Hêlîn Asmîn

 

QAMIŞLO - Derheqê serrgêra şehadetê Hevrîn Xelef, Hemsereka Kantonê Qamişloyî û hemrayê Hevrîne, Perwîn Yûsif bale ant serê têkoşîn û vîrardişê Hevrîne û wina vat: "Hevrîne timî mîyanê xoverdayîşî de bî.”

 

Hevrîn Xelef 12ê teşrîna verêne 2019ine de serê rayîrê M4î de komê girêdayeyê dewlata tirke ra bi wehşî ameye qetilkerdiş. Hevrîn Xelefe Endama Desteyê Sekreterê Pêroyî ya Partîya Sûrîyeya Ameyoxî ya Sûrîye bî. Hevrîn Xelef serra 1983ine de bajarê Dêrikî de mîyanê keyeyêkê welatparêzî de ameye dinya. Hevrîne wendişê xo yê sereyîn, amedekarî û mîyanên, mektebê bajarê Dêrikî de wend. Hevrîne wendişê xo yê unîversîta, muhendisîya ramitişî derbazê bajarê Helebî bî. Hevrîne bi destpêkerdişê şorişê Rojawanî de 19ê Temmuze 2012ine de bi hawayêkê çalak beşdarê şorişî bî. Hevrîne demêko kilm de wezîfeyê îdarekerdişê encumenê ekonomî bajarê Qamişloyî de kerd. Hevrîn Xelefa ke bi hawayêkê çalak mîyanê kar û xebatan de cayê xo girewt, hetê komê girêdayeyê dewleta tirke ra ameye qetilkerdiş. Hemraya Hevrîn Xelefe, Perwîn Yûsif derheqê cuye û têkoşînê Hevrîne û vîrardişê xo yê ci dir qisey kerd.

 

'Hevrîne tim mîyanê xoverdayîşî de bî’

 

Hemraya Hevrîn Xelef, Perwîn Yûsif derheqê vîrardişî de wina vat: ''Ez û Hevrîne embazê yewbînan ê taxe bî.  Hema o wext min û Hevrîne qijîya xo de bi dizdî perwerdeyê tîpê kurdkî dîne. Semedo ke Sûrîye de wendiş û nuştişê kurdî qedexe bi. Hevrîne tutîya xo de zî jîyatî bî. Ma o wext şîne xebatê kultur û hunerî. Semedê amadekariyê Newroze, Hevrîne ma tim hişyar kerdêne, semedo ke ma hîna baş fam bikerê. Semedo ke rejîmê Sûrîye o wext nêverdayîne ma Newroze pîroz bikerê, ma tim nimite amadekarî kerdêne. Hevrîne her tim embazê embazê xo bî. Semedê nê heme embazê ci vindertişê Hevrîne ra bi tesîr bîne. Hevrîne tutîtî û ciwanîya xo ra her tim mîyanê xoverdayîşî de bî, cuye de tim çalak û gane bî. Hîsê aye yê  welatperestî xurt bî. Vernîya Şorişê Rojawanî heme dewanê Dêrîkî de ma kombîyayîşê ciwan û tutan viraştêne, heta Şorişê Rojawanî dest pêkerd zî Hevrîne rayberê ma bî. Bi 19ê Temmuze dir hîn çalak bî û pêro sewîyeyê Şorişê Rojawanî de rolêkê muhîm girewt.''  

 

'Hevrîne bi heme hêza xo tewrê averşîyayîşê şorişî bî' 

 

Perwîne da zanayîş ke Hevrîne semedê şoriş mende bikero, her tim bi hawayêkê felsefîk û bi zanistî nêzdî bîne û vat: "Şorişê 19ê Temmuze semedê pêro cinîyê Rojawan çîyêkê newe bi, rayîrê çareserî bi. Hevrîne destpêkê şorişî de tewrê ciwanan bî. Hevrîne bi heme hawayî tewrê kar û xebate bîne. Xebatê akademîye heta ekonomî, temamê karan de ca girewte. Hevrîne yew sanîye nêvindertêne, bi pêro hêzê xo semedê averşîyayîşê şorişê kar kerdêne. Xususî muhîmî dayîne fikir û waştêne komelî hetê fikrî de perwerde bikero. Hevrîne Akademîya Komelê Demokratîke de perwerde dayîne, eynî wextî de semedê averşîyayîşê Kongreya Starî, bi cinî û ciwanan dir kombîyayîş viraşt. Destpêkê şorişî, heta awanbîyayîşê Îdarekarîya Xoserî milê sazbîyayîşî de kar ameyîne kerdiş. Hevrîne zaf muhîmî dayîne awanbîyayîşê sîstemî. Xususî awanbîyayîşê Îdarekarîya Xoserî de rolêkê aye ya muhîm estbi. Hevrîne bi her tewr bi eşqêko pîl tewrê şorişî bî. Hevrîne semedê bieşko şoriş bido naskerdiş, xeylêk metodê tewir bi tewir şuxulnayîne. Bi rayîrê tîyatroyî waştêne cinîyê  Sûrîye de ciwîyenê, pêrûne tewrê şorişî bikero.'' 

 

'Hevrîne waştêne Şorişê Rojawanî bi temamê dinya de bido naskerdiş'

 

Perwîne dewam de wina vat: ''Hevrîne 2014ine ra heta 2018ine semedê mendebîyayîşê şorişî kar kerd. Dimayê awanbîyayîşê Îdarekarîya Xoser dest bi karê sîyasetî kerd. Serê nê bingehî de dest bi awanbîyayîşê Partiya Sûriya Ameyoxî kerd. Semedo ke Hevrîne vatêne, şorişê ma bi şarê Sûrîye dir do mende bibo. Serê nê esasî de semedê pêro şarê ke Sûrîye de ciwîyenê, bieşkê temsîliyetê xo nê şorişî de bivînê, na partî ameye awankerdiş. Hevrîne waştêne Şorişê Rojawanî bi temamê dinya bido  naskerdiş. Waştişê Hevrîne awanbîyayîşê Partiya Ameyoxî semedê Sûrîyeya pêroyî bi, semedê zafrengî yê  Sûrîye bêro asayîş, pêro pêameyê Sûrîye yewbînan nas bikerê, pîya biciwîyê û têkoşîn kerdêne. Hevrîne cinîyêke kurde bî la şexsê xo de temsîliyetê pêro şaran kerdêne. Amancê Hevrine awankerdişê Sûrîyeyêke azad bi."

 

'Kiştoxê Hevrîn Xelefe Erdogan o'

 

Perwîne da zanayîş ke cinîyê têkoşer hedef yenê girewtiş û vat: '' Demo ke ma ewnîyenê roja ewro ra sey Hevrîne verdayê ke şoriş bêro na sewîya. Semedê nê, nê cinîyê rayberî hedef yenê girewtiş.  Amancê hêzê îqtîdarî çinkerdişê şorişî yo. Semedê nê cinîyan kenê hedef, nê cinîyan ra yew zî Hevrîn bî. Şexsê Hevrîne de waştêne projeyê Sûrîya azad û şorişê ma veng vejê. Hedefgirewtişê cinîyê azadan, hedefgirewtişê fikrê azadî yo. Ma  destpêkê şorişê xo biewnê, heta nika her tim cinîyê semedê şorişê rayberî kerdî, ameyê hedefgirewtiş. Semedê zîhnîyetê faşîst ê Erdogan û çeteye ci, her tim cinîya azad û fikrê azad ra terseno. Hedefgirewtişê Hevrîne zî nê dano dîyarkerdiş. Heme dinya zano ke kiştişê  Hevrîne, Erdogan û çeteye ci yê. Verê çimanê pêro dinya de heta nika zî rojane tehdîd Vakur û Rojhelatê Sûrîye keno.”

 

'Dîlan û govenda azadîye dewam kena’

 

Perwîne tewr peyîn wina vat: ''Bi şehadetê Hevrîne dir bi qasê ke ma dinyayêke rîsîya dî. Eynî wextî de ma Rojhelatê Mîyanên de û pêro dinya de cinîyê azadîwaştoxî zî dî. Hêzê hegemonîk ke wazenê cuye verê çimanê ma de sîya bikerê, ma eşkenê na cuye bi toxumê azadîye newe ra awan bikerê. Wayîrvejîyayîşê fehmê Hevrîne wayîrvejîyayîşê dewaya Hevrîne yo. Semedê heta nika polîtikayê înkar û îmhayî serê ma de yeno kerdiş û wazenê şorişî bere. Heta kiştoxê Hevrînan serbest bê û heta nê kiştoxî dadgerîya dinya de nêrê muhakemekerdiş û nêrê mehkûmkerdiş, do wina bo. Semedo ke yê ke nê çeteyan şawitî serê herra ma û Hevrîne şehîd vistî, heta nika serbest gêrenê. Hêzê mîyanneteweyî zî hemverê nê de bêveng ê. Semedê lazim o bi her hawa ma têkoşînê xo bikerê û sewîyeya têkoşînê xo berz bikerê. Semedo ke ma bieşkê hemverê îşxalkerdişî vinderê. Bi  israrê azadîye û yewîya cin3iyan ma do bieşkê dinyayêke bi fikir û fehmê Hevrînan awan bikerê. Semedê nê zî ez eşkena vajî, dîlan û govenda azadîye rayberîya fikir, fehm û xeyalê Hevrînan dewam o. Çîyo ke yeno waştiş pîlkerdiş, berzkerdiş û dewamkerdiş o.”