STENBOL - Temsîlkara Sereka Pêroyî ya EMEPî Selma Gurkane dîyar kerd ke hêrişê bi çekê kîmyewî sûcêko giran o û va: "Ganî heyetê xoserî serê hêrişê kîmyewî de cigêrayîş bikerê.”

 

Temsîlkara Sereka Pêroyî ya EMEPî Selma Gurkane, derheqê hêrişê bi çekê kîmyewî de eşkerayîyêka nuşteyî da.

 

Selmaye reaksîyon nîşanê îqtîdarîye da û dîyar kerde ke herinda ke cigêrayîşê şixulnayîşê çekanê kîmyewîyan bêro kerdiş, tehdît yeno kerdiş. Selmaye daye zanayene ke Serekkomarê Tirkî Tayyîp Erdogan herinda ke derheqê îdîayan de cigêrayîş bido destpêkerdiş Şebnem Korur Fîncanciye tehdît keno û kesê ke şixulnayîşê çekanê kîmyewîyen dekenê rojeve tehdît keno û vat: “La hemverê nê îdîayan de çîyo ferz dîyar o. Ganî heyetêk xoser cigêrayîş bikero. Netîceyê cigêrayîşî zî rayaumûmîye reyde pare bikero û cewab bido persanê derheqê na babete. Şixulnayîşê ‘çekanê kîmyewî’ goreyê pêkerdişê huqûqê mîyannteweyî û dewletan sucêko giran o”

 

Selmaye reyna vate ke ganî heyetêko xoser derheqê şixulnayîşê çekanê kîmyewîyan de cigêrayîş bikero û netîceyê ci zî rayaumûmîye reyde pare bikero.