MERKEZÊ XEBERAN - Endama Merkezê Cigêrayîşê Jineolojiyî Nagihan Akarsele ke netîceyê sûîqestê de Silêmanî de ameye qetilkerdiş, bi xebatanê xo yê wareyê cinî û çapemenî de ameyîne naskerdiş.

 

Endama Merkezê Cigêrayîşê Jineolojiyî, Rojnamegere û Edîtora Kovara Jineolojî Nagihan Akarsele bajarê Silêmanîye yê Herêma Federal a Kurdistanî de ameye qetilkerdiş. Nagihana ke saete 10.00ine de demo ke keyeyê xo ra vejîyayîne, ameye qetilkerdiş û cayê serebûtî de dinyaya xo bedelnaye. Cenazeya Nagîhane wedarnayî Sazgehê Tibê Edlî yê Silêmanîye.

 

Hemkarîya PDK û MÎTî de pey perdeyê kiştişî zêde yê sîyasetmedar û şexsîyetê Kurdan ê Silêmanîye vejêno werte. Nê qetlîamî de zî rêça PDK û MÎTî esto.

 

Bi serran o serê Jineolojî de şuxulyayîne

 

Nagihan Akarsele ke serê rojnamegerîya cinî û Jineolojî de xeylêk cigêrayîşê muhîm kerdê, bi serran o çarçewaya xebatanê Jineolojî de Silêmanîye de mendêne. Nagihane serê awankerdişê Akademîya Jineolojiyî Silêmanîye û awankerdişê Kitabxaneyê Cinîyê Kurdistanî kar kerdêne.

 

Xebatkara çapemenîye, nuştoxe, cigêrayoxe

 

Nagihane verê Ajansê Xeberan ê Dîcleyî (DÎHA) ke serra 2016ine de bi Qerarnameyê Hukmê Qanûnî (KHK) amebi padayîş de rojnamegerî kerdebî. Nagihane mabêne serranê 2008-2014ine de DÎHAyî de sey muxabir û edîtore şuxulya û dima ra zî giranî da rojnamegerîya cinîyan. Nagihane eynî wextî de rojnameyê Yenî Ozgur Politika de zî nuştoxe bî. Nagihane nê serranê peyînan de semedê zanistê Jineolojî şuxulya.

 

Semedê averşîyayîşê fehmê azad têkoşîn kerd

 

Nagihane 12ê Adara 2022ine de qiseykerdişê xo yê NÛJINHAyî de dîyar kerd ke semedê fehmê azadî, ganî têkoşîn bêro kerdiş û  Nagîhane vat, "Çîyê muhîm yê yewin fehmo azad o, yo diyîn azadîya fehmî yo."

 

Wayîrê fikrê azade

 

Nagîhane bale ant serê muhîmîya azadîya cinî yo û vat: "Eke cinî wayîrê fikrêkê azad bo, eşkenê serê xo û ameyoxê komelî qerar bido. Eke cinî xo perwerde bikero, eşkena xo îdare bikero, komelî bi rayîr ra bero û problemê komelî çareser bikero. Semedê nê zî cinî  demo wayîrê mezgêkê azad bê zî no ware de xebate de wayîrê metodî ya."

 

Rêxistinbîyayîşê û perwerdeyê cinîyan

 

Nagihane bale ant serê maddeyê  rêxistinî û perwerdeyê cinîyan û wina vat: "Rêxistinê cinîyan, sîstemê perwerdeyî û perwerdeyê keyeyî, hîrê merkezî ke cinî eşkenê perwerde bivînê. Semedê perwerdekerdişê tutan ganî keye de cîyayîya cinsî nêbo. Sewîyeya rêxistinî de, ganî rêxistin bizanê ke ganî çi bikerê û nêkerê. Bi xususî munaqeşeyê bêtêduştî yê cinsî yê çapemenîye de bêrê wedaritiş. Perwerdeyê rêxistinî û koordînasyonî xeylêk muhîm o la  têkoşîn rayîr û çareserîya ci esto. Hemleyê sereyîn ke ganî rêxistinî ci dir bişuxulyê perwerdekerdişê cinîyan o, ganî cinî vernî de xo pênase bikerê û dima ra mêrdan perwerde bikerê. Seba cinî bibo wayîrê îradeyî, ganî her ware de bêro perwerdekerdiş."

 

Ganî cinî çarenûsê xo dîyar bikerê

 

Nagihane tewr peyîn qiseykerdişê xo de dîyar kerd ke ganî cinî çarenûsê xo bi xo dîyar bikero û vat: "Ganî cinî her wext wayîrê nasnameyê xo bibo û her qerraê xo bi xo bido. Ganî qerar tena berjewendiya partî, siyaset, ekonomî û her hetêk de nêbo, qerar berjewendîyê hemwelatî, komel û şarî de bo. Qerarê serê esasê berjewendiyê zihniyetê camêrdan yeno dayîş, xizmetê komel û xoza rê nêkenê. Zîhnîyetê sîstemê serdest goreyê berjewendiyê takekesî û madî qeraran dano."

 

Kapîtalîzm hêrişê têkoşînê rêxistinê cinîyan keno

 

Nagihane bernameyê Jinerjiyê Medya Haberî de zî reyna serê têkoşînê azadîya cinî de ercnayîş kerd û dîyar kerd ke seba averşîyayîşê têkoşînê azadîya cinî kapîtalîzmî hende hêrişê cinîyan nêkerdo. Nagihane, çalakiyê Las Tesis yê ke Şîlî de dest pêkerdî û dinya de vila bî zî ard vîr û dîyar kerd ke prosesê pandemî ê serra 2020ine eşkeno sey, "polîtîkayêke wazena têkoşînê cinîyan vindarno" bêro ercnayîş. Sewbîna Nagîhane dîyar kerd ke destpêkerdişê munaeşeyê cinsperestî, cinîbîyayîş û mêrdebîyayîş bi  qasê nê hêrişan tehluke yê.

 

Derheqê Nagihan Akarsele de

 

Rojnamegere - Cigêrayoxe - Nuştoxe. Konya de Cîhanbeylî de ameya dinya. Dimayê ke Unîversîteya Gazî ya Fakulteya Neqlkerdişî yê Beşê Rojnamegerî qedêna, Unîversîteya Anqarayî, Enstîtuya Zanistê Komelî, Beşê Cigêrayîşê Cinî, lîsansê serrêke girewte. Ajansê Xeberanê Dîcleyî de muxabirî û edîtorî kerde. Rojnameyê Ozgur Gundemî yê rojnameyê rojane de sey qunciknuştoxe şuxulya. Rojnameyê Yenî Ozgur Poltîka de zî nuşte nuştêne. Xebatê awankerdişê kovara Ozgur Kadin de ca girewte. Endama desteyê weşanî ya Kovara Jineolojî bî. Nuşteyê aye xeylêk kovaran de bi xususî kovarê Modernîteyê Demokratîk û Jineolojî de ameyê weşanayîş. Xebatê aye binê banê Akademiya Jineolojî de dewam kerdêne.