Zelal Tunç

 

WAN - Temsîlkarê Serekîya Pêroyî ya PÎAyî Menîce Gulmeze serewedaritişê Îranî yê bi qetilkerdişê Jîna Mahsa Emini dest pêkerd, ercna. Menîce vat:"Rejîm, teda bi qilifê îslamî keno. Teda tena Îran de ney, Tirkîya de zî esto.”

 

13ê êlule de Tehranê Îranî de "polîsê exlaqî" bi bahaneyê laçika xo baş nêdaya sereyê xo, îşkence cinîya kurde Jîna Mahsa Eminiya 22 serrî kerd û aye qetil kerdî. Serewedaritişê hemverê qetilkerdişê Jîna bi rayberîya cinî pîl beno. Cinî porê xo qesnenê, laçikanê xo veşnenê û hemverê şîdetê rejîmî sere wedarnenê.

 

'Rejîm, teda bi qilifê îslamî keno’

 

Menice vat, Îran de serê şarî de teda esto û vat: “Heta nika xeylêk kesî seba fikre xo ard ziwan, ameyê tepiştiş, destbendkerdiş, îdamkerdiş yan zî mecbûr mendê vejîyê teberê welatî. Mahsa yew hezar kesî ra ke bi îşkence yena kiştiş. Rejîmî teda bi qilifê îslamî yeno kerdiş. Rejîm tena wazeno xo dewam bikero.”

 

'Hemverê tedayan Kawa, Leyla Qasim vejênê werte’

 

Menice da zanayîş ke merdimî eşkenê bi xo metod, kaîdeyê qanûnê îslamî fam bikerê û vat: "Îslamo ke cinî rê yeno ferzkerdiş, raşt nêyo. Cinî seba cuya xo nêkerê binê hegemonyayê kesêk têkoşîn kena. Cayê sey Rojhelatê Mîyanên ê ke rejîmê zordar do Kawa, Leyla Qasimî vejîyê werte.”

 

Tedayê serranê 90an

 

Menice vat, serebûtê Mahsa serranê  90an ardo vîrê ci û vat: “O wext zî laçike qedexe bî. Çalakîyan de polîsan porê mi girewt û mi erd ra kaş kerdî. Waya mi seba laçika xo bi tedayê mamosteyî reyde rî bi rî mende. Seba tedayî kewte mîyanê hewldayîşê întixarî." 

 

'Kesê ke bi cezayê îdamî ameyî muhakemekerdiş estbî’

 

Menice dewam de wina vat: "Tirkîya de xeylêk kesî seba laçika dayî sereyê xo  bi cezaya îdamî ameyî muhakemekerdiş. Nîna ra yewe zî Parlamentera HDPyî Huda Kaya û yew zî Filiz Beyaza ke destbendkerdişî de ameye kiştiş. No zîhnîyetê zordarî yo. Ganî zehmetî yê ke laçike danê sereyê xo, ne zî yê ke nêdanê sereyê xo rê bêro vetiş. Ganî qanûnê baş bêrê amadekerdiş.”

 

'Îqtîdaro bîyaye bi 20 serrî yo wina îqtîdarê xo paweno’

 

Menice tewr peyîn wina vat: “Ewro hema sîstemê ma yê perwerdeyî aver nêşîyo. Yew sebebê ci zî cil û belg ê. Seba polîtîkayê "laçike" ya îqtidarê AKPyî yê 20 serrî yê merdimî vanê ‘eke ez raya xo bidî partiyêke bîne, mi do eynî muameleyî bivînî’ raya xo danê AKPyî. Bi 20 serrî yo AKP îqtidarê xo wina paweno.”