tewr bi vatişanê laîkbîyayîşî yê CHPyî, layîkbîyayîşî nêşixulneno û awankerdoxê dîyanetî yo qiseykerdişê xo peynî kerd û vat: “Bawerîya elewîyan êdî bi CHPyî çinî yo. CHP vano ‘Ma sîyasetî nasnameyî kenê.’ Esasê xo de nasname çinî hesibnenê. Şaredarîyê CHPyî zî manenê AKPyî. Ma vanêê ke komelê elewî eşkeno bêro girewtiş, la nêeşkeno teslîîm bêro girewtiş. Komelê elewî demokratîkbîyayîşêko pêroyî wazeno.”