MERKEZÊ XEBERAN - MKGPyî semedê paştdayîşê cinîyanê rojnamegeran ê tepişteyan û nêtepişte yenê muhakemekerdiş, dest bi kampanyaya "Semedê cinîyanê rojnamegeran azadî" kerd.

 

Platformê Rojnamegeranê Cinîyan ê Mezopotamyayî (MKGP), semedê paştdayîşê rojnamegeranê tepişteyî û nêtepişteyî yenê muhakemekerdiş, dest bi kampanyaya "Semedê cinîyanê rojnamegeran azadî" kerd. Çarçewaya kampanyaya 6 aşmî de MKGPyî xeylêk kar da vernîya xo û seke beşê ewilî zî dest bi kampanyaya îmza kerd.

 

MKGPyî ke derheqê kampanyaye de metin weşana, da zanayîş ke azadîya çapemenîye, semedê averşîyayîşê komelî û cuyêka demokratîke girîng a. Dewam de wina ame vatiş: "Ganî têkoşînê azadîya çapamenîye û azadî û heqê cinî pîya bêro rayîraberdiş. No zî berpirsîyarîyê ma yê sereyîn o. Ewro Tirkîya de hemverê cinîyanê rojnamegeran de binpaykerdişê heqê cidî bi ca yenê. Tirkîya de tewr tay 10 cinîyê rojnamegerî yê tepişteyî estê. Derheqê bi desine cinîyê rojnamegeran de dewa ameyê akerdiş û xeylêk meslegdarê ma demê taqîbkerdişê xeberan de bi hêrişî dir rî bi rî manenê."

 

Venga paştdayîşî

 

MKGPyî venga paştdayîşî kerd û vat: "Ganî ma cinî têkoşînê xo tewr girs bikerê. Semedo ke ma sey MKGPyî paştdayîşê xo bi embazanê xo dir xurt bikerê, ma do serê medyaya dîjîtale de dest bi kampanyaya 'Semedê cinîyanê rojnamegeran azadî' bikerê. Çarçewaya kampanyaya xo de ma do bi heme meslegdaranê xo yê ke hemverê sansurî de têkoşîn kenê, yê tepişte û nêtepişte yenê muhakemekerdiş, wareyan de yenê astengkerdiş, mîyanê paştdayîşî de bê. Ma sere de semedê azadîya xebatkarê çapemenîye venga cinîyanê rojnamegeran, rêxistinê girseyî yê demokratîk, rayaumûmî kenê ke tewrê kampanyaya ma bibê."

 

Şima eşkenê serê lînkê cêrî de biresê kampanya  bigihêjin