AMED - Dozgerî 3ine roniştişê dewaya rojnamegere Bêrîtan Canozere de 7 serrî û 6 aşmî cezaya zîndanî waşt.

 

3in roniştişê dewaya ke derheqê muxabira ajansê ma Bêrîtan Canozere de bi îdiayê "Bi rayîrê çapemenîye propagandayê rêxistine kerda" 4ine Dadgeha Cezaya Giran ya Amedî de ame vînayîş. Bêrîtane beşdarê roniştişî nêbî, avûkatê aye Resûl Temur roniştiş de amade bi. 

 

Dadgehe dîyar kerd ke daîreyê îstînafî qerarê 11ine Dadgeha Cezaya Giran ya Amedî ya derheqê dosyaya bi hûmara 2019/879ine red kerdibi, avûkatê dosya zî semedê dosya berd Daîreyê Ceza ya Dadgeha Berzî. 

 

Dima ra avûkat Resulî heqê qiseykerdişî girewt û vat: “Eke dadgerî bendeyê agêrayîşê dosyaya Dadgeha Berzî vindarno, do tewr baş bibo.”

 

Meqamê îdîayî zî hemverê waştişê avûkatî vejîya û waştişê qerardayîşî kerd.

 

Heyetê dadgehe, qerar da ke do paweyê qerarê Dadgeha Berzî nêvinderê, semedo ke do tesîr serê na dosya de nêkero.

 

Meqamê îdîayî mütalaaya xo de bi sebebê "Bêrîtane hesabê xo yê medyaya dijîtale de xeylêk reyan tarîxê cîya de vengdayîşê ke mîyan de şîdet esto pare kerda” û 7 serrî û 6 aşmî cezaya zîndanî waşt.

 

Avûkat Resûlî zî semedê pawitişî dem waşt. 

 

Heyetê Dadgehe waştişê avûkatî qebûl kerd û roniştiş taloqê 17ê teşrîna verêne kerd.