WAN - Cinîyan hemverê hêrişê Tirkîya ke bi çekê kîmyewî başurê Kurdistanî de ca ardî, reaksîyon mojnayî û wîna bale antî serê rolê PDKyî yê hêrişî de: "No şero ke ameyo kerdiş, bi destê kurdan ameyo kerdiş. Bi hetkarîya înan ameyo kerdiş, sucê merdimayî û kesê bêveng manenê zî hemkarê nê sucî yê."

 

Tirkîya bi paştdayîşê Partîya Demokratîke ya Kurdistanî (PDK) hemverê herêmanê Zapî, Metîna û Avaşînî yê Başurê Kurdistanî de bi çekê kîmyewî hêriş kerdibi û 17 endamê HPG û YJA STARî ameyî qetilkerdiş. Derheqê caardişê çekê kîmyewî de her het ra reaksîyonî yenê mojnayîş û yeno dîyarkerdiş ke caardişê çekê kîmyewî sûcê merdimayî yo.

 

Wan de zî welatijan derheqê şuxilnayîşê çekê kîmyewî de reaksîyonê xo ardî ziwan.

 

‘Caardişê çekê kîmyewî sûc o’

 

Ulku Duzgune dîyar kerd ke nê  welatî de azadîya fikr û fehmî zî çin o û wina vat: "Nê welatî de kes nêeşkeno xo asan îfade bikero. Polîtîkayê şerî tesîr serê cuya ekonomî û ekolojîkî zî keno. Şer, tesîrêkê pîl serê cuya ma de keno. Caardişê çekê kîmyewî sûcêko pîl o. Zirarêko pîl dano ekolojî. Demo ke ekolojî biqedo cuya merdiman zî qedêna. Sûcê tewr pîl yê şerî, çekê kîmyewîyê. Çekê kîmyewî; merdiman, heywanan û xoza kişeno. Pêwa caardişê çekê kîmyewî qedexe yê zî Tirkîya nînan şuxilnena. Seke xeylêk çî nê zî peygoş kena. Şuxulnayîşê çekê kîmyewî sûc o. La şuxilnenê. Merdimî nê ra mirenê. Ganî vernîya ci bêro padayîş."

 

 

‘Îqtîdar berpirsîyar o'

 

Rumeysa Ergînyurek zî reaksîyonê xo yê hemverê caardişê çekê kîmyewî wina vat: "Îqtîdar, kesê ke merdê înan ra berpirs o. Hem temaşe keno, hem kişeno. Ma ê weçînenê, ma anê sereyê xo. Eke ma paştdayîş nêdê îqtîdarî, do nê çî nêameyîne ciwîyayîş. Ma xo bi xo kişenê."

 

 

‘Dinya bêveng a'

 

Aktîvîsta Tevgerê Cinîyan ê Azadan (TJA) Şukran Şen zî dîyar kerd ke caardişê çekê kîmyewî sucê merdimayî yo û ganî tu kes hemverê nê de bêveng nêmano û wina vat: “Dinyaya ke hemverê çekê kîmyewî vengê xo berz kena, hemverê qetilkerdişê 17 HPGîyijan bêveng a. No bi hemkarîya PDKyî yeno kerdiş. Ma nê qebûl nêkenê. Yê bêvengî hemkarê sûcî yê. Pêwa çekê kîmyewî qedexeyê, hemverê kurdan de yeno şuxilnayîş. Nê zî dîmenê çapemenîya dîjîtale de ameyê weşanayîş, baş yeno vînayîş. Qetilkerdişê ciwananê kurdan sûc o. Bêvengî zî sûco tewr pîl o."