Rojda Aydin 

 

MÊRDÎN -  G.T. 7 serrî bi îşkenceyê Mahmut Tê reyde rî bi rî mende. G. dewaya veradayîşî akerd  û waşt ke 3 tutanê xo bigîro verê xo. G. pêwa têkoşînê xo yê hemverê îşkence û zulmî, vengdayîşê hetkarîyê sazgeh û dezgehê cinîyan  kerd.

 

G.T. ya 26 serrî Mêrdîn de ciwîyena, dayîka 3 tutan a. 7 serrî yo G. bi derb, îşkence û tehdîdê kiştişî reyde derbaz bîyo. G.T.ya ke bi îşkenceyê Mahmût T. reyde rî bi rî menda, dewaya fekveradayîşî kerd. G.ye hem wazena tutanê xo bigîro verê xo û hem zî wazena îşkence ra xelas bibo. Derheqê cuya xo de ajansê ma rê qal kerd.

 

'Serrêke dima şîdet dest pêkerd'

 

G.ye bi waştişê keyeyî 18 serrîya xo de ameya zewicnayîş û wina qal kerd: "Dimayê serrêke dima tutêkê mi ame dinya û mêrdeyê mi o wext şi eskerî. Dima ra vejîya teberê welatî û dest bi kar kerd. Dima ra xeylêk vurya û şîdetê fîzîkî dest pêkerd. Her roje mi derb werdêne.  6 aşmî teberê welatî de mendêne û demo ke ameyîne keye zî mi derb kerdêne. 7 serrê mi bi kuwayîş derbaz bi. Mi verê çimanê tutanê xo de kuwayîş werd. Porê mi antêne, xeylêk rey seba kuwayîşî zincî û fekê mi ra gonî ameyîne. Sewbîna verê şîdetî de zî her rey tecawuzê mi kerdêne. No çî semedê mi xeylêk bi dej bi."

 

'6 aşmî yo mi tutê xo nêdîyê'

 

G.ya ke nika verê keyeyê xo de manena, 6 aşmî yo tutanê xo nêvînena û vat: "Hemverê zulm û îşkenceyî, mi verê xo da keyeyê xo. No serrêke û nîm o verê keyeyê xo de manena. Labelê tehdîtê kiştişî her wext dewam kerd. Pêwa her tewir îşkenceyî zî vatêne, 'yan ti do xo bikişê, yan zî ez o to bikişî. Eke  ti xo nêkişê, ez o tutan berî Pakistan'. Reyke clorîn bi mi da werdiş, mi wedarnayî nêweşxane û uca de zî vat, 'eke ti gerre bikerê ez o tutanê to bikişî'. Semedê tersî mi gerre nêkerd. Polîsî zî mi ra vat, 'to derb werdo'. Dozgerî pîyê mi rê waştişname şawit û vat, 'kênaya to bi şîdetî reyde rî bi rî menda û gerre nêkena'. Bi rastî mi waşt ez tutanê xo bipawî. Lajê min o yew serre nêweşîya helênayîşê masûlkî (kas) ci dir esta û roj bi roje zeyîf beno. No bi 6 aşmî yo ez nêeşkena tutanê xo bivînî. Ez rewşa tutanê xo nêzana."

 

'Mi dewaya veradayîşî akerd'

 

G.ye dîyar kerd ke serra 2021ine de dewaya veradayîşî akerda û wina vat: "Dewaya mi hema dewam kena. Roniştişê 1ê hezîrane de ame vînayîş. La o nêame. Seba ke o û avûkatê ci tewr nêbî, dewa taloqê 14ê êlule ame kerdiş. Roniştiş de vat, 'G.ye dayîkî tutanê xo rê nêkerda' û îdiayê ‘Aqilê G.ye sereyê aye de nêyo' kerd. Semedê cigêrayîşî heyetêkê ame keye, serdayîşê mi û raporêk girewtî. Rapor de îdiayê ci ameyî redkerdiş. Mi dewaya nafaka akerd, semedo ke 3 tutê mi estê û yew zî nêweş o. La mi dir bazarî kerd û vat, 'Ti nafaka mewaze ez o tutan bidî to'. La semedo ke ez tutanê xo wey bikerî, lazimîya mi bi nafaka zî esta."

 

Venga sazgehê cinîyan kerd

 

G.ye peynîya qiseykerdişê xo de venga sazgeh û dezgehê cinîyan kerd û hetkarî waşt û vat: "Ez wazena sazgeh û dezgehê cinîyan mîyanê paştdayîşî de bê. Ez tena tutanê xo wazena û hetkarî bidê mi."

 

Sewbîna 3ine roniştişê dewa de 18ê teşrîna peyêne de bêro vînayîş.