Melîke Aydin

 

Îzmîr - Partîya Çepî ya Keskan ra Nevîn Aytekîne da zanayîş ke îqtîdar hewl dano ke krîz, bi talanê xoza û şerî reyde çareser bikero û qirkerdîşê daranê Koyê Cudî zî seba nê keno. Nevîne vat, ganî têkoşînêkê hempar bêro dayîş.

 

Şirnex de pêwa operasyonê qirkerdişê daran zî dewam keno, koyê Cudî û Besta de roje ra nêzdîyê 200 ton darî yenê birnayîş û bi TIRan reyde benê herêmanê cîya. Goreyê dayeyê Mudurîyê Herêmî ya Daristanan ê Rihayî, babete vatişîya ke 7 aşman de sera 7 wareyê daristanî ameyo çinkerdiş. Xeylêk sazgeh û rêxstinî hemverê qirkerdişê daran de do 17ê êlule bi sloganê, ‘Ma hemverê talanê xoza û şerî rayîr ra şinê ver bi Koyê Cudî.'

 

Parçeyêkê polîtîkaya şerî yo

Partîya Çepî ya Keskan ra Nevîn Aytekîne derheqê babete de erjnayîş kerd û da zanayîş ke krîz de hewl dano ke bi talanê xoza û şerî çareser bikero û rijnayîşê Koyê Cudî parçeyêkê polîtîkaya şerî yo û no rijnayîş zî pêro kesan eleqeder keno. Nevîne vat, reaksîyon mojnayîş xeylêk muhîm o û wina vat: “Ganî tewr zêde bi sazgehê netewî û mîyanneteweyî reyde têkilî bêro ronayîş.

 

'Amancdewamkerdişê şer û rantî yo'

 

Nevîne reaksîyon vera qirkerdişê xoza ke binê asayîşî de yeno kerdiş de da û vat: "Amanc qirkerdişê daranê Şirnexî, kerdişê polîtîkayanê şerî û rantî yo. No qirkerdiş plankerde yeno kerdiş. Roje de bi tonan darî yenê birnayîş. No eşkera yeno kerdiş. Uca de tena darî nênê qetilkerdiş. Cuya zîndanan yena çinkerdiş. Sewbîna no rijnayîş, tena şarê herême eleqeder nêkeno. Tesîr serê heme cayan keno. Rayîrê krîzê îklîmî keno. Pêro dinya û Tirkîya do bikewê mîyanê şerê awe. Bi no hawa do koçberî zêde bibo. Merdimî seba awe û werdî do koç bikerê. Rijnayîşê ekolojîkî ça beno wa bibo, tesîr serê pêro dinya de keno."

 

‘Çareseriya înan şer û talan o’

 

Nevîne bale ant serê krîzê ekonomî û wina vat: “Îqtîdar seba çareserî krîzê polîtîkayê şerî keno û xoza talan keno. Yewin rayîrê çareserî têkoşînê yewbîyaye yo. Rijnayîşê Şirnexî sey yê Egeyî, sey ê Koyê Kazî sey ê Behrasîya veng nêvet. La no nêno manaya ke merdimî nê çin hesibnenê. Ganî ma têkoşînê yewbîyaye pîl bikerê. Seba rayîr ra şîyayîşê 17ê êlule de bi ca bêro, ganî bajaranê cîya pawitoxê xozaye tewr bibê. Hemverê qedexeyê walî zî do pawitoxê xoza têkoşîn bikerê. Ganî pêro kesê ke cuya ekolojîk pawenê reaksîyon bimojnê."

 

‘Ganî helwesto hempar bêro mojnayîş'

 

Nevîne tewr peyîn qiseykerdişê xo de wina vat: "Ganî bi heme kesê ke têkoşînê ekolojîkî danê, têkilî bêro ronayîş. Ganî  no talano ke yeno ciwîyayîş, bêro eşnawitiş. Ganî her kes bizano. Seba vetişê vengî zî ganî têkoşîn bêro dayîş. Ganî reaksîyon bêro mojnayîş."