Rabia Onver 

 

COLEMÊRG - Cinîyê ke 9ê teşrîna verêne de polîsan înan derb kerd û înan destbend kerdî û cigêrayîşê viran înan rê ame ferzkerdiş, desteştiş hemverê înan de ame kerdiş, wina vatî: “Do têkoşînê ma yê hemverê cigêrayîşê viran û îşkenceyî dewam bikero.”

 

Bi wesîleyê 9ê teşrîna verêne Roja serrgêra komployê mîyanneteweyî yê hemverê Rayberê PKKyî Abdullah Ocalanî xeylêk merkezan de bi hezaran kesî vejîyayî wareyan. Nînan ra yew zî Colemêrg bi. Polîsan mudaxaleyê girse kerd û tîya hîrê cayan de lingê Parlamenterê Îdirî Habip Eksikî ame şikinayîş. Pêwa avûkat û rojnamegeran 16 kesî hetê polîsan ra derb werdî û ameyî destbendkerdiş. Cinîyê ke ameyî destbendkerdiş bi îşkence û cigêrayişê viran dir rî bi rî mendî. 

 

Cinîyê ke bi îşkence û cigêrayîşê viranî dir rî bi rî mendî, vatî ke do  têkoşînê xo dewam bikerê.

 

'Hewayê serdî de ber akerde verdayî’

 

Hemseroka HDPyî ya Colemêrgî Sînem Sevene da zanayîş ke hêrişî bi zaneyîş ameyî kerdiş û wina vat: "Polîsan ma kerd binê ablûqa û îşkence, şîdet ma rê kerdî. Demo ke pêrodayîş vejîya zî ma destbend kerdî. Pêwa serd û hawa, varan zî bi, m abi saetan wesayît de destbendkerde verdayî û berî zî akerde bî. Heta ma berdî nêweşxane zî berî akerde bî. Embazê ma yê ke regl bî, estbî. Ma ped waşt la zaf erey dayî. Polîsêke nê eşnawit, vat; şima çira dayo?”

 

'Polîsan dest eştî ma’

 

Sineme da zanayîş ke dimayê nêweşxaneyî polîsan înan berdo emniyetê Geverî, uca de polîsêk dest eşto ci û vat: “Embazê ma yê ke destbend kerdî, yew bi yewe berdî nezaret. O wext ez û hemsereka ma ya bajarî ma tena wesayît de mendî. Hewa tarî bi. Polîsêkê roşnayîya telefonê xo tim dayîne ma û dima ra tefênayîne. Ma vat, ma nêrehet benê la reyna zî dewam kerd. Demo ke ma berdî nezaret vatî ke ganî şima pêro cilanê xo xo ra vejê. Ma qebûl nêkerd ma kuwayî. Semedo ke mi cigêrayîşê viran qebûl nêkerd bi saetan odeyêke serdine de mi vindarnayî. Demo ke mi berdî nezaret, mi silam da embazêke xo,  o wext polîsêke cinî ameye serê mi de û vat, ez o engiştanê to bişikinî.”

 

'Ma do gerreyê înan bikerê’

 

Hemsereka HDPyî ya Colemêrgî Humeyra Armut da zanayîş ke polîsan raste rast hêrişê girseyî kerd û vat: “Polîsan cayê ma bi qalxanan teng kerd, m abi zor helm girewtêne. Dima ra ez ameya destbendkerdiş, polîsan bi cope dayî sereyê mi ro.  Bi kîn û bi hêrs nêzdîyê ma bîne. Ma kuyayî û cigêrayîşê viranî serê ma de ferz kerdî. Hewa serd bi, ma batanî waştêne la nêdayî ma. Ma bi saetan awe waşt la aye zî nêdayî. Ma cigêrayîşê viran qebûl nêkenê. Ma do înan gerre bikerê û heta cigêrayîşê viran peynî bibo, ma do têkoşînê xo dewam bikerê.”

 

'Ma do têkoşîn bikerê’

 

Îdarekara HDPyî Gulcan Ceylane zî wina vat: “Destê ma kerdêne war. Ma vat, cigêrayîşê viranî suc o la bi zor ma rê ferz kerdî. Ma cinîyî hemverê cigêrayîşê viran û cinsperest têkoşînê xo dewam bikerê.”