Rojda Aydin

 

ÊLIH - Cinîyê Êlihî, Dîlok û Wanî bale antî serê binpaykerdişê heqê tepişteyan û vatî: "Tirkîya de edalet nêmendo. Hem serê tepişteyan û hem zî teber de hemverê şarî de zulmêko pîl esto. Ganî kurdî bibê yew û hemverê zulmê vera tepişteyan de wurzê serê peyan."

 

Tepişteyê zîndananê Kurdistan û Tirkîya de yê, heqê xo yê sereyîn ra bêpar yenê verdayîş, rastê îşkenceyêkê pîlî yenê. Pêwa xoverdayîşê tepişteyan zî Amed, Stenbol, Îzmîr û Wan de pêwa teda û zulmî çalakîya xo ya "Nobeta Edaletî" bêmabên dewam kenê. Venga wayîrvejîyayîşê tepişteyê nêweşî û xoverdayîşê tepişteyan yeno kerdiş.

 

Derheqê babete de Hemsereka Partîya Herêmê Demokratîke (DBP) ê qezaya Elbakê ya Wanî Îlknûr Aydin, Dîlok ra Kamîle Aras û ji Êlih ra Hedîye Demîre ajansê ma rê qisey kerd.

 

‘Çira tepişteyanê ma yê nêweşan vera nêdanê?'

 

Îlknûr Aydine, binpaykerdişê heqan û tedayê ke serê tepişteyan de yeno kerdiş  şermezar kerd û vat: "Ewro pêwa Aysel Tûglûke, xeylêk tepişteyê nêweşî nênê veradayîş. Semedê nê zî ma ewro zî hemverê tedayê ke hemverê tepişteyan yeno kerdiş, vinderê. Her roje zîndanan ra cenazeyî vejênê û no çî zî xeylêk tesîr serê ma de keno.  Ne tebera, ne zî zere de heq, huqûq û edalat çin o. Bawerîya ma bi edaletê dewlete nêno. Tu asayîşê ma yê şaran çin o. Her roja ke ma aya benê, bi caardişêkê cîya dir rî bi rî manenê. Wazenê heskerdişê ma yê cuye, çin bikerê. Çira tepişteyê ma yê nêweşan vera nêdanê? Sebebê nê çî çîyo? HEmverê nê zulmî de ganî ma yewîya xo awan bikerê. Eke ma bibê yew, hemverê nê zulmî de vinderê."

 

‘Edalet Tirkîya de çin o'

 

Kamîle Arase, dîyar kerd ke lajê aye zîndan de yo, 100 serre ceza ci rê ameya birnayîş û wina vat: "Nê tepişteyan ra yew zî lajê min o. O, Bêdlîs de serra 2017ine de ame tepiştiş. Bi 6 mengî yo hûcreyê yew kesî de yeno tepiştiş. Tedayêkê pîl serê înan de yeno kerdiş. Hûcreyê yew kesî de bêsûc û sebeb yenê tepiştiş. Wa êdî Şarê Kurdî wurzê serê payan û dest bidê destê yewbînan. Wa şarê Kurdî vajo, êdî bes o. Heta key do no zulm dewam bikero. Heme kesî vînenê ke tedayê senî serê tepişteyan de estê. Tena serê tepişteyan de ney, serê ma de zî teda kenê. Zîndanan ra cenazeyî vejênê. Edalet Tirkîya de çin o. Eke edalet bibayîne, do teda nêameyîne kerdiş. Eke edalet bibayîne do 2017ine de tepişteyê ke kewtî grevê vêşanîye do edalet bi ca ameyîne. La edalet  verê ra heta ewro çin o. Zulmêk pîl serê kurdan û tepişteyan de yeno kerdiş. Zîndanan de her roje cenezeyêke vejêna. Keyeyê Erziromî cenazeya lajê xo torbayêk de girewt. Eke edalet bibayîne, a cenaze do torbayêk de nêameyîne dayîş. Dinya pêro şahidîya nê zulmî kena. Labelê çim û goşê xo padaya."

 

‘Veng bidê vengê tepişteyan'

 

Kamîle, bale ant serê grevê vêşanîye û vat: "Hemverê zulmê ke serê tepişteyan de yeno kerdiş, tepişteyî reyke bîne dest bi grevê vêşanîye kerdî. Lajê mi zî vatçne ma do dest bi grevê vêşanîye bikerê. Hukmat semedê tutanê ma tu game nêerzeno. Wa şarê Kurdî wayîrê xo vejîyê û veng bidê vengê tepişteyan. Ma na bêvengîye bişikinê û veng bidê vengê tepişteyan û înan biresnê azadî."

 

‘Ê do nêeşkê vengê tepişteyan bibirnê'

 

Hedîye Demîre, zî wina vat: "Ewro heqê tepişteyan yeno binpaykerdiş. Sewbîna zîndanan de her roje cenazeyî vejênê. No çî zaf zerrîya ma veşneno û ma zaf xemgîn ê. Dewletêke wehşî û zulmkar a. Pêro qanûnan kerdê destê xo û goreyê waştişê xo kenê. Labelê ê cenazeyê ke zîndanan ra vejênê bi şikdar ê. Ê tepişteyanê ma kişenê. La helbet do no zulm zî peynî bibo. Zulm kesî rê nêmendo û do dewlete rê zî nêmano. Amancê dewlete oyo ke Şarê Kurdî çin bikero. Semedê nê zî kesê ke azadî  wazenê, ewro mîyanê çar dêsan de yenê tepiştiş. Ê tepişteyî semedê fikr û fehmê xo mîyanê çar dêsan de yenê tepiştiş. Bi tepiştişî wazenê ke dest bidê serê fikrê înan. Labelê tu kes nêeîkeno dest bido serê fikr û fehmê şarê Kurdî. Ê do nêeşkê vengê tepişteyan bibirnê."

 

'Wurzê serê lingan'

 

Hedîye tewr peyîn qiseykerdişê xo de wina vat: "Xeylêk reyan ma şî verê berê zîndanan û ma çalakî kerd. Embazê ma rastê hêrişê polîsan ameyî. Ameyî destbendkerdiş û tepiştiş. Ganî şarê kurdî hemverê zîhnîyetê yew dewlete, yew ziwan û yew ale de vejîyê û wurzê serê payan."