Zelal Tunç

 

WAN - Hemsereka TUHAY-DERî Edîbe Babur ke eşkerayîya çapemenîye ya serrgêra operasyonê qirkerdişê sîyasî de ame dayîş de ameye destbendkerdiş, seba vatişê aye ya ‘Do kurdî sere nêtewênê’ dewa ci rê ameye akerdiş. Dewaya ke Edîbe ci ra ameyîne muhakemekerdiş, do polîsê ke sereyê aye dayî erd, sey şahid bêrê goşdarîkerdiş.

 

Parlamentera Partîya Demokratîke ya Şaran (HDP) ya Amedî Semra Guzele seba fotografê mabêne serranê 2013-2015ine de antibî, hetê wezîrê karê zerreyî Suleyman Soylu ra hedef ameye girewtiş û destnêdayîşê aye ame wedaritiş, 2yê êlule de zî Stenbol de ameye destbendkerdiş. Wezîrê karê zereyî serê çapemenîya dîjîtale de destbendkerdişê Semra Guzele neql kerd. Demo ke Semra Guzele seba dermankerdişî benê kontrolê doktorî, polîsan îşkence ci rê kerd û sereyê aye dayî erd. No dîmen çapemenîya komelî de ame parekerdiş. Serê nê îşkenceyî de rayaumûmî pêroyî û Tirkîya reaksîyonê pîlî mojnayî.

 

Wan de zî hewl dayî ke sereyê Edîbe Babur bitewênê

 

Yew nimûneyê îşkencêyî seretewênayîşî zî 4ê teşrîna peyêne 2021ê de Wan de eşkerayîyêka çapemenîye ya seba protestokerdişê serrgêra operasyonê qirkerdişê siyasî de bi ca ame û polîsan hêrişê xo de nê caardişî kerd. Hemsereka Komeleya Paştdayîşî û Hetkarîya Keyeyê Tepişteyan Edîbe Babur hetê hîrê polîsan ra ameye destbendkerdiş û polîsan hewl dayî ke sereyê aye bitewênê. Edîbe vatibi, ‘Tu wext nêeşkenê bi kurdan sere bitewênê’. û no dîmen bi 13 saniyeyan kewtibi rojeve.

 

Cipersayîş Edîbe rê amebi akerdiş

 

Piştre Edîbe otobusa destbendkerdişî espar kerdî û dimeyê ke dîmenî vila bî û reaksîyon ameyî mojnayîş, Edîbe vera ke berê emniyetî, nêweşxane de kontrolê weşîye ame kerdiş û ameye veradayîş. Dima ra Serdozgeriya Komare ci gêrayî û waştî ke şêro îfade bido û Edîbe reyna şî Emniyetî, uca de selahîyetdaran vato, ‘çîyêkê şaş virazyayo’ û nê ser de Edîbe vera ke îfadê bido şîbî keyeyê xo. Di rojî dima Edîbe bi avûkatanê xo reyde şî Emniyet de îfade da û derheqê  Edîbe de seba vatişê ‘Şima nêeşkenê bi kurdan sere bitewênê’ cipersayîş ame destpêkerdiş.

 

Polîsê ke îşkence kerdî do sey şahid bêrê goşdarîkerdiş

 

Çarçewaya cipersayîşo ke bi îdiayê ‘muxalefetê kanûnê rayîr ra şîyayîş û protestoyan’ hetê serdozgeriya komara ya Wanî ra ame destpêkerdiş de îdianame ame amadekerdiş û hetê 4in Dadgeha Cezaya Asliye ya Wanî ra ame qebûlkerdiş. Edîbe 26ê gulane de vejîya vernîya dadgerî û dewa taloqê 11ê teşrîna peyêne ame kerdiş.

 

‘Do cinîyê kurdî sere nêtewênê’

 

Edîbe derheqê dewa û îşkenceyê ke ci rê ameyo kerdiş ser qisey kerd û vat, eynî çî Semra rê zî ameyo kerdiş û vat: “Dimayê vatişê mi kewtî serê çapemenîye dewa ameye akerdiş. Heta nika derheqê mi de 13 dewayî ameyî akerdiş. Bi desan rey ez ameya tehdîdkerdiş. Ez reyke bîn vana; Na dewa bi cinîyanê kurdan sere nêtewênena. Leyla Qasim ra heta Semra Guzele serê cinîyê kurdan nêame tewênayîş.”