MERKEZÊ XEBERAN - Îran û Rojhelatê Kurdîstanî de serewedaritişê şarî her ke şino beno pîlêr. Ciwananê Tehranî zî venga pêro kesan da ke wa çalakîyan pîlêr bikerê.

 

Cinîya kurde Jîna Emînî (22) Tehran de hetê polîsanê exlaqî yê Îranî ra seba ke gijikê ci asayêne 13ê êlule de ameye îşkencekerdene û 16ê êlule de zî dinyaya xo bedilnaye. Rojhelatê Kurdîstanî û Îranî de çalakîyê ke qetilkerdişê Jîna Emînî ra dima dest pêkerdbî, roja 29ine de bi sloganê 'jin, jiyan, azadî' dewam kenê.

 

Şaristanê Zahîdanî de vizêr şar reyna nimajê îneyî ra dima pê sloganan vejîya meydanan û vera dewleta Îranî sloganî berz kerdî.

 

Ahvaz de zî vengdayîşê çalakîkeranê ereban ser o kuçeyan de bi sloganê 'jin, jiyan, azadî' çalakîye ameye kerdene.

 

Seba ke çalakîyî vila nêbê selahîyetdaranê Îranî pêro xetê înternetî dayî birnayene.

 

Hetê bînî ra sere de Şîraz, Isfahan, Yezîd, Meşhed, Tehran de xeylêk şaristanan de çalakîyî û protestoyî bêmabên dewam kenê.

 

Seba çalakîyanê ewroyînî zî ciwananê Tehranî veng da. Ciwananê ke xo rê vanê 'Ciwanê Kirmaşanî' zî venga pêro ciwanan da ke çalakîyan rê bêmabên dewam bikerê.