WAN - Cinîyan reaksîyon vera qetilkerdişê rojnamegere û edîtora kovara Jîneolojî Nagîhan Akarsele dayî û vatî: “Qetilkerdişê Nagîhane, mesajêke eşkera yê hemverê xoverdayîşê cinîyanê kurdan o. Ma no mesajî girewt. Ma do her ware de têkoşînê xo berz bikerê. Ma venga pêro cinîyan kenê ke vejîyê meydanan."

 

Tehranê Îranî de cinî bi nameyê Jîna Mahsa Amînî ya 22 serrî ke hetê ‘polîsê ahlaqî’ yê girêdayeyê rejîmî ra bi îşkence ameyî qetilkerdiş û dimayê 16ê êlule xoverdayîşê cinîyan dewam keno. Pêwa bajarê Rojhelat û Îranî de Rojhelatê Mîyanên, Kurdistan û xeylêk welatê bînan de çalakîyê  protestokerdişî dewam kenê. Yew cayê bînî ke cinî hedef yenê girewtiş û qetilkerdiş zî Herêma Federal a Kurdistanî ya. 4ê teşrîna verêne de saetê siba de bajarê Silêmanîye de rojnameger û edîtorê kovara Jîneolojî Nagîhan Akarsele netîceyê hêrişê çekdarî de ameye qetilkerdiş.

 

Reaksîyonê hemverê qetilkerdişê Nagîhane dewam kenê. Cinîyê Wanî zî reaksîyon mojnayî û wina venga berzkerdişê xoverdayîşî kerdî.

 

‘Ma mesaj girewt, ma do xo rêxistin bikerê'

 

Endama Partîya Demokratîke ya Şaran (HDP) ya Meclîsê Şaredarîya Tuşbayî Songul Işik reaksîyon mojna û vat: "Sîstemê dewleta faşîstî baş zanê ke; yê ke nê sîstemî birijnê û çin bikerê cinî yê. Semedê nê zî cinî hedef gêno. No mesajêkê eşkera yo semedê cinîyan o. Vanê ke 'şima sere wedarnê, ma do şim açin bikerê'. Ma zî vanê û reyke bîn reyna kenê; ma qetî hemverê şima de sere nêdanê ro. Ma do têkoşînê xo her ca de berz bikerê. Ma qetilkerdişê cinîyan qebûl nêkenê. Çi beno wa bibo, ma do bi rêxistinbîyayîş, bi pîlbîyayîş cewabê înan bidê."

'Cinîyê azadî yenê qetilkerdiş'

 

Endama Heyetê Jîneolojî Dîlan Yildize zî wina ercna: "Vindertişê Nagîhane sîstemê camêrdan tersna. Ma cinî taqîbkerdoxê aye yê. Ma do rayîrê aye de şêrê. Çiqas hêriş kenê wa bikerê, ma do taqîbkerdoxê têkoşînê aye bê û nêê qetilkerdişî qetî xo vîr ra nêkerê û nêdê xovîrrakerdiş. No serebût her wext cinîyê kurdî ci dir yenê rî bi rî. Cinîyê azadî yenê qetilkerdiş. Çi beno wa bibo, ma do fek têkoşînê xo ra vera nêdê. Şehîdî Nêmirenê."

 

‘No mesajêkê semedê cinîyan o'

 

Heesereka Komeleya Cigêrayîşê Koçberî yê Serhatî (Serhat Goç-der) Gulşen Kurte zî bale ant serê hêrişê serdestîyê camêrdan ê her çar hetê dinya û wina vat: "Her cayê dinya de hemverê cinîya kurde polîtîkayê şerî yenê kerdiş û na çarçewa de cinî yenê qetilkerdiş. Îran de cinîya kurde Jîna Mahsa Amînî ameye qetilkerdiş. No hêriş hemverê cinîyanê têkoşer de ameyo kerdiş. Wa nê baş bizanê ke bi merdiş û  tehdîdan nêeşkenê ma çin bikerê. Hemverê qirkerdişan de ma do têkoşînê xo her ware de pîl bikerê."