ANQARA - Hemsereka Pêroyî ya HDPyî Pervîne Buldan bale ante hêrişanê kîmyewîyan ser û vat: ''Xeber û delîlê cidîyî rayaumûmîye de eşkera benê. Cade heyetê xoserî wa na babete de rolê xo kay bikerê.''

 

Hemsereka Pêroyî ya HDPyî Pervîne Buldan merkezê partîya xo de kombîyayîşanê hemserekanê cinîyan de qisey kerd.

 

Pervîne bi silamkerdişê cinîyê tepişteyan dest bi qiseykerdişê xo kerd û vat: ''Planê hêzê emperyalîst, faşîst û despotî hetê cinîyan ra yenê pûçkerdene. Ewro sloganê 'jin, jiyan, azadî' îdareyanê despotan binî ra lerzneno. Cinîyan vat jin, Rojawan de no veng bi jiyan û ewro zî Tehranî ra heta Parisî no veng gêreno. Ê serdestî têkoşînê cinîyan ra tersenê. Sere de xoverdayîşê cinîyanê Îranî pêro xoverdayîşê cinîyan do heta azadîye dewam bikerê. Cinîyî muyê gijikê Jîna û qelema Nagîhane Akarsel do erdî de meverdê.

 

Îqtîdarê AKP-MHPyî her roje cinîyan rê dişmenîya xo eşkera keno. Cinîyî nê krîzê ekonomîkî reyde hîna benê feqîr. Polîtîkayê şerî yê îqtîdarî benê sebebê nê krîzî. Îqtîdar pêro waranê cuye û cinîyan pêşkêşê sermaye û rantî keno. Dişmenîya kurdan, polîtîkayanê şerî, tecrîdê Îmraliyî, îşkenceyê zîndanan Tirkîya viste nê halî.

 

Rojanê peyênan de medya û rayaumûmîye de xeber û dîmenê serê şuxilnayîşê çekanê kîmyewîyan yenê vilakerdene ke cidî yê. Na rewşe do zerarêkê pîlî bidê pêro şaran. Verî na rewşe hîna giran nêba ganî nê rayîrî ra bêro agêrayene. Na babete ganî hetê heyetanê xoseran ra bêra cigêrayene, raştîye cade bêra eşkerakerdene û raştîye bêra mojnayene.

 

Çareserîye pê sîyalog û sîyasetî bena. Coka ma muracat kerd ke Îmrali de Birêz Ocalanî zîyaret bikerê. Ganî cade cewab bêro dayene muracatê ma û heyetê ma şoro Îmrali. No seba ameyoxê nê welatî elzem o.

 

Ma do sey cinîyan qetî meydanan meteriknê. Ma hedef kenê ke welatêko ke hetê cinîyan ra îdare beno, awan bikerê. Ma do vera terso ke îqtîdarî awan kerdo, her ca de têkoşînê xo berz bikerê. Demokrasî û edalet do bi têkoşînê cinîyan bêro. HDP zî garantîya nê vurîyayîşan o.Ez pê bawer a ke ma pêro pê nê ferasetî têbigêrê. Seserra 21. do biba seserra cinîyan.”

 

 Pervîne bi sloganê "Jin jiyan azadî" qiseykerdişê xo peynî kerd.

 

Kombîyayîşê hemserekê cinîyan ê HDPyî yê bajaran, çapemenî rê girewte ame dewamkerdiş.