Sema Çaglak

 

ŞIRNEX - Eşyayê Abdullah Hezero ke 12 serrî vernîya nika pêrodayîş de dinyaya xo  bedelnabi, 26ê êlule de teslîmê dayîka ey Ayşe kerdî. Ayşe wina qal kerd: "Mîyanê çanteyî de cilê, tizbihe, saete, giştane û şapqeyê ey estbi.  Waştî ke dejê min ê 12 serran newe ra gane bikerê.”

 

Ayşe Hezera ke herême de bi têkoşîn û xoverdayîşê xo yena naskerdiş, pêwa teda û zulmê dewlete tim xoverdayîşê xo dewam kena. Kênaya aye Bîşenge 3yê gulana 2021î de Herêma Federal a Kurdistanî de netîceyê hêrişê çekê kîmyewî de ameye qetilkerdiş û îşkence bi cenaze ame kerdiş, 26ê êlule de çîyê lajê aye Abdullahî serra 2010ine de ame qetilkerdiş, teslîmê ci kerdî.

 

Derheqê teslîmkerdişê eşyayê ci yê dimayê 12 serran de Ayşe hîs û fehmê xo ajansê ma rê ard ziwan.

 

Ayşeya 64 serrî, dewa Cirahî ya girêdayê qezaya Hezexî de ameya dinya. Keyeyê Ayşe, semedê zulmî verê xo da Mêrsîn û nêzdîyê 12 serran uca de mendî. La dima ra agêrayî serrê herra xo. Di birayê aye destpêkê awankerdişê PKKyî de tewrê PKKyî bîyê û serra 90î de zî dinyaya xo bedelnayê û hema zî cenazeya înan nêameya vînayîş. Di birazayê aye zî hemverê zulm û nêheqî hemverê kurdan de qebûl nêkerd û beşdarê Tevgerê Azadîye bîyî.

 

'Hemverê zulmî de rawuştî…’

 

Ayşeya ke 10 tutê xo mîyanê şert û mercê zehmetî de pîl kerd, tim raştê zulmê dewlete yena. Lajê aye pîl Abdullah Hezer serra 2004ine de tewrê PKKyî beno. Dimayê tewrbîyayîşî, polîsî tim erzenê serê keyeyê înan. Serra 2010ine de Abdullah serê pirda Cizîrî de netîceyê pêrodayîşî de dinyaya xo bedelneno. Sewbîna lajê ke aye zî Stenbol de 13 serrîya xo de yeno tepiştiş û bi îşkence paşta ey şikinenê, dimayê ke serbest yeno veradayîş, ci rê 125 serrî ceza birnenê. La o vera xo dano Ewropa. Lajêkê aye zî dimayê 5 serran zîndan de maneno, verê xo dano, Tevgerê Azadîye. Sewbîna kênaya aye Bişenge zî serra 2014ine de tewrê Tevgerê Azadîye bena û herêma Avaşîne ya Herêma Federel a Kurdistanî 3yê gulana 2021ê de bi çekê kîmyayî dinyaya xo bebelnena. Kênayêka aye semedo ke qeza kerd û rewşa aye baş nêbi, semedê tedawî bivîna, aye zî verê xo da Ewropa.

 

'Bi çekê kimyayî kênaya mi qetilkerdî'

 

Ayşe demê vîyarte de semedê kênaya xo Bişenge wina qisey kerdebî: "Bîşenge 7 serrî mîyanê tevgerî de mende. Mi televîzyon de eşnawit ke şehîd bîye. Bi çekê kîmyayî amebî qetilkerdiş û dima ra xeylêk îşkence cenazeya kênaya mi rê kerdibî. Dewlete bi xo hesabê xo yê dîjîtale de pare kerdibi. Kênaya mi viran kerdibî û bi erdî dir kaş kerdibî. Dima ra îşkence kênaya mi rê kerdibî. Wexto ke ê çî yenê vîrê mi zerrîya mi zaf veşena. Çira tu dewlete yan zî sazgehî hemverê nê de vengê xo berz nêkenê?”

 

'Dozgerî çenteyêk da mi'

 

Dewleta ke her tim wazena dejê nê dayîkan gane verdo, muracatê her tewir metodî kena. Yew nê metodan hemverê Ayşe de kerd. Ayşe wina qal kerd: "20ê êlule de dayîka mi nêweşxaneyê Amedî de wefat kerd. Semedo ke ma cenazeya aye bigîrê û bîyarê Hezex ma kewtî rayîr. O wext emniyetî mi gêra û vat, 'ganî ti bêrê emnîyet’ mi zî înan ra vat, şînê mi esto û ez nêeşkena bêrî. Labelê semedo ke bawer nêkerdî, demo ke ma ameyî Hezex nuqtaya cigêrayîşî de semedê teyîdkerdişê cenazeye Amedî rê telefon akerdî û dima ra verdayî ma derbaz bibê. 26ê êlule de ez şîya emnîyet û uca ra mi şawitî dozgerî û uca de çenteyêke dayî mi.”

 

'Dejê 12 serran newe ra gane kerdî’

 

Ayşe demê qalê nê çîyan kena, zaf hîsgêr bena û wina vana: “Mîyanê çanteyî de eşyayê lajê mi estbî. Cilê ey, tizbîhe, saete, giştane û şapqeya ey... Mîyanê  çanteyî de bî. Ez xeylêk pê dejeya. Seke lajê mi reyke bîn şehîd kewt, mi hîs kerd. Pêro vîrardişê ey verê çimanê mi de reyke bîn gane bî. Dimayê 12 serran dima, çi heqê înan esto ke zulm bima bikerê.”

 

‘Ez o tim pawitişê dewaya tutanê xo bikerî’

 

Ayşe dewam de wina vat: "Ez bi tutanê xo serberz a û bi têkoşînê înan zî şa ya. Ê semedê heqê ma, canê xo kerdî qalxan. Ma xeylêk bedelê giranî dayî. Di tutê mi  şehîd ê, di birayê min şehîd ê û ez pey dewa û têkoşînê înan a.”

 

'Ez nê zulmî xo vîr ra nêkena’

 

Ayşeya ke nika Heze de ciwîyena, tewr peyîn wina vat: “Gama ke lajê mi şehîd kewt, çira eşyayê ey teslîmê mi nêkerdî û dimayê 12 serran dima eşyayê ci dayî mi. Wazenê ke dejo bîyaye reyke bîn gane bikerê. La ez tu wextî nê zulmî û hêrişan xo vîr ra nêkena.”