RIHA - Zabitayê Şaredarîya Rihayî pankartê Keyeyê Şenyaşarî desteser kerdî. Polîsê verê edlîye keyeyî rê dîyar kerdî ke dozgerî pankart ra aciz bîyo û vatî, “Şima do meşte reyna bi daliqînê.” 

 

Nobeta Edaletî ya Keyeyê Şenyaşarî roja 595ine de dewam keno. Emîne Şenyaşare semedo ke nêweşe bî, nêameye verê edlîye û keyeyê xo yê Pirsûsî de nobeta xo dewam kerd. Ferît Şenyaşarî seke her roje ame verê Edliyeyê Rihayî û bi barîyerê betonî ra pankartê “Semedê Keyeyê Şenyaşarî edalet” daliqna û dest bi nobete kerd.

 

Cayê ke keye ci de nobete gêno, vernê de polîsan ra bi barîyerê asinî amebi ablûqakerdiş û serê reaksîyonan ra na rey zî Şaredarîya Bajarê Girdî ya Rihayî de ware açarnabi otoparkî. Ewro zabiteyê şaredarîya AKPyî, pankartê “Semedê Keyeyê Şenyaşarî edalet” wedarnayî û berdî.

 

Ferît Şenyaşar reaksîyon vera zabiteyan mojna. Polîsê verê edlîyeyî de Ferît Şenyaşarî rê diyar kerdî ke dozgerî pankart ra aciz bîyo û vatî, “Ewro pankart medaliqnê, şima do meşte reyna daliqnê.”

 

Ferît Şenyaşar semedê nêrazîbîyayîşê xo nîşan bido, pankartê fotografê pîyê xo Esvet Şenyaşar û birayê xo Adil û Celalî yê Nêweşxaneyê Dewlete ya Pirsûsî amebî qetilkerdiş ser de bi, bi bariyeran ra daliqna. Ferîtî reaksîyon vera zabiteyan mojna û dîyar kerd ke zabite vera ke hişyarî bikerê, ameyê pankartê înan desteser kerdê û diznayê. Şenyaşarî dîyar kerd ke ê do nê qebûl nêkerê û yê ke pankart ra aciz ê wa nêrê verê nê bînayan de nênişnê ro û wa edalet bica bîyarê û ê do zî şêrê keyeyê xo.”