Sema Çaglak

 

ŞIRNEX - Komeleya Ziwan û Kulturî yê Birca Belekî, kongreya xo ya yewin ê asayî organîze kerd. Endam û îdarekarê komeleye dîyar kerdî ke bi polîtîkayê asîmîlasyonî ra tewr zêde ciwanê kurdî  hedef yenê girewtiş û dîyar kerdî ke ê bi xebatê xo yê komeleyî amanc kenê ke vernîya qirkerdişê kulturî bigîrê.

 

Komeleya Ziwan û Kulturî yê Birca Belekî serra 22yê êlule 2019ine de Cizîrê Şirnexî de ame awankerdiş. Komela destpêkerdişê awankerdişê xo de hemverê polîtîkayê asîmîlasyonî, qirkerdişê kulturî û semedê averşîyayîşê kultur û ziwanê xebatê xo dewam kerdî. Komela 16ê teşrîna verêne xo ya yewin ê awarte organîze kerd dest bi xebata xo ya muracatê neweyî kerdî.

 

‘Ciwanê kurdî hedef yenê girewtiş’

 

Vervatoxa Komîsyonê Komeleya Ziwan û Kulturî yê Birca Belekî Meryem Eşkara, destpêkê qiseykerdişê xo de bale ant serê polîtîkayê asîmîlasyonî û dîyar kerd ke Botan de bi destê qayûmî hemverê kultur û ziwanê kurdkî de qirkerdişêk yeno kerdiş. Meryemw wina vat: “Ma prosesêko xeylêk  awarte ra derbaz benê ke her het ra hêrişê asîmîlasyonî hemverê şarî de yeno kerdiş. Nê qirkerdişî de zî ciwanê kurdî hedef yenê girewtiş.  Seke konser û festîvalê ke bi destê qeyûmî yenê kerdiş, dûrvistişê ciwanan ê kulturê înan yeno amanckerdiş. Hemverê na polîtîkaya asîmîlasyonî û qirkerdişê kulturî lazimîyêk bi nê rengî kongreye ame vînayiş. Xebatê komeleye nê wareyî de berpirsyarîyêkê pîl gêno. La ganî pêro şarê ma zî no het ra pawitişê kultur û ziwan de wezîfeyê xo bi ca bîyarê.”

 

‘Muracatê ma yê semedê perwerdeyî dest pêkerdî’

 

Meryeme, dewamê qiseykerdişê xo de dîyar kerd, neteweyêkê bi ziwanê xo, bîyayîşê xo bîyaye keno û vat: “Ziwanê kurdkî bi dewlemendîya xo yeno naskerdiş. La ewro wazenê ke no ziwano dewlemend çin bikerê. Melayê Cizîrî, Celadet Elî Bedîrxan, Meryem Xan û xeylêkê înan zerrîwazê semedê averşîyayîşê ziwanî xeylêk kedê pîlî dayê û pey xo de mîrasêk pîl verdayê. Wayîrvejîyayîşê nê mîrasî ewro serê milê ma pêro kurdan de yo. Ma zî sey taqîbkerdoxê înan, mîrasê înan rê wayîr vejîyê. No semedî ra ma  kongreya xo kerd û xebatê xo nê hetî ra ma kerd. Ma çarçewaya xebatê komeleya xo de perwerdeyê bi ziwanê kurdkî bidê destpêkerdiş. Muracatê ma yê semedê perwerdeyê ziwanî dest pêkerdî. No ware de semedê musayîşê ziwanê  kurdkî ma pêro şarî dawetê komeleye kenê. Sewbîna hetê kulturî ra tewir bi tewir çalakî û bernameyê ma estê. Wayîrvejîyayîşê ziwanî û kulturê kurdî, wayîrvejîyayîşê rûmetê Cizîra Botanî yo.”

 

‘Ma do xebata xo biserkewtişî aver berê’

 

Îdarekara komeleye, Fatma Gîzleyîcî zî wina vat: “Kultur û ziwan girêdayeyê yewbînan o. Eke ma vernê de ziwanê xo wayîr vejîyê, ma do xeylêk erjê xo vînî bikerê. Çi heyf, demê peyînan de tutî her ke şinê, ver bi asîmîlasyonî reyde rî bi rî manenê. Rolê dayîkan na babete de zaf o. Gani her keye bibo wendegeh û dayîkî bi tutanê xo dir ziwanê kurdkî qisey bikerê. Ma wazenê tutî kulturê xo bizanê û wayîr vejîyê. Bi xebatê xo yê komeleye, ma do hewl bide ke ziwan û kulturê kurdî nêdê xovîrrakerdiş. Ma bi xebatanê xo rol û mîsyonêk pîlî gênê û bawer ê ke do xebatê serkewteyî aver şêrê.”