Melike Aydin

 

AYDIN - Semra Turkana ke hêrişê nîjadperestî ci rê ame kerdiş û bi tehdîdê tecawuzî reyde rî bi rî mende vat, demo ke îfadeyê ci Qereqolê Cendermeyan ê Încirliovayî de ameyo girewtiş, heqê avûkatî ci rê nêameyo perskerdiş. Semra derheqê rojnameya Aydinlikî de zî vat: “Şima çi ra dewijan pawenê? Verê heqderan de vinderê, nêheqî mekerê rêze ra." 

 

Dewa Arapdereyî yê qezaya Încirliova ya Aydinî de 11ê êlule de keyeyêkê kurd ê Îdirî demo şîne keyeyê xo neweyî girewtê bivînê, bi hêrişê nîjadperestî reyde rî bi rî manenê. Dewijê ke vatî, "Ma dewe de kurdan nêwazenê” pêwa tutan, 8 kesê keyeyêk ra birîndar kerdî. Ame zanayîş ke Semraya ke aye rê tehdîdê tecawuzî ameyo kerdiş, wexto ke şina Qereqolê Cendermeyî yê Încirliovayî de îfade dana, heqê avûkatî ci ra nêno perskerdiş. Sewbîna camêrdo bi nameyo Îsmaîl ke demê  îfadeyî de ame teşhîskerdiş zî nêame tepiştiş.

 

Semra hêrişê nîjadperest û çîyê ciwîyaya ajansê ma rê qal kerd.

 

Semra da zanayîş ke bi xêrê kesê Cengiz Turkan ke inşaatê Aydinî de xebityayîne, polîso teqawito bi nameyê  Dogan Narinî ra keye girewtê û vat 11ê êlule de pêwa verê agahî dayê zî bi bahaneyê kîra de bî, serê erdî de bîyê, keye nêdîyê.  Semra vat: “Demo ke ma şî keye, merdimê kesê ke kîra de bî yê qata corî ra vatî, ber akerde yo. Şima eşkenê biewnê. Her çiqas tapû verê ma de bî zî ma nêkewtî zerre. La ma teşwîqê kewtişê zerreyi kerdî. No plankerde bi. Eke bikewtêne zerre do bi bahaneyê tecawuzê hemverê haneyê ma kerdê, do zerre de ma qetil bikerdêne. Polîso teqawît nêwaşt bêro. Dayîka mi vat, çîyêk nînan de esto, haydêrê ma şêrê. Seba ke ma hende rayîr ra amebî, ma waştêne biewnê. Polîso teqawîtî vat, 'peynî de şima do biewnê’. Bi qesawetê xo çîyêk dîyar kerd.”

 

Dewe de pêrodayîşî rî dayî

 

Semra dewam de da zanayîş ke birayê ci demo ke qehwe de bîyo, yê uca vatê ke ti ça ra yê û demo ke birayê mi vato, ma Îdirî ray ê. Înan zî vato, qey şima cayêkê bîn de keye nêdîyo.

 

Bi konvoyî bî

 

Semra vat, demo ke înan waşto dewe ra vejîyê, dewijan bi sopayê aşinan û kerreyan rayîrê înan birnayê û vat: "O wext hêriş birayê mi rê ame kerdiş. Rayîrê ma padayî. Bi konvoyî bî. 15-18 wesayitî estbî. Tewr tay 60-70 kesî deste înan de sope bî, hêvîya ma bî. Heme derûdorê dewa Arapdereyî de bî.”

 

'Tehdîdê tecawuzî mi rê kerdî’

 

Semra da zanayîş ke dewijan înan ra vato, eke şima ameyê tîya, o wext şima merg dayo verê çimanê xo û vat: “Xora ez emaliyatkerde bîya. Bi kîn û nefret bî.  Birayê min o ke destûrî ra amebi, leşker bi. Mi vat, şima nîjadperestî kenê. Birayê mi mîyanê gonî de mend. Mi xo eşt serê birayê xo. Mi antî kîşte. Vatî, eke şima ameyê tîya, şima merg dayo verê çimanê xo. Hîrê saetî ra zêde ma esîr girewtî. Heqaret kurdbîyayîşê ma rê kerdî. Vatî şima çira nêşî koyê xo, şima terorîst ê. Her ke ez qisey kerdêne, bi hêrs bîne. Nengî û heqaret kerdî. Sîla dayî rîyê mi ro û dest dergê mi kerdî. Tehdîdê tecawuzî mi rê kerdî. Fotograf û video antî. Vatî, şima şêrê ça, ma do şima bivînê.”

 

'KADESî verê ma da di qereqolan la herdiyan zî hetkarî nêkerd’

 

Semra da zanayîş ke hewl daya xo biresno caardişê KADESî û vat: “KADESî verê ma da di qereqolan la herdiyan zî hetkarî nêkerd. Erebeyê serê rayîrî zî tersan ra hetkarîya ma nêkerd. Ma qedera xo reyde tena mendî. Gonî fekê birayê mi şî û serê hişê xo de şi. Ma vat qey birayê mi merdo. Ez pîyê xo yê ke xo nimitib gêraya. Mîyanê tersî de ma esparê erebî bî. Ma şî Nêweşxaneyê Dewlete ya Ataturkî. Demo ke ma nêweşxaneyî de bî cendermeyî ameyî. Ma zî vat, çira şima nika yenê, çira wexto ke ma kuyayîş werd şima nêameyî? Ma birerdî Qereqolê Cendermeyan ê Încirliovayî û heqê avûkatî zî ma ra pers nêkerdî. Demo ke cendermeyan gêrabî, vatî; herêma ma nêya, ma nênê. Ma xo bi rayîrê internetî resna HDPyî. Eke HDPyî ra nêbîne, ma de se bikerdêne?”

 

Versuc ame teşhîskerdiş la nêame tepiştiş

 

Semra vat, versuco ke tehdîdê tecawuzî mi rê kerd û şîdet bi mi kerd, mi teşhis kerd la nêame tepişitş û wina vat: “Versûcan qereqol de ma ra vatî, şima încîran diznayo. Îfadeyê xo de vatî, kewtê  baxçeyê ma. Ma tu încîran tira nêkerdibi. Rojnameyê Aydinlikî zî nê pare kerd. Ez venga rojnameyî kena, wa dewijan nêpawo. Şima çira dewijan pawenê? Kişte heqderan de vinderê, nêheqî mekerê rêze ra.”