Rojda Aydin  

 

DÊRSIM - Platformê Kede û Demokrasî yê Dêrsimî, 8ê teşrîna verêne de hemverê talankerdişê xoza ke bi sloganê, “Ma do serbikewê, ma wareyê cuye pawenê" mîtîng organîze bikerê. Endama HDPyî ya Dêrsimî Besîme Goke qisey kerd û venga pêro kesan kerd ke wayîrê xoza vejîyê û nê talanî bidê vindarnayîş.

 

Platformê Ked û Demokrasî yê Dêrsimî, do 8ê teşrîna peyêne de yanî meşte bi sloganê, “Ma do serbikewê, ma wareyê cuye pawenê" Meydanê Seyîd Riza de mîtîngêkê herêmî organîze bikero. Endamê partîyê sîyasî û rêxistinê komelî yê sivîlî bi rojan o semedê mîtîngî xebate kenê û vengdayîş kenê.

 

Endama Partîya Demokratîke ya Şaran (HDP) ya Dersimî Besîme Gok, derheqê mîtîngêko hemverê talankerdişê xoza bêro organîzekerdiş de qisey kerd.

 

‘Hemverê xoza de şerêko taybet yeno kerdiş'

 

Besîme, dîyar kerd ke xeylêk bajaranê Kurdistanî de polîtîkayê şerî yê taybetî yenê kerdiş û vat: "Nê bajaran ra yew zî Dêrsim o. Dêrsim de hemverê xozaya ma şerêkê ameyo destpêkerdiş. No şer newenêyo. Verê ra esto û heta ewro dewam keno. Wexto ke merdim demê verê ewnîyeno, serrê 38ine de qirkerdişê merdimayî estbî û no çî heta ewro zî dewam kerdo. O wext zî darî ameyî veşnayîş û xoza ameya talankerdiş. Nika zî no çî dewam keno. La verê nê de bi viraştişê awbend  û HESan xoza hema yena talankerdiş. Ma heme zî baş zanê ke bi viraştişê nê awbendan çiqas merdimî, gane û heywanî tesîrê nê çî vînenê. No qirkerdiş verê ra heta nika bêmabên dewam kerdo. Dêrsim de se serre yo, hemverê hêrişî yenê kerdiş. Xêrcê nê çîyan, nika wareyê madenî zî ameyê akerdiş. No çî zirarêko pîl dano xoza. Sewbîna Hozat de nika qirkerdişê xoza esto. Yanî bi kilmî bi qirkerdişêk dir ma rî bi rî yê."

 

Vengdayîşê semedê mîtîngî

 

Besîme, tewr peyîn qiseykerdişê xo de venga heme heskerdoxê xoza kerd û vat: "Ganî her kes wayîrê xoza vejîyo û semedê nê ganî heme kesî mîtîng de bê. Ma xozaya xo madenan, awbendan û HESan ra pawenê û vengê xo berz kenê. Ma xo, xoza, ganî, awe û koyanê xo pawenê û vengê xo berz bikerê. Serê herra ma de polîtîkayê şerî û asîmîlasyonî yenê kerdiş. Ma wayîrê xozaya xo vejîyê."