Rojda Aydin

 

AMED - Tîyatroyê Bajarê Amedî mabêne 20 û 30ê teşrîna verêne de sloganê, “Va Cûdî û va ye ev ax” 8ine festîvala xo organîze keno. Kaybaze Berfîn Emektar, dîyar kerd ke temaşekerdoxê înan tewr zêde cinî yê û kayê înan hetê cinîyan ra eleqeyêk pîl vînenê. Semedo ke cinî tewr zêde wayîrê kulturê xo vejênê. 

 

Dimayê ke qayûm tayînê Şaredarîya Bajarê Girdî ya Amedî ame kerdiş, kaybazê Tîyatroyê Bajarî yê Amedî ke binê banê şaredarîye de kar û xebatê xo kenê, karê xo ra ameyî dûrvistiş. Nê ser de kaybazan 12ê Sibata 2017ine de Tîyatroyê Bajarî yê Amedî awan kerdî û ê wextî ra nata xebatanê xo dewam kenê. Pêwa pêro astengî û îmkanê kêmî zî tîyatroyê ke xebatanê xo dewam kenê, hetê şarî ra zî kayê ci eleqeyêk pîl vînenê. Tîyatroyê Bajarî yê Amedî ke bêmabêne xebatê xo dewam kenê, nika zî 8ine festîvala xo bi sloganê, “Va Cûdî û va ye ev ax”  do organîze bikero. Çarçewaya festîvala ke mabêne 20 û 30ê Teşrîna Verêne de bêro organîzekerdiş, 17 kayê tîyatroyî bêrê pêşkêşkerdiş.

Kaybaze Berfîn Emektar a derheqê festîvale de qisey kerd.

 

Berfîne, dîyar kerd ke semedê pandemî di serrî yo festîvale organîze nêkerdê û vat: "Semedê pandemîyî di serrî ma festîvale xo nêkerdibi. La ma nika reyke bîn festîvale xo organîze kenê. Na festîvale  semedê ma xeylêk muhîm o. Bi paştdayîşê qeyûman û Wezîrê Kulturî xeylêk festîvalê ke muhtewayê ci veng ê û kulturêk înan çin o, yenê organîzekerdiş. Bi nê festîvalan wazenê ke asîmîlasyonêko pîl bikerê. Semedê nê ma xeylêk muhîmî danê na festîvale ke ma organîze bikerê."

 

'Qirkerdişêko pîl yeno kerdiş'

 

Berfîne dîyar kerd ke festîvale 20 û 30ê teşrîna verêne sw bêeo kerdiş û vat: "Serê na herre de her het ra qirkerdişêk pîl yeno kerdiş. Nimûne; qirkerdişê xoza, kultur û hûnerî yeno kerdiş. Ma festîvale xo bi sloganê ‘Va Cûdî û va ye ev ax’ kenê. No name şîîrêka Arjen Arî de derbaz beno. Ma zî waşt ke festîvale xo bi nê nameyî organîze bikerê. Semedo ke nika hêrişê xozaya ma kenê. Cûdî de xoza yena qetilkerdiş û darê ma yenê birnayîş. Sey silamêke ma wazenê silam bidê Kurdistan. Xoza semedê ma tena çîyêk nêya. Xoza semedê ma pêro çî ya. No semed ra festîvala 8ine serê nê nameyî de bikerê."

 

‘Ma do vera asîmîlasyonê kulturî de vinderê’

 

Berfîne ard ziwan ke çarçewaya festivala ke do bêra viraştişî de 17 kaybazê tîyatroyî û diz î seminer estê û wina dewam kerde: “Seba festîvala kurdî çîyo tewr weş nizdîyê 9-10 kaybazê newe do festivale de bêrê mojnayîş. Tay kayî do Amed de reya yewine bêrê kaykerdiş. No seba ma çîyêko zaf weş o. Na rewşe sewîyeya ke tiyatroya kurdî ameya mojnayîş. Ma waşt ke çar parçeyê Kurdistanî ra kaybazan festivale de bimojnê. Bajaranê başûrê Kurdistanî ra Kerkûk, Dihok, rojhelatê Kurdistanî ra zî bajarê Urmîye kayê tîyatroyî do festîvalanê xo de bimojnê. Nê çend serranê peyênan de Rojawan nêeşka tewrê ci biba. Stenbol, Wan, Êlih û her çayo ke ci de tîyatroya kurdî esto de ma vat ma emserr tewrê festîvale bikerê. Goreyê îmkananê kêmî do festîvalêka mird û tekerde bêra viraştiş. Coka ra ma paweyê temaşekerdoxanê xo yê. vera festîvalê ke Amed de seba asîmîlekerdişî yenê viraştiş, ma pawenê ke wayîrvejîyayîşêko gird seba festivale virazîya. Ma do bi tewrbîyayîşêko xurt û coş festîvala xo peynî bikerê.”

 

‘Eleqeya seba tîyatroyê kurdî zêde ya’

 

Berfîne dewamê qiseykerdişê xo de ard ziwan ke tîyatroyê kurdî çend serranê peyênan de resaye merheleyêka xeylê berz û vat: “Tewrbîyayîşê festivale cayo ke tîyayatroyê kurdî ameyo ci mojneno. Eleqeyê tîyatroyê kayê kurdî de ma cayê tîyatroyê kurdî zelalî vînenê. Ma vînenê ke eleqeya seba tîyatroyê kurdî zêde ya. Tîyatroyê kurdî êdî mîyanê tîyatroyê cihane de eşkeno xo biname bikero. Festîvala ma ya emserrî de her çend ke kayê cinîyan zêde çinî bo zî reyna di kayê cinîyan estî. Nê kayan ra yew kayêko zaf weş ‘Dansoz’ o. Sewbîna kayê ‘Elîzabet’ zî esto. Seba ke cinî mîyanê kultur û hünere kurdî de rengê xo nişan danî, ma zaf kêfweş benî. Seba ma kêfweşî ya. Ma eşkenê vajî ke temaşekerdoxê ma tewr zêde cinî yî. cinî wayîrê kultur û ziwanê xo vejîyenê. Xo rê rayîrê azadîye gêrenî.”

 

‘Festîvala ma do mird û dekerde derbaz biba’

 

Berfîne tewr peynî veng daye û qiseykerdişê xo wina qedênaye: “Ma paweyê heme temaşekerdoxanê xo yî ke festivale de bêrî yew ca. Ma do festîvala xo 10 rojan tekerde û mird derbaz bikerî. Ma do 10 rojan bi tîyatro mird bikerî. No kêfweşîyêko gird o seba temaşekerdoxan. Ma paweyê temaşekerdoxanê yo yî û ma do bi kêfweşîyêko gird înan pêşwazî bikerî.”