Melîke Aydin

 

ÎZMÎR - Meclîsê Cinîyan ê HDPyî yê Îzmîrî qezayan de dest bi xebata atolyeyan kena û atolyeyî do 4 hewteyî dewam bikerê. Îdarekara HDPyî ya Îzmîrî Mehtap Alîşan, dîyar kerd ke organîzekerdişê atolyeyan, semedê cinîyan muhîm o û vat: “Cinîyî, atolyeyan de xo nas kenê, tecrubeye xo pare kenê û mekanîzmayê berardişî awan kenê.”

 

Meclîsê Cinîyan ê Partîya Herêmê Demokratîkî (HDP) yê Îzmîrî, dest bi xebata atolyeyan kerd. Atolyeya ewilî bînaya Rêxistina HDPyî ya qezaya Karşiyakayî de ame kerdiş. Sewbîna do qezayanê bînî yê Îzmîrî de zî atolyeyî bêrê organîzekerdiş. Her atolye do 4 hewteyan dewam bikero. Atolye de do cinî tecrubeyê xo yê cuye û têkoşînî parebikerê.

 

Derheqê babete de îdarekara HDPyî ya bajarî Mehtep Alîşan ajansê ma rê qisey kerd.

 

Mehtape, destpêkê qiseykerdişê xo de bale ant serê vetişê atoleyeya yewin ê qezaya Karşiyakayî û vat: “Sere de ma xeylêk endîşeyîn bî. Gelo do senîn bo? Ma do senîn bikerê? Labelê dimayê ke atolye destpê kerd, cinîyî tecrubeyê xo parekerdî, pêro endîşeyî ma vila bî. Ma dî ke lazimî bi xebatêke bi nê rengî esta. Bi xususî ma xeylêk reyan meydanan de mîyanê xebatan de nêyê labelê mekanîzmayê bi nê rengî yê newekerdişê ma aver nêberdibi. Amancê ma tîya de averşîyayîşê mekanîzmayê newebîyayîşî yo. Rewşa xo, sewîyeya xo, ma ça de yêi ma senîn saz kenê, ma ê çîyan reyke bîn xo ra pers kenê. Atolye de ma sere de serê manaya nameyê xo de vindertî û ma têkilîyê mabêne  name û bedenê xo de cipersayîş kerd.”

 

Mehtape, dîyar kerd ke do atolye 4 hewteyan dewam bikero û wina vat: “Nê atolyeyan de ma serê têkilîdayîşê cinîyan ê yewbînan taqîb bikerê. Ma do hewl bidê ke yewbînan nas bikerê û xo bidê naskerdiş. Ma do cîyayî û dewlemendîya xo vejê werte. Xeylêk reyan semedê cuya rojane, ma cîyabîyayîşan ra çîyan nêvînenê. Ma xo ra û bedenê xo ra dûr kewenê.”

 

Mehtape, dîyar kerd ke demêk derg o waştê xebatêk wina bikerê û vat: “Çîyo ke ma bi ca ard, xeylêk bi erj o. Peynî de cinîyan bale ant serê muhîmîyê na xebate. Ma çiqas yewbînan ra cîya bê zî semedê yewîye û xebatêke hempar na atolye girîng bî, ma resayî nê amancî. Na xebate semedê ma xeylêk muhîm a. Sewbîna na xebate do qezayê bînan de zî dewam bikero.”